Xətaidə 60 köçkünün yaşadığı bina hər an uça bilər...
Bakının Xətai rayonu, Neapol dairəsi 24 ünvanında yaşayan məcburi köçkünlər binanın hər an uçacağından narahatdır. Məlumat üçün bildirək ki, 60-dan çox məcburi köçkünün yaşadığı bina qəzalı binalar siyahısına salınıb.
Ancaq buna baxmayaraq, sakinlər indiyədək buradan köçürülməyibl. Sakinlər qeyd edir ki, divarlar tökülüb, tavan çöküb. Yağış isə evin içinə dolur.
Xətai rayon Mənzil Kommunal Təsərrüfat Birliyi - Sahib Babayev: “Bina istismara yararsız binalar siyahısına salınıb”
Məsələ ilə bağlı Xətai rayon Mənzil Kommunal Təsərrüfat Birliyindən Sahib Babayev bildirdi ki, binanın tikintisinə 1992-ci ildə başlanılıb və sonradan yarımçıq qalıb. Məcburi köçkünlər də həmin yarımçıq binada məskunlaşıb: “Bina heç bir qurumun balansına verilməyib. Adıçəkilən bina istismara yararsız binalar siyahısına salınıb”.
Kamran Məmmədli: “Bakıda yerləşən yataqxanaların əksəriyyəti o qədər qəzalı vəziyyətdədir ki, hər hansı partlayış və zəlzələ nəticəsində…”
Iqtisadçı Kamran Məmmədli qeyd etdi ki, yataqxanalar sovet dövründə inşa olunduğundan, çoxu istimar müddətini başa vurub. Bəziləri isə qəzalı vəziyyətdədir: "Bakı və digər rayonlarda sovet dövründən qalmış yataqxanalar var. Bunların bəziləri tələbə yataqxanaları, bəziləri isə zavod və müəssisələrin nəzdində olan yataqxanalardır. Hər hansı dövlət balansında olan inzibati binanın sökülməsi üçün həmin qurumun rəyi olmalıdır. Bu gün məcburi köçkünlərin tərk etdiyi yataqxanaların çoxu qəzalı şəraitdədir. Ümumiyyətlə, Bakıda yerləşən yataqxanaların əksəriyyəti o qədər qəzalı vəziyyətdədir ki, hər hansı partlayış və zəlzələ nəticəsində o binalar uça, dağıla bilər. Ona görə də ilk növbədə qəzalı yataqxanalar sökülməlidir".
Ekspert onu da əlavə etdi ki, məcburi köçkünlərin öz yurdlarına geri qayıdışına start verilib. Zamanla Xətai rayonunda olan məcburi köçkünlər də dogma vətənlərinə köçər, o zaman onların ev problem həll olunar: “Onu da deyim ki, hazırda məcburi köçkünlərin mənzil şəraitinin yaxşılaşdırılması ilə bağlı iş görülmür. Yalnız işğaldan azad olunan ərazilərdə bərpa olunan yerlərə məcburi köçkünlər geri dönür”.
Əli TURABOV
