Qərb Google və YouTube-da da Ermənistanın imkanlarını gücləndirir - hədəfdə xəritələr də var...
Mehman İsmayılov: “Google və YouTube kimi nəhəng informasiya strukturlarının ermənilərlə gizli anlaşmasının qarşısı alınmalıdır”
Ermənistan sosial şəbəkə platformaları, sosial media üzərindən məkrli planlarını həyata keçirmək üçün daha da aktivləşib. Uzun illər Google mapsı zəbt edən və burada saxta toponimlərdən ibarət xəritələr yerləşdirən ermənilər yenə də bu çirkin addımlarını davam etdirməkdə israrlı olduqlarını göstərirlər.
Ermənistan mətbuatının yaydığı məlumata görə, bu ölkənin yüksək texnoloji sənaye naziri Mxitar Ayrapetyan ilk dəfə Ermənistana işgüzar səfərə gələn Google şirkətinin nümayəndə heyətini qəbul edib. Görüşdə praktiki əməkdaşlıq imkanları, o cümlədən Google xəritələrinin tənzimlənməsi və erməni məzmun yaradıcıları üçün YouTube-da monetizasiya imkanlarının artırılması müzakirə olunub. “Ölkəmizdə müxtəlif Google xidmətləri mövcuddur, lakin biz ikitərəfli əlaqələrin inkişafında daha böyük potensial görürük: buludda məlumatların saxlanması xidmətlərindən süni intellektin istifadəsinə qədər", - nazir vurğulayıb.
Sözsüz, burada Qərbin xüsusi marağı var ki, Ermənistan bu platformalar üzərindən özünün növbəti təxribatlarını həyata keçirsin, saxta xəritələr yerləşdirməklə bu xidmətdən istifadə edənlərin diqqətini öz yalanlarına cəlb etsin. Bir sözlə, Qərb Ermənistanın Google-də və YoTube-də mövqelərini gücləndirir, imkanlarını genişləndirir. O görüşdə xəritə məsələsinin də müzakirə edilməsinin arxasında çox ilginc məqamların durduğu gizli deyil. Özü də müharibədən sonra bunun baş verməsi xeyli maraqlıdır ki, Ermənistan orada hansı xəritələri yerləşdirəcək?
“Ermənistanın saxtakarlıq oyunlarına, bizə qarşı ərazi iddiaları niyyətlərinə Google və YouTube dəstək verəcəksə, bunun bizim üçün hansı nəticələr verəcəyini anlamaq çətin deyil”
Politoloq Mehman İsamyılov “Bakı-Xəbər”ə şərhində “Google və YouTube ABŞ transnasional kompaniyalarının menecerlərinin Ermənistana səfər etməsi ciddi qəbul edilməli və buna dövlət səviyyəsində reaksiya verilməlidir. Çünki elan edilmiş müzakirə mövzuları Azərbaycanın milli maraqlarına və torpaq bütünlüyünə qarşı təşkil olunmuş nəhəng beynəlxalq kombinasiyadır.
Erməni mətbuatı yazır ki, Google-da xəritələrin dəqiqləşdirilməsi, elektron məlumat bazasının yaradılması və YouTube tərəfindən erməni kanallarının həvəsləndirilməsi məqsədilə maliyyələşmənin artırılması və intensivləşdirilməsi məsələləri müzakirə ediləcək. Göründüyü kimi, ABŞ yenə də ermənilərin hayına yetişmək, Azərbaycana və Türkiyəyə qarşı informasiya savaşında onlara dəstək vermək üçün dünyanın ən nəhəng informasiya qurumlarını işə salıb. Əlbəttə, bu bizə qarşı qurulmuş çox aqressiv və təhlükəli bir oyundur.
Ermənistanın saxtakarlıq oyunlarına, bizə qarşı ərazi iddiaları niyyətlərinə Google və YouTube dəstək verəcəksə, bunun bizim üçün hansı nəticələr verəcəyini anlamaq çətin deyil. Onsuz da ermənilər üçün YouTube kanallarında imtiyazlı şərait yaradılıb və onlar nə cür saxtakarlıq edirlərsə - etsinlər, türk - müsəlman dünyasını necə təhqir edirlərsə- etsinlər, o kanallara cəza kəsilmir və biz bunun şahidiyik.
Ancaq hələ bundan sonra da ermənilər üçün xüsusi imtiyazlı şərait yaratmaq, ABŞ tərəfindən bizim kürəyimizə bıçaq sancmaqdır. İnformasiya istiqamətləndirilməmlidir, neqativ niyyətlə cilalanmamalı, ictimaiyyətə olduğu kimi çatdırılmalıdır”-deyə bildirdi.
M.İsmayılovun sözlərinə görə, informasiya silahdır, onu çirkin niyyətlərlə xalqlara qarşı istifadə etmək isə insanlıq əleyhinə cinayətdir. Politoloq vurğuladı ki, ABŞ-ın Türkiyə və Azərbaycana qarşı erməni silahından istifadə etməsi ilk addım deyil: “Ermənilərin 100 ildən artıqdır ki, heç bir siyasi-hüquqi qüvvəsi olmayan Vilson planını əllərində bayraq etdikləri və bizim ərazilərimizdə böyük Ermənistan qurmaq məqsədilə milyonlarla insanı qətlə yetirdikləri ortadadır.
Ona görə biz dövlət səviyyəsində bu cür məsələlərə çox ciddi reaksiya verməliyik, bizə qarşı Google və YouTube kimi nəhəng informasiya qurumlarının erməni alətinə çevrilməsinə yol verməməliyik.
ABŞ-ın erməni separatizmini necə dəstəklədiyini, maliyyələşdirdiyini hər birimiz bilirik. Bu gün Qərbin Ermənistanda artıq hərbi mövcudluğunu bilirik və bu cür hərəkətlərin nəyə hesablandığını anlayırıq. Google və YouTube kimi nəhəng informasiya strukturlarının ermənilərlə gizli anlaşmasının qarşısı alınmalıdır.
Unutmayaq ki, dünyada 65 milyon YouTube kanal var və bu kanallara gündə 2,5 milyard insan baxır. Hər gün Google-a 8,5 milyard insan baş vurur. Bu nəhəng qurumların erməni alətinə çevrilməsinə imkan vermək olmaz”.
İradə SARIYEVA
