Dostluq hara, sanksiya hara - Azərbaycandan ABŞ-a sərt mesaj...
Ceyhun Məmmədov: "Amerikanın Azərbaycana qarşı qərəzli münasibətləri, ikili standartları davam edir"
ABŞ-ın Azərbaycana qarşı həyata keçirdiyi qərəzli siyasət özünü son zamanlar daha çox büruzə verməyə başlayıb. C.Bayden hökumətinin Azərbaycana sanksiya tətbiq etmək niyyəti isə ABŞ-ın antiazərbaycan mövqeyini ortaya qoyur.
"Bugünkü gün anti-Azərbaycan qüvvələr üçün yas günüdür, matəm günüdür. Yəni necə ola bilər ki, bizim icazəmiz olmadan Azərbaycan öz hüququnu bərpa etdi, heç kimdən soruşmadan, heç kimdən qorxmadan, heç kimi saymadan. Öz gücü hesabına, öz övladlarının fədakarlığı hesabına. Bunu bizə bağışlaya bilmirlər."
Bu sözləri Prezident İlham Əliyev oktyabrın 4-də Cəbrayıl şəhərində sakinlərlə görüşdə söyləyib. “Bu gün Azərbaycana Amerikadan sanksiya tətbiq edilir. Ondan sonra da deyirlər ki, gəlin, dostluğumuzu möhkəmləndirək. Hansı dostluqdan söhbət gedə bilər?” Prezident Əliyev vurğulayıb ki, biz ancaq öz gücümüzə arxalanmalıyıq və heç bir vədlərə, heç bir şirin sözlərə, yalançı ifadələrə aldanmamalıyıq.
Prezident ABŞ-ın Azərbaycana qeyri-dost münasibətini növbəti dəfə vurğulayıb.
ABŞ Azərbaycana qarşı niyə mənfi mövqe tutur? Bir tərəfdən dostluqdan danışır, o biri tərəfdən sanksiya tətbiq edir. Dostluq hara, sanksiya hara?
"Bu cür münasibətlə, bu cür yanaşma, bu cür əlaqələrlə Amerika Azərbaycana dostluğu qorumaq istədiyini bildirə bilməz, bunu bildirməsi də, təbii ki, qəbuledilən və anlaşılan deyil"
Millət vəkili Ceyhun Məmmədov baki-xeber.com-a şərhində "Cənab Prezidentin də qeyd etdiyi kimi, əslində, bu gün Amerika bir tərəfdən iddia edir ki, Azərbaycanla dostluq münasibətlərini qurmaq istəyir, Azərbaycanla əlaqələrin inkişafında maraqlıdır və bizə dost, qardaş ölkədir, amma digər tərəfdən isə biz Amerikanın qeyri-dost münasibətini görürük.
Yəni bu gün Amerikanın Azərbaycana qarşı qərəzi münasibətləri, ikili standartları davam edir. ABŞ Ermənistana açıq-aydın dəstək verir, Ermənistanın bizə qarşı törətdiyi vəhşiliklərə ümumiyyətlə toxunmur, 10 min kvadrat kilometr ərazinin barbarcasına dağıdılması ABŞ üçün önəm daşımır. Bu gün Amerika konqresmenləri bizi "soyqırımda", Ermənistana qarşı "təcavüzdə" ittiham edirlər. Amma reallıq göz qabağındadır ki, deyilənlər hamısı yalandır və bu qəbuledilməzdi. ABŞ Azərbaycana qarşı sanksiya tətbiq etmək istəyir. Bu da, təbii ki, ciddi narahatlıq doğuran bir məsələdir. Yəni bu, qeyri-dost münasibətidir. ABŞ bir tərəfdən Azərbaycanla dostluq təklif edir ki, gəl, dostluq əlaqələrini möhkəmləndirək, dost olaq, yaxın olaq, güclü olaq, amma digər tərəfdən, onların bizə qarşı bu qərəzini, ikili standartlarla yanaşmasını açıq-aydın müşahidə edirik"-deyə bildirdi.
Millət vəkilinin sözlərinə görə, təbii ki, bu da Azərbaycan tərəfindən birmənalı qarşılanmamalıdır və qarşılanmır da. "Cənab Prezidentin də qeyd etdiyi kimi, dost hara, sanksiya hara? Necə ola bilər ki, özünə dost hesab etdiyin ölkəyə qarşı sən sanksiya tətbiq edəsən və Azərbaycana qarşı bu münasibəti sərgilıyəsən? Bir daha qeyd edirik ki, Azərbaycan hər zaman Ermənistana münasibətdə ədalətli olub, həmçinin də ABŞ-la münasibətlərin qorunmasında maraqlı olub. Biz istəyirik bu gün də bu münasibətlər qorunsun və davam etsin. Amma bu, Ermənistandan və onun həyata keçirdiyi siyasətdən aslıdır. Yəni bu cür münasibətlə, bu cür yanaşma, bu cür əlaqələrlə Amerika Azərbaycana dostluğu qorumaq istədiyini bildirə bilməz, bunu bildirməsi də, təbii ki, qəbuledilən və anlaşılan deyil. Bir daha onu qeyd edirik ki, bunun kökündə bizə münasibətdə ədaləti görmürük, qərəzi, ikili standartları görürük.
Niyə indiyə qədər Ermənistanla bağlı bir addım atılmayıb, Ermənistana heç nə deyilməyib? Bütün bunlar əsaslı olaraq ciddi suallar doğurur"-deyə C.Məmmədov bildirdi.
İradə SARIYEVA
