Ermənilərin Qarabağdan könüllü köçüb getmələri tədricən təsdiqlənir...
2023-cü ildə Qarabağda keçirilən lokal antiterror tədbirlərindən sonra ermənilərin buranı kütləvi olaraq tərk etdiyi məlumdur. Ermənilər 19-20 sentyabr hadisələrindən sonra bizim ərazilərimizi könüllü tərk etdilər. Azərbaycan dövlətinin çağırışlarına baxmayaraq, onlar getməyə üstünlük verdilər. Köçüb gedərkən erməni əsilli şəxslərin hamısı müsahibələrində bildirirdilər ki, Azərbaycan tərəfi onlara qalıb Azərbaycan vətəndaşı kimi yaşamaqlarını təklif edir, amma onlar çıxıb getmək yolunu tutublar.
Bilirik ki, həm 44 günlük Vətən müharibəsindən və həm də 24 saatlıq antiterror tədbirlərindən sonra ermənilər bu torpaqların onların tarixi vətəni olmadığını anlayıb çıxıb getməyə üstünlük verdilər. Əslində, ermənilərin kütləvi köçündən həm separatçılar, həm də Ermənistan hakimiyyəti və müxalifəti, eləcə də diasporu Azərbaycana qarşı sui-istifadə etməyə çalışdı. Hətta Fransa, ABŞ, Almaniya və bəzi bu kimi dövlətlər də bu kampaniyaya qoşuldular.
19-20 sentyabr hadisələrindən sonra Qarabağı tərk edən erməni əsilli şəxslərin ətrafında şou, oyun qurmaq istəyənlər yalandan dünyaya yaydılar ki, guya ermənilər "etnik təmizləmə" ilə üzləşdikləri üçün Qarabağı tərk ediblər. Ən müxtəlif təşkilatlarda təxribatçı davranışlar sərgilədilər, Azərbaycana qarşı olmazın iftiralarını atdılar. Onlar nə qədər çalışsalar da, erməni əsilli şəxslərin Azərbaycan torpağını könüllü tərk etdiklərini ört-basdır edə bilmədilər. "Qarabağı biz özümüz könüllü tərk edirik", yaxud "etmişik" deyənlərin sayı kifayət qədərdir.
Ermənilər Qarabağdan könüllü getdiklərini təsdiqləyirlər...
Ermənistan hökümətinin və erməni diasporunun, Fransanın, o cümlədən də başqa ölkələrin təkidi ilə Qarabağı tərk edən ermənilərin özləri öz davranışları ilə hər şeyi təsdiqləyirlər.
Ermənistan Qarabağdan ermənilərin kütləvi köçüb getmələri ilə bağlı nə qədər çalışsa da ki, dünyaya onları Azərbaycanın qovduğunu və sairi sübut etsin, amma alınmır. Paşinyan rejimi, erməni diasporu, separatçı tör-töküntüləri Qarabağdan gedən ermənilər barədə nə qədər şişirdilmiş yalanlar danışırlarsa bir o qədər də ifşa olunurlar. Özləri özlərini ifşa edirlər.
Ermənilərin bur qismi İrəvana çatar çatmaz xarici ölkələrə çıxış arayırdılar, əli-ayağı tutanlar müxtəlif xarici ölkələrə gedirdilər. Keçən ilin oktyabr ayının ortalarında Ermənistanın baş naziri Nikol Paşinyanın mətbuata verdiyi açıqlamada qeyd edirdi ki, Qarabağdan könüllü çıxmış erməni əsilli şəxslərdən 3 mindən çoxu Ermənistanı tərk edib. Oktyabrın sonunda isə o, 10 mindən çox ermənin xaricə getdiyini açıqladı. Qarabağdan köçənlərin hesabına xüsusilə Zəngəzur vilayətində son illər kəskin şəkildə azalan əhalinin artımını təmin etməyə çalışan Paşinyan onlara ölkəni tərk etməmək barədə çağırış edirdi, amma onlar Paşinyanın çağırışına əhəmiyyət vermədilər. Son bir neçə ayda görün nə qədər insan bu yolu seçib və xaricə üz tutub.
