Məktəb və bağçaların tabeçilik qaydası dəyişdi - neqativlər dəyişəcəkmi...
Kamran Əsədov: “İmtahanlarda şəffaflığın təmin edilməsi vacibdir, bu sahədə kənar müdaxilələr olmamalıdır”
Məlum olduğu kimi, bağça və ümumtəhsil məktəblərinə inzibati və pedaqoji heyətin – direktorların və müəllimlərin qəbulu və yerdəyişməsi, o cümlədən müəllimlərin sertifikasiyasını Elm və Təhsil Nazirliyi yanında Məktəbəqədər və Ümumi Təhsil üzrə Dövlət Agentliyi həyata keçirəcək.
Bu barədə agentliyin direktoru Eşqi Bağırov media nümayəndələrinə açıqlamasında bildirib. Qeyd edib ki, Məktəbəqədər və Ümumi Təhsil üzrə Dövlət Agentliyi müvafiq sahələrdə Elm və Təhsil Nazirliyinin əsas icra strukturu kimi fəaliyyət göstərəcək: “Nazirliyin bir sıra icra funksiyaları əks-mərkəzləşdirmə prinsipinə uyğun olaraq, bəlli qaydada agentliyə ötürüləcək. Məsələn, məktəbəqədər təhsil müəssisələri, ümumtəhsil müəssisələri, uşaq gənclər inkişaf mərkəzləri, internat tipli müəssisələrin əlaqələndirilməsi, idarə olunması və təhsilin dövlət standartlarına uyğun təşkilinə nəzarəti agentlik olaraq biz həyata keçirəcəyik. Vətəndaş müraciətlərinin araşdırılması və baxılması da agentliyin işidir. Həmçinin uşaqların və şagirdlərin təhsil müəssisələrinə qəbulu və yerdəyişməsi, təhsilin və təlim-tərbiyə prosesinin keyfiyyətinə dövlət nəzarəti bizim vəzifəmizdir. Bağça və ümumtəhsil məktəblərinə inzibati və pedaqoji heyətin – direktorların və müəllimlərin qəbulu və yerdəyişməsi, o cümlədən müəllimlərin sertifikasiyası da bundan sonra agentliyin fəaliyyət dairəsinə daxildir”.
Maraqlıdır, tətbiq olunacaq yenilik məktəb və bağçalarda nələrin dəyişməsinə səbəb ola bilər?
“İndi mərkəzləşmiş imtahan olacaq, bununla da biz daha savadlı, daha bacarıqlı şəxslərin təhsil sistemində işə qəbulunu müşahidə edə biləcəyik"
Təhsil eksperti Kamran Əsədov “Bakı-Xəbər”ə açıqlamasında qeyd etdi ki, Elm və Təhsil Nazirliyi 2009-cu ildən etibarən məktəblərdə işə qəbulu həyata keçirir. Artıq iki ildən çoxdur ki, məktəbəqədər təhsil müəssisələrinə də işə qəbul prosesini adıçəkilən qurum həyata keçirir: "Bu prosesi artıq Elm və Təhsil Nazirliyi yanında Məktəbəqədər və Ümumi Təhsil üzrə Dövlət Agentliyi həyata keçirəcək. Yenilik strukturdan ibarətdir. Buna qədər Elm və Təhsil Nazirliyinin şöbələri bu işi həyata keçirirdi. Bu sahədə imtahanı həyata keçirəcək yeni quruma ehtiyac var idi".
Ekspert hesab edir ki, imtahanlarda şəffaflığın təmin edilməsi vacibdir. Bu sahədə kənar müdaxilələr olmamalıdır. Son 3 il ərzində keçirilən imtahanların təkmilləşdirildiyi müşahidə olunur. Məlumdur ki, Elm və Təhsil Nazirliyi imtahana qədər proqramları təqdim edirdi. Ancaq indi mərkəzləşmiş imtahan olacaq. Bununla da biz daha savadlı, daha bacarıqlı şəxslərin təhsil sistemində işə qəbulunu müşahidə edə biləcəyik".
Günel CƏLİLOVA
