Roma Papası yenə ədalətsizlik etdi - 100 min ermənini gördü, 300 min azərbaycanlını...
Qasım Hacıyev: “O, 300 minə yaxın Qərbi azərbaycanlının taleyindən də danışsaydı bu obyektiv yanaşma olardı, amma təəssüf ki, yenə də tərəf tutdu”
Roma Papası Fransisk yanvarın 8-də Vatikanda akkreditə olunmuş diplomatları qəbul edərkən çıxışında “Arsax” ermənilərinin “öz vətənlərinə” “qanuni və təhlükəsiz” qayıtması məsələsini aktual hesab etdiyini deyib.
Armenpress-in Vatican News-a istinadən verdiyi məlumata görə, bu dəfə Papanın ənənəvi çıxışının mərkəzində sülh dayanıb. “Hörmətli səfirlər, iki böyük xristian bayramı münasibəti ilə xüsusi rezonans doğuran bir söz var... Bu, “sülh” sözüdür”, - Papa Fransisk çıxışında qeyd edib.
Roma Papası münaqişəli dövlətlərə müraciət edərək, müharibəni mənasız qırğın adlandırıb. O, həmçinin, Ermənistan və Azərbaycan arasındakı gərgin vəziyyətdən narahatlığını bildirib.
İlk dəfə deyil ki, Papa Fransisk mövcud olmayan "Arsax” ermənilərinin “vətənlərinə qanuni və təhlükəsiz qayıtması məsələsini” qaldırır. Bu da, təbii ki, Papanın ifrat ermənipərəstliyindən irəli gəlir, o hər an bunu büruzə verib. Qarabağdan könüllü köçüb gedən ermənilərin sayı 100 mindən də az olsa da, Papa həmişə şişirdilmiş rəqmlərdən istifadə edir. O, 100 min erməninin qeydinə qalıb onların təəssübünü çəkə bilir, amma 1988-ci ildə indiki Ermənistandan zorla deportasiya edilən, öz yurd-yuvasından didərgin salınan 300 minə yaxın Qərbi azərbaycanlının adlarını belə çəkmir və bəyan etmir ki, azərbaycanlıların da tarixi vətənlərinə qayıdış məsələsi aktualdır, onların bu hüquqları Ermənistan tərəfindən təmin edilməlidir. Bu barədə bircə kəlmə də olsun danışmır, halbuki, adını dini lider qoyan bir şəxs bütün xalqlara və dinlərə eyni gözlə baxmalıdır.
“Roma Papasının ermənilər haqda dediyi fikirlər kökündən yanlışdır və çox ədalətsiz yanaşmadır”
AMEA-nın Qafqazşünaslıq İnstitutunun Qafqazşünaslıq şöbəsinin müdiri, professor Qasım Hacıyev “Bakı-Xəbər”ə şərhində bildirdi ki, Roma Papası hər zaman erməni tərəfkeşliyi edib. “Roma Papası da, erməni dini rəhbəri də hər zaman cəmiyyətə və dövlətə təsir etmək gücü nümayiş etdirir. Ermənilərin özbaşna hərəkətləri, xalqımıza qarşı cinayətlərinin miqyasının genişliyi də onların bəzi xristian dini liderlərdən güc alması ilə bağlıdır. Roma Papasının Qarabağdan könüllü köçüb gedən ermənilərin geriqayıdış hüququnu aktual hesab etməsinin kökündə onun ifrat erməni təəssübkeşliyi dayanır. Ermənilər azərbaycanlıların başına müsibətlər gətirəndə, Ermənistan torpaqlarımızı işğal edəndə, Qərbi azərbaycanlılar zorla öz tarixi torpaqlarından qovulanda Vatikanın səsi çıxmadı. Onda onlar harada yatmışdılar, ədalət hissləri harada idi? İndi Papa durub haqdan-ədalətdən, ermənilərin hüquqlarından danışır. Papa Azərbaycan xalqına qarşı cinayətlər törədən, ərazimizi separatizm yuvasına çevirən ermənilərin haqqının “təmin olunmasından” danışırsa, bəs nə üçün Ermənistanın təcüvüzü nəticəsində Azərbaycanın 61 rayonuna, şəhərlərinə səpələnən azərbaycanlıların adlarını çəkmir? Qərbi Azərbaycandan qovulan, öldürülən, şikəst edilən azərbaycanlıların hüquqlarını Papa kimi dini lider müdafiə etmirsə, bu bizdə təəssüf yaradır. Roma Papasının çıxışından açıq görsənir ki, o öz dindaşlarını müdafiə edir və ciddi ayrı-seçkiliyə yol verir. Belə olmaz”-deyə bildirən Q.Hacıyevin sözlərinə görə, Papa ermənilərə, Ermənistana çağırışlar etməlidir ki, separatizmdən, revanşizmdən, təcavüzkar siyasətdən əl çəksinlər, Qərbi azərbaycanlıların təhlükəsiz şəkildə geri qayıdəşını təmin etsinlər. “Roma Papasının ermənilər haqda dediyi fikirlər kökündən yanlışdır və çox ədalətsiz yanaşmadır. Ona görə də, onun yadına salmaq lazımdır ki, danışanda təkcə xristianlığı yox, həmişə insanlığı nəzərə alsın. O, 300 minə yaxın Qərbi azərbaycanlının taleyindən də danışsaydı bu obyektiv yanaşma olardı, amma təəssüf ki, yenə də tərəf tutdu”-deyə Q.Hacıyev əlavə etdi.
İradə SARIYEVA
