Slovakiya şirkətləri də Azərbaycanda yaşıl enerji sektoruna yatırım etməyə başlayır...
![Image](/uploads/posts/2024-06/azer-slovak.webp)
Elçin Bayramlı: “Su elektrik stansiyalarının sayı artırılmalıdır”
“Hidroenergetika layihələrinin həyata keçirilməsində təcrübəsi olan Slovakiya şirkətləri Azərbaycanda kiçik su elektrik stansiyalarına sərmayə qoya və inkişaf etdirə bilərlər”. Bunu slovakiyalı ekspert Cozef Hrabina deyib.
O bildirib ki, bu, Azərbaycanda kiçik su elektrik stansiyalarının inkişafı hesabına bərpaolunan enerji mənbələrinin potensialının və elektrik enerjisi istehsalı üçün yerli su ehtiyatlarından istifadə etməklə enerji müstəqilliyinin artırılmasına, kənd və ucqar ərazilərin etibarlı və dayanıqlı elektrik enerjisi ilə təminatına kömək edə bilər.
Görəsən, Slovakiya şirkətlərinin Azərbaycanda su elektrik stansiyalarına sərmayə qoyması bu sahənin inkişafına necə təsir edəcək? Su təminatı ilə bağlı problem həll olucaqmı?
“Su toplanması və elektrik enerjisi istehsalında bərpa olunan enerjinin payını artırmaq üçün kiçik çayların üzərində su elektrik stansiyaların tikilməsi vacibdir”`
Sağlam Cəmiyyət Hərəkatının rəhbəri Elçin Bayramlı “Bakı-Xəbər”ə açıqlamasında bildirdi ki, Azərbaycanın su ehtiyatı elə də çox deyil. Məlumdur ki, su ehtiyyatlarının 70 faizi ölkə sərhədlərində formalaşıb. Bu da istər-istəməz su təminatına öz təsirini göstərir: “Buna görə də su toplanması və elektrik enerjisi istehsalında bərpa olunan enerjinin payını artırmaq üçün kiçik çayların üzərində su elektrik stansiyaların tikilməsi vacibdir. Bununla bağlı Prezident İlham Əliyevin tapşırığı əsasında proqram da qəbul olunub. Həmin proqramla bağlı müəyyən işlər görülür. Yaxşı olar ki, bu işlər çoxalsın”.
Ekspert hesab edir ki, bu kimi layihələrin icrası ilə bağlı xarici investisiyalara ehtiyac yoxdur: “Nəzərə almaq lazımdır ki, Azərbaycanın kifayət qədər maliyyə vəsaiti var ki, işləri öz vəsaitimizlə edə bilərik. Strateji rezervlərin bir hissəsi ölkə iqtisadiyyatına yatırılsa gəlir daha yüksək olar. Bundan əlavə, ölkə iqtisadiyyatının və energetikanın inkişafına səbəb olar. Bu səbəbdən də hesab edirəm ki, su elektrik stansiyalarının sayı artırılmalıdır”.
Günel CƏLİLOVA