Ermənistan dövləti ləğv olunur - Kremldən xəbərdarlıq gəldi...
Ermənistan xarici siyasətini kökündən dəyişmək niyyətində olduğunu nümayiş etdirir. Bunu Rusiya Xarici İşlər Nazirliyinin rəsmisi Mariya Zaxarova Ermənistan Təhlükəsizlik Şurasının katibi Armen Qriqoryanın İrəvanın siyasi vektorunu dəyişmədiyi, yalnız təhlükəsizliyini şaxələndirdiyi ilə bağlı açıqlamasına cavabında deyib.
Mariya Zaxarova erməni tərəfinin açıqlamasının yalan olduğunu vurğulayıb: “Bu, həqiqi niyyətləri gizlətmək üçün açıq-aşkar cəhddir. Aydındır ki, söhbət Ermənistanın xarici siyasətdə oriyentasiyasında köklü dəyişiklikdən gedir. Məncə bu, Qərbin təklifi və ya təlqini ilə çox açıq şəkildə edilir”.
Bütün bunlar bir daha təsdiq edir ki, Rusiya ilə Ermənistan arasında münasibətlər getdikcə gərginləşir. Burada onu da xatırladaq ki, baş nazir Nikol Paşinyanın ardından ölkənin müdafiə naziri Suren Papikyan və xarici işlər naziri Ararat Mirzoyan da Kollektiv Təhlükəsizlik Müqaviləsi Təşkilatının (KTMT) Minskdə keçirilən iclasında iştirakdan imtina edib. Bundan başqa, Ermənistan parlamentinin spikeri Alen Simonyan təşkilatın dekabrda keçiriləcək tədbirinə qatılmayacaq. “Qraparak” nəşri yazır ki, Ermənistan və KTMT-nin yolları artıq ayrılıb: ”Paşinyan xarici siyasəti manipulyasiya obyektinə çevirib. Onun təzahürlərindən biri də Ermənistanın KTMT tədbirlərində iştirakı məsələsidir”. Paşinyanın demokratiya vədi ilə hakimiyyətə gəlib diktatura qurduğunu bildirən nəşr qeyd edib ki, Nikol KTMT-nin hərbi təlimlərində iştirakdan imtina edir, Ermənistanla bağlı qərarların qəbuluna mane olur: “O, Minskdə baş nazir, xarici işlər və müdafiə nazirləri səviyyəsində keçirilən sammitdə iştirakdan imtina etdi. Eyni zamanda o, KTMT-dən çıxmaq niyyətində olmadığını açıqlayır. Bu nədir, ironiya deyil? Təbii ki, bu, Ermənistanı mövcud təhlükəsizlik sistemindən çıxarmağa yönəlib. Amma problem ondadır ki, o, KTMT-ni nə ilə əvəz edəcəyini bilmir”. Məqalədə bildirilib ki, Ermənistan Rusiyadan imtina edərək Qərb silahları alır: “Rusiya-Ukrayna müharibəsi zamanı Rusiyanın zenit müdafiə sistemi özünü ən yaxşı şəkildə göstərdi. Nikol isə fransız silahı alır. Söhbət MG-200-dən gedir. Bu, cəmi üç kompleksdir. Bu, əlbəttə ki, daha keyfiyyətli rus analoqundan daha bahalıdır. Məqsəd silah deyil, Qərbə qoşulmaqla bizi Rusiya təhlükəsizlik sistemindən tədricən “azad etmək”dir. Ancaq Qərbin təhlükəsizlik sistemi NATO-dur, burada isə bizi qətiyyən gözləmirlər. İnanmırsınızsa, Gürcüstan, Moldova və ya Ukrayna nümunələrinə nəzər salın. Ermənistan rəhbərliyinin KTMT-nin Ermənistanı müdafiə etmədiyi ilə bağlı sözləri manipulyasiyadır. Moskva Rusiya Baş Qərargahının xəritələri əsasında demarkasiyanı, bundan sonra KTMT missiyasını yerləşdirməyi təklif etdi. Lakin bunun ardınca Nikolun növbəti manipulyasiyası baş verdi. Nikol və komandası “KTMT sərhədimizi tanımırsa, missiyası harda dayanacaq” tipində təbliğata başladılar. Halbuki, KTMT missiyası sərhədlərin yerini bilmirsə, Müdafiə Nazirliyinin rəsmiləri onları müşayiət edə bilərdilər - necə ki, avropalı müşahidəçilərlə bunu etdilər. KTMT missiyasının ardınca isə Avropanın nəzərdə tutmadığı daha ciddi müdafiə dəstəyi gələcəkdi. Çünki silahsız avropalı müşahidəçiləri silahlılarla əvəz etsələr belə, onlar çətin ki, Ermənistana görə azərbaycanlılara qarşı vuruşsun”.
