İraq Türk Dövlətləri Təşkilatına qəbul ediləcək...
Faiq Ələkbərli: “İraq türkmənlərinin də bu qurumda təklif edilən şəkildə iştirakı çox əhəmiyyətli olardı”
“Azərbaycan Qarabağ Zəfəri ilə bütün dünyaya, xüsusilə də yurdundan-yuvasından didərgin salınmış xalqlara ümid işığı oldu. Qarabağ Zəfərinin tarix kitablarında hərbi strategiya baxımından yeni səhifə açması təsadüfi deyil”. Bu fikirləri İraq Respublikası Nümayəndələr Şurasının İnsan hüquqları komitəsinin sədri Ərşad Əl-Salihi dekabrın 7-də keçirilən “Parlamentarizm: ənənələr və perspektivlər” mövzusunda beynəlxalq parlament konfransında çıxışı zamanı səsləndirib.
Ərşad Əl-Salihi vurğulayıb ki, Azərbaycan qısa müddət əvvəl Türkmən eli üçün Kərkükdə ilk məktəbi bərpa edib: “Prezident İlham Əliyevə təşəkkürümü bildirirəm. Türkmən eli hər zaman Türkiyəyə və Azərbaycana arxalanır. Hesab edirəm ki, İraq Türk Dövlətləri Təşkilatında müşahidəçi qismində təmsil olunmalıdır. Bizim ortaq dəyərlərimizin ən gözəl nümunələrindən biri Füzulidir. Onun qələmi yalnız Türkmən elinə deyil, bütün İslam dünyasına işıq saçıb”.
“Türkmənlər öz varlıqlarını və gələcəklərini bu təşkilatda görürlər”
AMEA Fəlsəfə və Sosiologiya İnstitutu “Türk xalqlarının fəlsəfi fikir tarixi və müasir fəlsəfəsi” şöbəsinin müdiri, fəlsəfə üzrə fəlsəfə doktoru, dosent Faiq Ələkbərli “Bakı-Xəbər”ə şərhində bildirdi ki, bu ideyanın gerçəkləşdirilməsi mümkündür. “İraq adlanan dövlətin əsas xalqlarından biri də türkmənlərdir. İraq türkləri azərbaycanlı hesab olunur. Çünki Kərkükdə və onun ətrafında yaşayanları, demək olar ki, mədəniyyəti, adət-ənənələri, folkloru, danışığı Azərbaycan türkləri ilə üst-üstə düşür. İraq türkmənlərinin biri və birincisi, eyni zamanda İraq parlamentində komissiya sədri olan Ərşad Əl-Salihinin təklifi diqqətçəkicidir. Ərşad Əl-Salihinin təklif edir ki, Türk Dövlətləri Təşkilatına İraq müşahidəçi qismində qatılsın. Hesab edirəm ki, İraq türkmənlərinin də bu qurumda təklif edilən şəkildə iştirakı çox əhəmiyyətli olardı. Onlar bizim bir parçamızdır və onların TDT-də təmsil olunmaları reallaşmalıdır”.
F.Ələkbərli qeyd etdi ki, İraq əsasən üç millətdən təşəkkül tapıb, bunlar ərəblər, türklər və kürdlərdir. F.Ələkbərli hesab edir ki, TDT-ə türkmənlərin bağlılığı var və İraq müəyyən anlamda türkmənlərə bağlı dövlətdir. “Bizim İraq türkmənləri ilə ortaq dəyərlərimiz, ortaq şəxsiyyətlərimiz, adət-ənənəmiz, mədəniyyətimiz, bağlılığımız bunu istisna etmir”.
F.Ələkbərli eyni zamanda qeyd etdi ki, Türkmən elinin bu təşkilata üzv olması çox vacibdir, ancaq İraq dövlətinin özünün bu təşkilatda hansı yolla iştirak edəcəyi müzakirəyə açıq məsələdir.
“Biz İraq adlanan ölkənin keçmişinə də baxanda görürük ki, bu ölkə ya Azərbaycan türklərinin yaratdığı dövlətlərin, ya da Osmanlının ərazisində olub. Yəni indiki İraq ərazisi Osmanlı və Azərbaycan türklərinin idarə etdiyi coğrafiyadır. Ona görə də, burada qədimdən türklərin yaşaması bəllidir. Kərkük qədim bir Türkmən elidir, türk məskənidir, yurdudur”.
F.Ələkbərlinin fikrincə, bütövlükdə İraq türkmənlərinin bu təşkilata cəlb edilməsi tamamilə mümkündür. O qeyd etdi ki, təkcə Məhəmməd Füzuli deyil, Kərkük elində yetişən bir çox böyüklərimiz olub. “İraqın Türkmən eli, Kərkük bütövlükdə Azərbaycanla, türk dünyası ilə sıx şəkildə bağlıdır. Ona görə də, İraqın bu quruma üzv olması məsələsinə baxılmalıdır və ən azından Türkmən eli TDT-də təmsil olunamalıdr. Çünki türkmənlər öz varlıqlarını və gələcəklərini bu təşkilatda görürlər” - deyə F.Ələkbərli qeyd etdi.
İradə SARIYEVA
