Şərq Tərəfdaşlığı, ya “Şərq ayrıseçkiliyi”? - Aİ platforması iflas ərəfəsindədir...
Elşad Həsənov: “Ölkəmizin müstəqil siyasət yeritməsini həzm edə bilmirlər”
Məlum olduğu kimi, Brüsseldə Avropa İttifaqının (Aİ) Şərq Tərəfdaşlığı proqramına üzv ölkələrin (Azərbaycan, Gürcüstan, Ermənistan, Ukrayna, Moldova, Belarus) xarici işlər nazirlərinin iclası keçirilib. Xeyli vaxt idi ki, Azərbaycan ümumiyyətlə bu proqramdan imtina etmişdi.
Bu, Avropa İttifaqının nə təhər tərəfdaşlıq proqramıdır ki, Avroittifaq bu ölkələrin hər birinə münasibətdə ayrıseçkilik edir? Məsələn, Ukrayna ilə Moldovanı Aİ-yə üzv qəbul edirlər. Gürcüstana quruma üzv olmaqla bağlı namizəd statusu verirlər. Belarus ümumiyyətlə Aİ-ni saymır, quruma düşməndir və Rusiyanın tərəfindədir. Orada təmsil olunan Azərbaycan-Ermənistan müharibə vəziyyətindədir, hələ sülh yoxdur. Azərbaycana münasibətdə düşmən mövqe sərgilənir, Ermənistanı isə əməllicə himayə edirlər. Ermənistanı həm də silahlandırırlar. Proqramda 6 dövlət var və bu dövlətlərin hər birinin öz siyasəti var. Belə olan halda sözügedən dövlətlər eyni bir tərəfdaşlıq proqramında necə birləşə bilər? Avroittifaq bunların hamısına ayrıseçkilik münasibəti göstərir. Belə şəraitdə sözügedən proqramın gələcəyi nə ola bilər? Əgər bu proqramın gələcəyi yoxdursa, o zaman orada iştirak etməyə nə ehtiyac var?
“Aİ Azərbaycana münasibətdə ikili standartlardan əl çəkməyəcəksə, Şərq Tərəfdaşlığı proqramına yenidən baxıla bilər”
Məsələ ilə bağlı “Bakı-Xəbər”ə açıqlama verən siyasi ekspert Elşad Həsənovun fikrincə, Azərbaycan Şərq Tərəfdaşlığı proqramında təmsil olunsa da, Avropa İttifaqı ölkəmizə münasibətdə ikili standartlardan yanaşır: “Ukrayna və Moldovanı üzv qəbul etmək istəyirlər. Gürcüstanı quruma namizəd göstəriblər. Ermənistana son dövrlər xüsusi diqqət ayırıblar. Çünki Ermənistan Qərbin diqtəsi ilə hərəkət edir. Burada əsas məqsəd Ermənistanı daha da motivasiya etmək və həvəsləndirməkdir. Çünki Paşinyan hakimiyyətinin qarşısında Ermənistandan Rusiyanı tam sıxışdırıb çıxarmaq öhdəliyi qoyulub. Ona görə də Avroittifaq Ermənistana xüsusi diqqət ayırır. Hətta Fransa Ermənistanı silahlandırmağa başlayıb. Azərbaycana gəldikdə isə ədalətsiz münasibət sərgiləyirlər. Ölkəmizin müstəqil siyasət yeritməsini həzm edə bilmirlər. Azərbaycan Avroittifaqın təklif etdiyi proqramlara yalnız öz dövlət maraqları çərçivəsində yanaşır. Ona görə də bizim aramızda müəyyən problemlər var. Ancaq Azərbaycan Avroittifaq üçün çox vacib bir ölkədir. Çünki bir sıra Avropa dövlətlərinin enerji təhlükəsizliyini Azərbaycan təmin edir. Lakin Azərbaycan zəngin sərvətlərə malik olduğu üçün Aİ istəyir ki, ölkəmizi öz nəzarəti altına alsın. Ölkə hakimiyyəti sırf dövlət maraqlarından çıxış etdiyi üçün, bu, orada bəzi dairələri narahat edir. Bu səbəbdən tərəflər arasında müəyyən konfliktlər yaşanır. Fikrimcə, Avroittifaq Azərbaycana münasibətdə ikili standartlardan əl çəkməyəcəksə, Şərq Tərəfdaşlığı proqramına yenidən baxıla bilər”.
Vidadi ORDAHALLI
