İtaliyadan Makronun Ukraynaya qoşun yeridilməsi təklifinə sərt etiraz – Bu III Dünya Müharibəsi deməkdir...
Fransa prezidenti Makron Ukraynaya qoşun yeridəcəyini açıqlaması NATO-da da ciddi etirazla qarşılanıb. Makron təklifinə münasibət bildirən İtaliyanın baş nazirinin müavini və xarici işlər naziri Antonio Tajani deyib ki, NATO Ukraynaya girməməlidir.
“Ümid edirəm ki, belə bir şey olmaz. Oraya gedib Rusiya ilə müharibə etmək III Dünya Müharibəsi risqi deməkdir" – nazir bildirib.
Rusiya ilə müharibə etmədiklərini vurğulayan Tajani deyib ki, beynəlxalq hüququ və Ukraynanın azadlığını müdafiə edirik: “Lakin Rusiya ilə müharibəyə girmirik. Kiyevə hər cür hərbi, iqtisadi və texniki vasitələr veririk, amma müharibəyə qoşulmaq mənə səhv kimi görünür və italyanlar bunu istəmirlər”.
İtaliyanın Ukraynaya əsgər göndərməsinin müzakirə mövzusu olmadığını deyən Tajani, İtaliya ordusunun Qırmızı dəniz, Livan, İraq və Afrikada ticarət gəmilərinin qorunmasında yaxşı iş gördüyünü və sülhün daşıyıcısı olduğunu qeyd edib.
Roma Papası Fransiskin də sözlərinə toxunan Tajani, Papanın sözlərinin təhrif edildiyini və əslində sülh istədiyini və bunun üçün tərəfləri masa arxasında oturmağa çağırdığını deyib. Roma Papası Fransisk Ukrayna ilə bağlı “İnanıram ki, vəziyyəti görən, öz xalqını düşünən, ağ bayraq qaldırıb danışıqlar aparmağa cəsarəti olan daha güclüdür” deyib.
TAHİR
