Sentyabrda antiterror keçirilməsəydi, separatizmin kökünü 10 ilə də kəsmək olmazdı - faktlara baxın...
İbrahim Rüstəmli: “Antiterror əməliyyatı keçirilməsəydi Azərbaycan çox ciddi problemlərlə üzləşəcəkdi”
Azərbaycan ordusu bir il əvvəl həyata keçirdiyi lokal antiterror tədbirləri ilə Qarabağda separatçıların kökünü kəsdi, separatçıların qanlı yuvasını dağıtdı, terrorçuları zərəsizləşdirdi.
2023-cü ilin 19-20 sentyabrında həyata keçirilən antiterror əməliyyatlarının məntiqi nəticəsi ərazilərimizdə suverenliyimizin bərpası oldu. Azərbaycan bununla həm hərbi, həm də siyasi, diplomatik cəhətdən növbəti qələbəyə imza atdı.
Müdafiə Nazirliyi bir il bundan əvvəl antiterror əməliyyatının keçirilməsinə zərurət yaradan səbəblərin daha bir neçəsi açıqlayıb.
Bildirilib ki, Qarabağ iqtisadi rayonunda Ermənistan silahlı qüvvələrinin qalıqlarına məxsus Yer-Hava raket sistemləri üçün 12 HHM vasitəsi, 30-dək radioelektron mübarizə vasitəsi və 6 radiolokasiya sistemi aşkar edilmişdi.
Bundan başqa, 17 silah-sursat və yanacaq anbarı, 70-dən artıq polimer tipli yeraltı sığınacaq, 45 daimi dislokasiya və komanda məntəqəsi, 11111 təlim və tədris mərkəzi aşkar edilmişdi.
Qeyd edək ki, dünən açıqlanan səbəblərə əsasən, Qarabağ iqtisadi rayonunda Ermənistan silahlı qüvvələrinin qalıqlarına məxsus 500-dən artıq döyüş mövqeyinin hazırlandığı müəyyən edilmişdi.
Müxtəlif tipli artilleriya qurğuları üçün 350-dən artıq atəş mövqeyin hazırlandığı aşkarlanmışdı.
Təmas xəttinin 2 km genişliyində 100 km-ə yaxın ərazilərdə minalar basdırılmışdı.
480 km-dək təmas xətti boyu bölmələrimizin və mülki sakinlərimizin hərəkətini izləmək məqsədilə 200-dən artıq müşahidə kamerası quraşdırılmışdı.
Bu məlumatdan açıq görsənir ki, 2019-cu ilin sentyabrına qədər ermənilər Xankəndi ətrafında, onların nəzarətində qalan yerlərdə nələr yaradıblarmış. Yüzlərlə atəş nöqtəsi, yüzlərlə təlim məntəqələri, yüzlərlə döyüş sahələri, atəş sahələri, silah-sursat anbarları yaradıbmışlar, eyni zamanda minlərlə əlavə minalar basdırıbmışlar, yeraltı sığınacaqlar qurubmuşlar, radiolokasiya sistemləri yaradıbmışlar, radiodivdrsiya sistemləri, raket hücum sistemləri yerləşdiriblərmiş.
Əlbəttə, əgər antiterror tədbirləri ilə bunlar məhv edilməsəydi və ermənilər bu prosesi axıra qədər çatdıra bilsəydi Azərbaycan dövlətinin işini nə qədər çətinə sala bilərdilər. Sentyabrda antiterror əməliyyatı keçirilməsəydi, separatizmin kökünü 10 ilə də kəsmək mümkün olmazdı.