Ermənistan yalan danışıb dünyanı aldatmaq istəyir, amma getdikcə ortaya daha çox faktlar çıxır və ermənilər özləri sübut edirlər ki, Qarabağdan könüllü köçüb gediblər.
Xaricə üz tuturlar ki, bir daha geri qayıtmasınlar...
Məlumdur ki, köçənlərin əksəriyyəti heç Ermənistanda qalmır, başqa ölkələrə gedirlər. Onlar əgər Ermənistanın iddia etdiyi kimi, Azərbaycanın " təzyiqi" ilə gediblərsə bəs Ermənistanda niyə qalmırlar? Qaçırlar, qayıdıb gəlmək istəmirlər, heç biri qayıtmaq üçün müraciət etmir. Halbuki, Azərbaycan dəfələrlə bunu deyib ki, qayıtmaq istəyənlər qayıda bilərlər, onlara çağırış edib, lakin onlar qayıdıb gəlmək istədiklərini nümayiş etdirmirlər. Ermənistandan da köçüb gedirlər. Bir çox ekspertlərə görə, Qarabağdan gedən ermənilər təkrar Qarabağa qayıtmaq istəmirlər, onlar mühacirətə gedib, qalanlar da getməyə hazırlaşır. Burada onların ABŞ, Fransa kimi ölkələrə üz tutması diqqəti cəlb edir. Hələ ötən ilin sentyabrında belə fikirlər yayılırdı ki, Qarabağdan könüllü gedən ermənilər Fransada yaşamaq hüququ almaq istəyirlər. Həmin dövrdə də Fransa rəsmiləri bəyan etdilər ki, ermənilərə sığnacaq vermək məsələsi gündəmdə deyil.
Bu gün Ermənistan mediası bəyan edir ki, Qarabağdakı separatçı-terrorçu rejimin ləğvindən sonra Xankəndi və ətrafından könüllü olaraq gedən ermənilər Ermənistanda da qalmır, onlar başqa ölkələrə gedir. Bu ermənilər də xarici ölkələrdə müsahibə də verirlər, ictimaiyyət içinə də çıxırlar və aydın olur ki, onlar Ermənistanda da qalmaq istəmirlər. Qarabağdan könüllü köçüb gedən ermənilərin Ermənistanda qalmaq istəməməsi dünyanın obyektiv düşünə bilən insanlarının diqqətini cəlb etməyə bilmir. Dünya da bəzi obyektiv düşünən dairələrin fikirləri artıq yavaş- yavaş dəyişməyə başlayır ki, ermənilərin geri qayıtmaması daha yaxşıdır. Çünki onların bölgədə olması daim problem, müharibə, qan-qada deməkdir. Bu da bir həqiqətdir ki, Azərbaycan diplomatiyası da bu aylar ərzində lazım olan addımları atıb. Bəzi ermənipərəst gücləri, dairələri çıxmaq şərti ilə normal şəxslər anlayırlar ki, ermənlər heç bir etnik təmizləməyə məruz qalmayıblar, onlar Qarabağı könüllü tərk ediblər, bir daha ora qayıtmaq istəmirlər. Çünki Qarabağ onların tarixi vətəni deyil. Artıq dünya da dərk edir ki, erməni yalanları böyük təhlükədir...
İSBAM sədri Samir Adıgözəlli bizimlə söhbətində qeyd etdi ki, ermənilərin Qarabağı könüllü tərk etdiyi dünyaya məlumdur, onlardan çoxu illərlə buradan getmək üçün fürsət gözləyib: “İnan ki, xaricə köçən ermənilərin biri də geri qayıtmaz”.
İradə SARIYEVA
Yazı Azərbaycan Respublikasının Medianın İnkişafı Agentliyinin maliyyə dəstəyilə çap olunur.