Baş verənləri şərh edən rusiyalı hərbi ekspert Yevgeni Mixaylov hesab edir ki, Ermənistan bu addımla Rusiya ilə müttəfiqlik münasibətlərinə son qoymaq istəyir: “Rusiya və Ermənistan arasında münasibətlərin bu həddə çatmasına mən təəccüblənmirəm. Paşinyanın hakimiyyətə gəlməsi ilə ölkə Qərbyönlü olduğunu ortaya qoymuş oldu. İrəvanın Kollektiv Təhlükəsizlik Müqaviləsi Təşkilatının sessiyalarında iştirakdan imtina etməsində də təəccüblü bir hal yoxdur. Bu hərəkətlərin arxasında bir məqsəd dayanır: Ermənistanın Rusiya ilə müttəfiqlik münasibətlərinə son qoymaq. Bildirirlər ki, hərbi əməliyyatlar zamanı KTMT Ermənistana köməklik etmədi. Niyə köməklik etməlidir? Azərbaycan Ermənistan ərazisinə, dinc insanlara hücum etməyib axı. Bütün günahlar Ermənistanın özündədir, Qarabağı Azərbaycanın ərazisi olaraq qəbul etmirdi. Hakimiyyət düzgün siyasət yürütmürdü, öncə etməli olduğunu sonda etdi”. Ekspert “Baku TV”yə bildirib ki, KTMT ancaq və ancaq Ermənistanı qorumaq üçün yaranmayıb: “Mən düşünürəm ki, vəziyyət daha da gərginləşəcək. Çünki Qərb ölkələri Ermənistan üzərində güclərini göstərməkdə davam edirlər. İrəvan bu yolla bank hesablarını doldurur, vəziyyətdən narahat deyil. Bütün bunlara baxmayaraq, düşünürəm ki, Ermənistan cəmiyyəti hakimiyyətin davranışlarına son qoymaq gücünə qadirdir. İnsanlar birləşərək rəhbərliyə kimin dost, kimin əsl düşmən olduğunu göstərə biləcəklər. Əgər bunlar baş verərsə, nəticədə Nikol Paşinyan və ətrafı uduzacaq”. Rusiya Dövlət Dumasının Təhsil komitəsinin üzvü Anatoli Vasserman isə qeyd edir ki, bu gedişlə Ermənistan dövlətçiliyinin yoxa çıxması istisna edilmir: “Bizə dünya tarixindən məlumdur ki, belə hallar olur”. Rusiya Xarici İşlər Nazirliyinin sözçüsü Mariya Zaxarova isə qeyd edir ki, İrəvanın Qərbə kor-koranə ümid etməsi iflasa uğradı. O bildirib ki, bu, göz qabağındadır: “Bunu görməmək mümkün deyil. Sülh müqaviləsi ilə bağlı danışıqlara dair mövcud duruma baxanda da bunu görmək olar. Proses hələ də dondurulub”. .Zaxarova deyib ki, Fransanın “Bastion” zirehli texnikasının Ermənistana tədarükü də bunu göstərir: “Bu texnikalar Ukraynada real döyüş şəraitində çox aşağı effektivlik nümayiş etdirib”. Onun sözlərinə görə, Fransa Ermənistana likvid olmayan və digər ölkələrə sırıya bilmədiyi bir texnikanı satıb: “Bu alınan texnikanın Ermənistan ərazisinin suverenliyini necə qoruyacağı qaranlıq olaraq qalır”.
Samirə SƏFƏROVA
