Ermənistan hakimiyyəti eyforiyada - "Türkiyə "Dünya kəsişməsini" qəbul edəcək"...
Tural İsmayılov: "Ermənistan real sülh istəyən ölkə olsaydı, Azərbaycan tərəfindən təklif edilən "3+3" platformasında normal dövlətlərarası münasibətləri bərpa edərdi"
Ermənistan rəsmiləri hələ də uydurduqlari "Dünya kəsişməsi" nəqliyyat dəhlizi layihəsinin peşindədir. Bunlar anlamaq istəmirlər ki, "Böyük Ermənistan" xülyasına bəlkə də müəyyən zaman kəsiyində kimisə inandırmaq olar, amma Ermənistandan başqa heç kimin işinə yaramayan uydurma bir layihəni heç bir ölkəyə sırımaq mümkün deyil.
Layihələrin qəbul edilməsinin birinci əsas şərti onun tərəflər üçün iqtisadi cəhətdən səmərəli olmasıdır. Bunun ardınca isə siyasi aspektlər nəzərə alınır. Ermənistanın isə cəmi iki dövlətlə sərhəd-keçid məntəqəsi var - İran və Gürcüstan. Bu ölkələrdən biri Avropa ilə düşməndir, digəri olan Gürcüstan isə Avropa ilə düsmənçiliyin astanasındadır. Belə olan halda Ermənistan hansi iqtisadi-siyasi-cografi mövqeyi ilə dünyanın kəsişməsi ola bilər?
Ermənistan sahibkarları öz yüklərini Rusiyaya çatdırmaq üçün Yuxari Lars gömrük-keçid məntəqəsində günlərlə gözləməli olurlar. Bəzən isə bu məntəqə aylarla bağlanır. Özü üçün dünyaya çıxış axtaran ölkə necə dünyanın kəsişməsi ola bilər? Bir atalar misalında deyildiyi kimi, özünə umac ova bilmir, başqasına əriştə kəsmək istəyir. Bütün bunlara baxmayaraq, ermənilər israr edir, görək kimi inandıra biləcəklər.
Bu dəfə ermənilər Türkiyəyə rəml atıb. Belə ki, Ermənistan parlamentinin sədri Alen Simonyan Türkiyə Böyük Millət Məclisinin sədri Numan Kurtulmuşla görüşün təfərrüatlarını təqdim edib.
“Mənim Parlamentlərarası İttifaqın 149-cu Məclisi çərçivəsində Türkiyə Böyük Millət Məclisinin sədri ilə dolğun bir görüşüm oldu. Biz ikitərəfli məsələlərin geniş spektrini, Cənubi Qafqazda və bütövlükdə regionda sülh prosesini müzakirə etdik. Mən Ermənistan hökumətinin “Dünyanın kəsişməsi” layihəsini təqdim etdim. Əlaqələrimizi davam etdirməyə razılaşdıq”, - o sosial şəbəkələrdə yazıb.
Ermənistan tərəfdə belə bir eyforiya ola bilərmi ki, "Dünyanın kəsişməsi" layihəsini Türkiyə Azərbaycansız qəbul edər?
Bizim üçun məsələni sərh edən politoloq Tural İsmayılov bildirdi ki,Türkiyə heç bir halda Azərbaycanın mövqelərini nəzərə almadan Ermənistanın hansısa qondarma və uydurma bir layihəsini qəbul etməz: "Ermənistan real sülh istəyən ölkə olsaydı, Azərbaycan tərəfindən təklif edilən "3+3" platformasında normal dövlətlərarası münasibətləri bərpa edərdi. Amma bizim gördüyümüz odur ki, bu gün Ermənistan real sülhlə bağli təklifləri qəbul etmək əvəzinə hansısa "Dünyanın kəsisməsi" adli hec bir əsası olmayan, uydurma bir layihədən danışır. Belə təkliflərlə Ermənistan bölgəni qarışdırmağa çalışır. Alen Simonyanın Numan Kurtulmuşla görüşü, əlbəttə ki, Türkiyə-Ermənistan münasibətlərinin sonrakı mərhələsi üçün mühüm əhəmiyyət kəsb edə bilər. Amma Ermənistan elə bir eyforiyaya qapılmamalıdır ki, Türkiyə Azərbaycanın mövqelərini nəzərə almadan İrəvanla hansısa bir məsələdə razilaşa bilər. Türkiyə həmişə Azərbaycanın mövqe və münasibətlərini nəzərə alıb. Ona görə də "Dünyanın kəsişməsi" adli layihə real layihə olsa belə, Azərbaycansız heç vaxt qəbul edilə bilməz.
Ümumiyyətlə, bu layihənin özünün heç bir perspektivi və keçərliliyi yoxdur. Bunu Ermənistan tərəfi yaxşı başa düşür ki, Azərbaycanın və digər region ölkələrinin ciddiyə almadığı hər hansı bir layihənin Ermənistanın baş naziri tərəfindən tez-tez dövriyyəyə buraxılması heç bir əhəmiyyət kəsb etmir və hec bir məna yükünə malik deyil".
Dəniz NƏSİRLİ