“Azərbaycanın antiterror əməliyyatı keçirməsi zamanında və yerində görülmüş tədbirlərin biri və bəlkə də birincisi idi”
Hərbi ekspert İbrahim Rüstəmli “Bakı-Xəbər”ə bildirdi ki, bu olduqca ciddi bir məsələdir. “Azərbaycanın antiterror əməliyyatı keçirməsi zamanında və yerində görülmüş tədbirlərin biri və bəlkə də birincisi idi. Bilirsiz ki, Ermənistanla Azərbaycan arasındakı sərhəd zolağında Avropa İtifaqının orada 50-yə yaxın hərbi müşahidəçisi, əslində isə Avropanın casusu dolaşır. Bunların hamısı xüsusi xidmət orqanının əməkdaşları idilər. Eyni zamanda antiterror əməliyyatının gerçəkləşməsinə səbəb olan çox ciddi həyəcan siqnalları mövcud idi. Bizə çox ciddi problemlər yarada biləcək məsələlər barədə məlumatlar alırdıq. Bura, xüsusilə Fransanın təxminən 500 nəfərdən ibarət sülhməramlı qüvvələrinin yerləşdirilməsi ilə bağlı məsələlər daxil idi. Fransa əslində bizim ərazilərimizə burnunu soxmaq istəyirdi. Əlbəttə, belə olduqda biz çox ciddi problemlər yaşayacaqdıq. Orda hazırlanan quldur dəstələrinin, fəaliyyət göstərən separatçıların, terrorçuların, revanşistlərin, eyni zamanda qurulan istehkam qurğuları, yaradılan silah anbarları, o anbarların silahla təminatı və sair faktlar vardı. Bunların da arxasında Avropanın və Qərbin bir sıra dövlətləri, o cümlədən də bu gün Ermənistanda müəyyən hərbi təlimlər keçirən və yaxınlıqları ilə yada qalan ABŞ-da vardı. Əlbəttə, burada baş aktor rolunu Fransa oynayırdı. Azərbaycanın antiterror əməliyyatı qabaqlayıcı bir tədbir idi, son dərəcə zərgər dəqiqliyi ilə hazırlanmışdı. Təsəvvür edin, 23 saatdan bir az artıq davam edən antiterror əməliyyatı zamanı orda yaşayan mülkü ermənilərin heç bir nəfərinin də burnu qanamamışdı. Yəni Azərbaycan bu antiterror əməliyyatını o qədər doğru, o qədər mükəmməl, o qədər yüksək səviyyədə zərgər dəqiqliyi ilə hazırlamışdı ki, burda digər güclərin, xüsusilə də Azərbaycana qarşı olan qüvvələrin hər hansı bəyanatı üçün bir yer qalmamışdı. Bu o qədər mükəmməl hazırlanmış əməliyyat idi ki, bu əməliyyat zamanı yalnız separatçı, revanşist, terrorçu ermənilərə məxsus istehkamlar, eyni zamanda istehkamlarda dayanan, o müdafiə qurğularının şəxsi heyəti, silah anbarları və sair məhv edildi. Əlbəttə, antiterror əməliyyatı keçirilməsəydi Azərbaycan çox ciddi problemlərlə üzləşəcəkdi. Bu problemin də arxasında bu gün müxtəlif hərbi nəqliyyat vasitələri ilə Ermənistana silah daşıyan, canlı qüvvə göndərən ABŞ, Ermənistanın təəssübünü çəkən Fransa hökuməti və sair gəlib orda məskən salacaqdılar. Biz antiterror əməliyyatını həyata keçirməklə bu cür yabançı qüvvələrin o zaman işğal altında olan ərazilərimizə daxil olmasına imkan vermədik. Ona görə də Azərbaycan Prezidenti dəfələrlə bu xüsusda ayrıca vurğulayıb, xüsusi notla məlumat verib ki, Qarabağ probelminin həllində Azərbaycan hər hansı bir üçüncü, yaxud yabançı dövlətlərin köməyinə ehtiyac duymur, Qarabağ məsələsi Azərbaycanın daxili problemidir və Azərbaycan o problemləri öz daxili resursları hesabına aradan qaldırmaq üçünb bütün imkanlara sahibdir”.
İ.Rüstəmlinin sözlərinə görə, bu antiterror tədbirləri Fransanın, Amerikanın bəzi hərbi kontingentinin ya müşahidə missiyasında, ya da sülhməramlı qismində Azərbaycan ərazisinə, konkert olaraq həmin dövrdə ermənilərin kompakt yaşadığı Xankəndi şəhərinə daxil olmaq niyyətinin qarşısını birdəfəlik aldı. O hesab edir ki, bu ölkələrin hərbi kontingenti ayrı-ayrı missiyalar şəklində Qarabağa daxil olsaydılar, bu bizim üçün çox ciddi problemlər yaradacaqdı. “Ona görə də Azərbaycanın antiterror əməliyyatını dövlətimizin hərb tarixində həyata keçirilmiş ən mükəmməl əməliyyatlardan biri kimi dəyərləndirirəm. Burada Azərbaycan hərbi qulluqçularının göstərdiyi xüsusi rəşadəti, qəhrəmanlığı və verilən tapşırığı son dərəcədə yüksək səviyyədə yerinə yetirməsi də öndə dayanan amillərdən biri və bəlkə də birincisi idi. Onlar dövlətimizin, Ali Baş Komandanın etimadını doğrultdular və verilən tapşırığı zərgər dəqiqliyi ilə həyata keçirdilər. Bunun da ən böyük əhəmiyyəti ondan ibarət idi ki, antiterror əməliyyatlarında bizim yalnız hərbi obyektləri, Azərbaycana qarşı silahlanmış güc nöqtələrini, mənbələrini, mərkəzlərini vurmağımız, heç bir mülki erməninin burnunun belə qanamaması yabançı qüvvələrin Azərbaycana qarşı hər hansı bir bəyanatının, növbəti təhdidinin qarşısını aldı, blokladı”-deyə İ. Rüstəmli bildirdi.
İradə SARIYEVA
