Paşinyanın Makrondan yararsız texnika alması İrəvanda niyə sakit qarşılandı...
İbrahim Rüstəmli: “Hazırda erməni ordusunun vəziyyəti o qədər pisdir ki, Ermənistan müxalifətinin buna etiraz etməyə arqumenti də yoxdur”
Fransa İrəvana qeyri-likvid hərbi texnika satıb. Bunu keçirdiyi brifinq zamanı Rusiya Xarici İşlər Nazirliyinin rəsmi nümayəndəsi Mariya Zaxarova Fransanın “Bastion” zirehli maşınlarının Ermənistana göndərilməsini şərh edərkən deyib.
M.Zaxarovanın sözlərinə görə, Paris həmin texnikanı başqa istiqamətlərdə sata bilmədiyi üçün İrəvana göndərib.
XİN sözçüsü qeyd edib ki, Ermənistana həmin texnikanın tədarük edilməsinin ölkənin təhlükəsizliyinin təmin olunmasına fayda verəcəyi ilə bağlı arqumentlər səsləndirmək sadəlövh görünür: “Həmin zirehli texnika real döyüş şəraitində çox aşağı effektivlik nümayiş etdirib”.
Ortada belə ciddi faktlar olduğu halda, niyə Ermənistanın müxalif dairələri və ictimaiyyəti bununla bağlı Paşinyan hökümətinə kəskin etiraz etmir?
Hərbi-siyasi şərhçi, ehtiyatda olan polkovnik-leytenant İbrahim Rüstəmli “Bakı-Xəbər”ə açıqlamasında bildirdi ki, Fransa-Ermənistan münasibətlərində vəziyyət belədir: “Fransanın Ermənistana etdiyi canfəşanlıq, Rusiya rəsmisi Mariya Zaxarovanın dediyinə görə, artıq Azərbaycanın zəhləsini töküb. Yəni Makronun Paşinyandan daha çox erməni kimi görünməsi gülüş doğurur, kənardan eybəcər görünür. Fransa müstəmləkə dövlətlərindən, Cənubi Afrikadan çox sürətlə çıxarılır, onlara qarşı böyük nifrət var və Fransanın beynəlxaq aləmdə olan imici də məhv olub. Fransa dünyanın ən zəif yerlərindən birini axtarır. Bu yerlərdən biri kimi də Ermənistanı görür. Ermənistan da marionetka dövlətdir, vahid dövlət dili yoxdur. Onun dövlət dili bir zamanlar rus dili, bir zamanlar fars dili olub. İndi də “dövlət dili” Fransadır. Ermənistan Fransa dövlət dili ilə danışır və Fransa tərəfindən oyuncaq kimi oynadılması da təəccüblü deyil. Çünki Fransa dünyada, müstəmləkələri tərəfindən sıxışdırılmış bir dövlətdir. Belə bir məqamda da Ermənistanı ən münbit poliqon kimi görür. Birmənalı şəkildə Fransanın Ermənistan üçün etdiklərinin heç biri bu dövlətin möhkəmlənməsi üçün nəzərdə tutulmayıb. Bunların hamısı Fransanın öz şəxsi maraqları üçün nəzərdə tutulub. Onu da deyim ki, bu proses bir zamanlar Rusiyanın Ermənistana göstərdiyi “dostluq“ münasibətində özünü göstərmişdi. Ermənistana 1 milyard dollarlıq texnika havayı verilmişdi. Bu da Azərbaycan tərəfindən ciddi narazılıqla qarşılanmışdı. 44 günlük müharibə ərəfəsində bu texnikaların heç birinin döyüşə yararlı olmadığını gördük. Bu savaşdan sonra Ermənistan ordusunun infrastrukturu məhv olub. Bu 44 gün bəs etdi ki, Azərbaycan erməni silahlı qüvvələrini darmadağın etsin. Ermənistan ordusu indi iflic vəziyyətindədir. Bu vəziyyətdə Fransanın bir zamanlar Ukraynanın imtina etdiyi silahları ora göndərməsi ilk növbədə onun göstəricisidir ki, Fransa öz texnikalarını soxuşdurmağa yer axtarır və Ermənistanın ordu strukturu o qədər bərbad vəziyyətdədir ki, Fransanın göndərdikləri ilə qane olmaqdan başqa çarəsi yoxdur. Hazırda erməni ordusunun vəziyyəti o qədər pisdir ki, Ermənistan müxalifətinin buna etiraz etməyə arqumenti də yoxdur. Artıq Paşinyandan tutmuş bütün ermənilər şok vəziyyətindədir. Biz Azərbaycanın ərazi bütövlüyünü bərpa etməyə çalışırdıq, etdik də. Onlar heç vaxt inanmazdılar ki, biz tək Şuşanı yox, Xankəndini də azad edəcəyik. Artıq Azərbaycanın dövlət bayrağı Xankəndidə, Ağdərədə dalğalanır. Bunlar hamısı çox böyük bir strategiyanın, taktikanın nəticəsidir. Biz artıq döyüş əməliyyatı aparmağa ehtiyac duymuruq. Belə bir vəziyyətdə Fransanın töküntüləri Cənubi Qafqazda onun möhkəmlənməsinə xidmət edir. Fransa Cənubi Qafqazda məskən salmaq istəyir. Ancaq bu nə Rusiyanın, nə İranın, nə də Azərbaycanın maraqlarına daxildir. Bizim ərazimizə Fransa heç vaxt gələ bilməz. Bizdən qabaq dq bundan narahat olanlar var. Ona görə də, Mariya Zaxarova bildirir ki, Fransa öz hərəkətləri ilə Azərbaycanın lap zəhləsini töküb. Dövlət rəhbərinin ən yaxın ətrafının Fransa haqqında dediklərinə fikir verin. Onlar əslində çox haqlıdırlar. Azərbaycanın artıq səbri tükənə, buna adekvat addımlar atmağa məcbur qala bilər. Belə bir vəziyyətdə erməni müxalifəti buna etiraz etmədi. Fransanın Paşinyanı dəstəkləməsi ordakı müxalifətin səsini az da olsa boğur. Ancaq demək istəyirəm ki, Makron da əlini Paşinyanın üstündən çəksə, Paşinyanı orda asacaqlar. Amma heç bir şeyə nail ola bilməyəcək bu qüvvələr. Çünki Azərbaycan beynəlxalq hüquqa söykənir, öz silahlı qüvvələrini hər gün daha da gücləndirir”.
Məhəmmədəli QƏRİBLİ
