Sosial Media müasir dövrdə və Azərbaycanın xarici siyasətində
Sosial media insanların beynəlxalq miqyasda ünsiyyət qurması üçün ilk növbədə üstünlük verilən üsula çevrilib. Bu məqamda fiziki şəxslərlə yanaşı, dövlətlər, müxtəlif beynəlxalq təşkilatlar və hüquqi şəxslər də bir və ya bir neçə sosial media hesabından istifadə etməyə başlayıblar. Xüsusilə 2019-cu ilin sonlarından başlayan pandemiya dövründə dövlət tərəfindən sosial mediadan istifadə əhəmiyyətli dərəcədə artıb və üzbəüz görüşlər, lazım gəldikdə, bu platforma vasitəsilə qurulan diplomatik əlaqələrlə əvəzlənib. Bunun səbəblərindən biri bu platformalar vasitəsilə sosial media platformalarına və dövlət rəsmilərinə və ya ictimaiyyətə çatmağın nə qədər asan və açıq olmasıdır. Xüsusilə son bir neçə ildə rast gəlinən nümunələr göstərir ki, dövlət məmurları bu platformalardan fəal şəkildə istifadə edir, lazım gəldikdə başqa dövlətləri şərəfləndirmək və ya onları qınamaq üçün fəaliyyətlər göstərir, qınamaqla yanaşı, hərəkətə keçəcəklərini bəyan edirlər. Son bir neçə ili nəzərə alsaq, uzun müddət cəmiyyətə ciddi təsir göstərən sosial media indi beynəlxalq hüquq baxımından dövlətlər üçün əhəmiyyət daşıyan platforma sayıla bilər. Hal-hazırda Diplomatiyanın “Rəqəmsal Diplomatiya” adlı növü beynəlxalq ictimaiyyətdə aktiv şəkildə istifadə olunur.
Azərbaycanın xarici siyasətində sosial media onun diplomatiyasının əsas bir hissəsinə, əsasən, İkinci Qarabağ müharibəsi dövründə çevrildi. Azərbaycan Respublikasının Prezidenti İlham Əliyev 44 günlük müharibə ərzində, nəinki ənənəvi diplomatik üsullardan, eyni zamanda, rəqəmsal diplomatiyadan da geniş istifadə edirdi. Müharibənin gedişatı ilə bağlı əsas məqamları, Azərbaycan Ordusunun zəfərlərini öz rəsmi Twitter (indiki X) hesabında paylaşaraq həm vətəndaşları məlumatlandırır, həm də beynəlxalq ictimaiyyətə duyururdu. Prezident İlham Əliyevin Twitter`dan belə məqsədli istifadəsi, eyni zamanda, əhalinin sosial şəbəkələrlə bağlı məlumatlanmasına, sosial şəbəkələrdə aktiv istifadə etməsinə, vətəndaşların sosial şəbəkələrə cəlb olunmasına səbəb oldu. Vətəndaşların sosial mediadan aktiv istifadəsi 44 günlük müharibənin reallıqlarının onlar tərəfindən beynəlxalq ictimaiyyətə çatdırılmasına, informasiya müharibəsində Azərbaycanın lehinə töhvəsi çox oldu. Vətəndaşların sosial mediaya cəlb olunması və bu istiqamətdə savadlandırılması ölkəmizin beynəlxalq arenada təmsil olunmasında müsbət təsirləri vardır.
Azərbaycan xarici siyasətində sosial medianın rolu hələ də aktiv olaraq qalır. Dövlət orqanlarının rəsmi sosial media hesablarından, eləcə də, Prezident və digər rəhbər şəxslər rəsmi sosial media hesablarında güncəl məsələlərlə bağlı paylaşımlar edir, ictimaiyyəti məlumatlandırırlar.
Əliyeva Günay
“Milli təhlükəsizlik və siyasi strategiya” ixtisası üzrə magistr
Azərbaycan Prezidenti yanında Dövlət İdarəçilik Akademiyası
