Avroittifaqın İrəvandakı Mülki Missiyasında Kanadanın nə işi var...
Ceyhun Məmmədov: “Kanadanın aşırı ermənipərəst mövqedən çıxış etməsini anlamaq mümkün deyil”
Ermənistanda səfərdə olan Kanada xarici işlər naziri Melani Colini Cermuka səfər edib. Kanadanın xarici işlər naziri səfərinə Avropa İttifaqının müşahidəçilər missiyasının Cermukdakı ofisinə baş çəkməklə başlayıb.
“Kanadanın da qoşulduğu Avropa İttifaqı missiyasının həyata keçirdiyi işlər haqqında daha çox öyrənmək üçün Cermukda olmaqdan məmnunam. Kanada bu missiyaya qoşulan ilk Aİ üzvü olmayan ölkə olacaq. Ona görə də biz logistika məsələlərini, həm regionda humanitar problemlərin həlli, həm də sülh və sabitliyin təmin olunması baxımından bu mühüm missiyaya necə inteqrasiya edə biləcəyimizi müzakirə edəcəyik”, - Coli Aİ müşahidəçiləri ilə görüşdə deyib.
Kanadanın xarici işlər naziri Cermuka səfəri zamanı həmçinin döyüş mövqelərinə baş çəkəcək və Dağlıq Qarabağdan olan məcburi köçkünlərlə görüşəcək.
Maraqlıdır, Kanadanın bölgəmizdə nə işi var və niyə belə canfəşanlıq edir? Avroittifaqın Ermənistandakı Mülki Missiyasında Kanadanın nə işi var?
- “Bu cür təxribatların, regiona daxil olmaq cəhdlərinin heç bir nəticəsi olmayacaq”
Məsələ ilə bağlı “Bakı-Xəbər”ə açıqlama verən millət vəkili Ceyhun Məmmədovun fikrincə, Kanada bununla ermənipərəst mövqedən çıxış edir: “Təəssüflər olsun ki, bu belədir. Proseslərin gedişi göstərir ki, sanki Azərbaycana qarşı düşmənçiliyin də, nifrətin də artmasında, ölkəmizə qarşı çirkin kampaniyanın aparıılmasında bir sıra dövlətlər yarışa girib. Bir sıra Avropa dövlətlərinin Fransa başda olmaqla bu prosesdə iştirak etməsi bizə məlum idi. Təəssüflər olsun ki, Kanada da ölkəmizə yönəlik kampaniyaya qoşulub. Bütün bunlar onu göstərir ki, kollektiv formada ölkəmizi hədəf alırlar. Söhbət Azərbaycana qarşı təxribatlardan gedir. Kanada rəhbərliyi yaxşı olardı ki, xəritəni qarşısına qoyub Qarabağın kimə məxsus olduğuna baxsın. Bu ölkə nə haqla bizim daxili işimizə qarışır? Kanadanın bu məsələdə aşırı ermənipərəst mövqedən çıxış etməsini anlamaq mümkün deyil. O mənada ki, beynəlxalq hüquqdan, ədalətdən danışan bu dövlətlər Azərbaycana qarşı aqressiyalarını və təxribatlarını davam etdirirlər. Üstəlik, get-gedə bu proses böyüyür və bura yeni dövlətlər qoşulur. Kanada bilməlidir ki, erməni lobbisinin yedəyində getməklə nəyəsə nail ola bulməyəcək. Bu cür təxribatların, regiona daxil olmaq cəhdlərinin heç bir nəticəsi olmayacaq. Çünki bu təxribat cəhdlərinin heç bir hüquqi əsası yoxdur. Məsələ ondadır ki, Qarabağda etnik təmizləmədən söhbət belə gedə bilməz. Kimsə zor gücü ilə erməniləri Qarabağdan çıxarmayıb. Onlar könüllü olaraq Qarabağı tərk ediblər. Bu, daha çox mövcud Ermənistan hakimiyyətinin həyata keçirdiyi bir təxribatdır və planlı şəkildə hazırlanan bir məsələdir. Təəssüflər olsun ki, bəzi Avropa dövlətləri kimi Kanada da Ermənistanın təxribatlarına uyaraq alət rolunda çıxış edir. Bütün hallarda, Kanadanın uzaq qitədən gələrək Aİ Missiyasında iştirak etməsi, canfəşanlıq göstərməsi qəbuledilməzdir. Azərbaycan regiona sülhün gəlməsini istəyir. Ermənistan isə həm təxribatlara gedir, həm də xarici dövlətləri regiona gətirir”.
Vidadi ORDAHALLI
