Aydın Xan Əbilov: "Eyni QHT-lərin sədrləri müxtəlif ictimai şuralarda dırnaqarası seçkiləri udmağa başladılar"
Azərbaycan Milli QHT Forumu İctimai Şuraların formalaşdırılmasında pozuntulara və üzvlükdən sui-istifadə hallarına dair bəyanat yayıb.
Bəyanatda deyilir: "Azərbaycan Milli QHT Forumu bir sıra dövlət qurumları, xüsusilə yerli icra hakimiyyəti orqanları yanında İctimai şuraların formalaşdırılmasında kobud pozuntu hallarını müşahidə edir. Apardığımız təhlillər göstərir ki, hazırda mərkəzi icra hakimiyyəti qurumları üzrə mövcud İctimai şuraların təxminən 25%-i eyni şəxslərdən ibarətdir".
Bəyanatda xüsusi olaraq vurğulanır ki, mərkəzi icra hakimiyyəti qurumları üzrə mövcud İctimai Şuraların təxminən 25%-i eyni şəxslərdən ibarətdir. Bu problem necə həll oluna bilər?
"Bütün ictimai şuralar buraxılmalı və yenisi tərtib olunmalıdır, ictimai şuralar öz fəaliyyəti ilə bağlı cəmiyyət qarşısında hesabat verməlidir"
Yeni Yazarlar və Sənətçilər İctimai Birliyinin sədri, www.kitabxana.net – Mir Cəlal Paşayev adına Milli Virtual-Elektron Kitabxananın təsisçisi, Prezident təqaüdçüsü, yazıçı-kulturoloq Aydın Xan Əbilov "Bakı-Xəbər"ə şərhində bildirdi ki, Azərbaycanda ictimai təsisatların, dövlətçi qurumların və onların yanında ictimai şuraların fəlsəfəsinin dəyişdirilməsi ilə bağlı dəfələrlə təklif irəli sürüb: "Təəssüf ki, Prezident Ilham Əliyevin imzaladığı İctimai iştirakçılıq haqqında qanun öz ilkin fəlsəfəsindən uzaqlaşdırılıb. İctimai nəzarətin gücləndirilməsi, ictimai təsisatlar və tanınmış şəxslərin dövlət qurumlarının işinə nəzarət mexanizminin formalaşması üçün müxtəlif dövlət qurumlarının yanında ictimai şuraların yaradılması ilə bağlı ölkə başçısı tərəfindən xüsusi sərəncam imzalanıb. Bu sərəncam kampaniya xarekterli olaraq bir ara tətbiq olundu. Sonralar isə QHT-lər arasında şəbəkələşmə müşahidə olundu. Eyni QHT-lərin sədrləri müxtəlif ictimai şuralarda dırnaqarası seçkiləri udmağa başladılar. Mədəniyyət Nazirliyi, Fövqəlada Hallar Nazirliyi və digər qurumların ictimai şuralarında eyni şəxslər seçildi. Bəzi hallarda keçmiş QHT Forumunun rəhbərliyi 10-a yaxın ictimai şurada təmsil olunub. Məcburi köçkünlər və əlillərlə bağlı təşkilata öz şəbəkəsini yaradaraq, öz adamlarını müxtəlif sahəvi qurumların ictimai şuralarına üzv etdilər. Hətta icra hakimiyyətləri və universitetlərin yanında formalaşan ictimai şuralarda yer aldılar. Mexaniki olaraq bir-birini təkrarlayan eyni QHT sədrləri qurumların ictimai şuralarında təmsil olundu. Əlbəttə, dövlət bunu belə saxlaya bilməzdi. Müəyyən dəyişikliklərdən sonra bu sahədə fərqlilik müşahidə olunur. Keçirilən tədbirlər, icra edilən layihələrdə yenu imzalar, yeni simalar görünür. Ancaq nədənsə, ictimai şuraların seçimində, fəaliyyətində inkişaf o dərəcədə görünmür. Bəzi ictimai şuralar var ki, onlar fəaldır, müəyyən mənada işlər görür. Ancaq o ictimai şuraların qurumlarda bir otağı yoxdir ki, orda normal fəaliyyət göstərə bilsin".
Həmsöhbətimizin sözlərinə görə, ictimai şurada ictimai iştirakçılıq vətəndaşların dövlət qurumuna nəzarətini təmin etməlidir. Prezident İlham Əliyevin siyasi iradəsidir ki, vətəndaşlar dövlətçiliyin mexanizmində birbaşa iştirak etsin: "İctimai şura tək nəzarət etmək deyil, eyni zamanda, beyin məhsulları da verməlidir. Çoxlu sayda ictimai şura var, ancaq onların neçəsi mətbuatda, televiziyada, sosial mediada fəaldır? Hər hansı bir məsələ ilə bağlı öz təkliflərini irəli sürür, dövlətin yanında olduqlarını bəyan edirlər?".
Ekspert hesab edir ki, ictimai şuraların işlək mexanizmi dəyişməlidir. Ictimai şuralar özlərinə layihə almağı deyil, vətəndaşları, dövləti fikirləşməlidir: "İndiki ictimai şuraların tək dərdi layihə almaq, xarici səfərlərdə iştirak etmək, hansısa tədbirlərdə baş köşədə əyləşməkdir. Bu səbəbdən də düşünürəm ki, bütün ictimai şuralar buraxılmalı və yeni şura tərtib olunmalıdır. İctimai şuralar öz fəaliyyəti ilə bağlı cəmiyyət qarşısında hesabat verməlidir".
Günel CƏLİLOVA
