Qarabağda separatizmin məhv edilməsi Cənubi Osetiyanı niyə narahat edib?..
Bəhruz Quliyev: “Cənubi Osetiya "prezidenti" sadəcə öz məkrini, niyyətini ortaya qoyur”
Azərbaycanın öz ərazi bütövlüyünü təmin etməsi separatçı Cənubi Osetiya rejiminin “prezidenti” Alan Qaqloyevi yaman narahat edib. Separatçıların Qarabağdan çıxarılmasına münasibət bildirən “prezident” buna görə Ermənistanın baş naziri Nikol Paşinyanı ittiham edib və onu öz xalqına xəyanətdə ittiham edib.
O deyib ki, ona görə də Paşinyanın fikri onları maraqlandırmır. Qaqloyev Paşinyanın Ermənistanın Gürcüstanın ərazi bütövlüyünü tanıması ilə bağlı bəyanatını qıcıqla qarşılayıb. Bununla bağlı vurğulayıb ki, Cənubi Osetiya Rusiya Federasiyası və bir sıra digər ölkələr tərəfindən tanınan “müstəqil dövlətdir” və “hər kəs bunu nəzərə almalıdır”. O deyib ki, Paşinyan özündə “Arsaxın” “müstəqilliyini” tanımağa cəsarət tapmadı.
Üzdəniraq fikirləri ilə Azərbaycanın öz ərazi bütövlüyünü təmin etməsinə xainliklə yanaşan Cənubi Osetiya "prezidenti" Qarabağ ermənilərinin təəssübünü çəkir. Deyir ki, gərək indiyə qədər Ermənistan oradakı rejimi saxlaya idi, onlar Azərbaycana tabe olmamalıydı.
Bu adam özü Gürcüstanı satıb gedib Rusiyaya birləşib, indi də sərsəmləyir ki, gərək Qarabağ erməniləri də sona qədər döyüşəydilər və Azərbaycanın ərazi bütövlüyünü tanımayaydılar. O, guya çıxışında Paşinyana cavab verir, əslində isə Qarabağ ermənilərini separatçılığı davam etdirməyə çağırır. Amma unudur ki, Rusiya nə vaxtsa Cənubi Osetiyaya da dəstəyi dayandıracaq və o da qolubağlı Tiflisə aparılacaq. Yəni bu separatçı “prezidenti” də Araik Artunyunyanın taleyi gözləyir. Bütün separatçıların sonu necədirsə, Alan Qaqloyevi o tale gözləyir.
Qarabağda separatizmin məhv edilməsi Cənubi Osetiya “prezidentini” niyə narahat edib?..
“Bu, Rusiya üçün də vaxtilə yaratdığı əhəmiyyətsiz separatçı rejimdir”
Məsələyə münasibət bildirən SƏS Media Qrupunun rəhbəri, fəlsəfə üzrə fəlsəfə doktoru Bəhruz Quliyev “Bakı-Xəbər”ə bildirdi ki, Cənubi Osetiya özü Rusiyanın yaratdığı separat bir qurumdur: “Belə olan halda “dövlət başçısı”nın Qarabağ ermənilərinin təəssüfünü çəkməyi əslində təəccübləndirici deyil. Biz bilirik ki, Qarabağdakı qanunsuz rejim də əslində separatçı rejim idi, bu da separatçı rejimdir. Təbii ki, separatçı rejimlər bir-birini dəstəkləyəcək. Bunun müzakirəyə səbəb olan bir şey olduğunu düşünmürəm. Faktiki olaraq Cənubi Osetiyanı tanıyan çox az dövlət var. Həmin siyasətçinin sözləri hansısa xüsusi əhəmiyyətə malik deyil. Bu, üstündə durulası məsələ deyil, sadəcə öz məkrini, niyyətini ortaya qoyur. Bu adam ciddi fiqur olsaydı, düşünmək olardı ki, bəlkə də Rusiya Cənubi Osetiyanı sıxışdırar. Bu, Rusiya üçün də vaxtilə yaratdığı əhəmiyyətsiz separatçı rejimdir”.
İradə SARIYEVA
