“Azərbaycan Ermənistanla birlikdə Rusiyanı sıxışdırmaq layihəsi hazırlayır” - müxalifətdən absurd bəyanat...
Təbriz Musayev: “Abramyan ona görə belə təxribatçı açıqlamalar verir ki, Rusiya-Azərbaycan münasibətləri pozulsun”
“Ermənistan-Azərbaycan münasibətlərində açıq şəkildə pərdəarxası proseslər gedir və həm ABŞ-dan gələn səfərlər, telefon zəngləri, həm də Rusiyadan gələn reaksiyalar təsadüfi deyil”. Bunu Ermənistan parlamentinin “Şərəfim var” fraksiyasının deputatı Tiqran Abramyan öz Facebook səhifəsində yazıb.
Onun sözlərinə görə, bəzən elə görünə bilər ki, Ermənistan-Azərbaycan prosesi dalana dirənib və ya çox da aktivlik yoxdur, amma dərin səviyyədə proses, xüsusən də kənar müdaxilələr səbəbindən tam sürətlə gedir: “Ermənistana sülh əldə etmək deyil, Rusiyanı sıxışdırmaq haqqında sənəd təqdim olunur və Rusiya Federasiyasının bu proseslə bağlı gələcək addımlarının nədən ibarət olacağını ancaq proqnozlaşdırmaq olar”.
T.Abramyan iddia edir ki, guya Azərbaycan Ermənistanın Rusiyanı bölgədən sıxışdırıb çıxarmaq siyasətinə altdan-altdan dəstək verir.
“Bizə lazım olan yaranmış vəziyyətdən maksimum faydalanmaqdır ki, bundan da mümkün olan qədər yararlanırıq”
Sözügedən məsələni “Bakı-Xəbər”ə şərh edən İrəvan Azadlıq Təşkilatının sədri Təbriz Musayev hesab edir ki, bu, tpik erməni hiləgərliyinə xas olan təxribatdır: “Əvvəla, Ermənistan parlamentinin “Şərəfim var” fraksiyası sabiq prezident Serj Sarkisyana bağlıdır. Bu fraksiya və parlamentdəki “Hayastan” bloku revanşist qanadı təmsil edir. Hər iki siyasi blok Rusiyanın maraqlarından çıxış edir və “Qarabağ klanı”nı təmsil edirlər. Rusiyanın dəstəyi hesabına 20 il Ermənistanda hakimiyyətdə olublar. Revanşist qüvvələrin təmsilçisi T.Abramyan ona görə belə təxribatçı açıqlamalar verir ki, Rusiya-Azərbaycan münasibətləri pozulsun. Halbuki, Kreml yaxşı bilir ki, regiondankənar qüvvələri bölgəyə dəvət edən Bakı yox, İrəvandır. Azərbaycan necə maraqlı ola bilər ki, Fransa bölgədə möhkəmlənsin? Rusiya 2023-cü ilin sentyabrında Azərbaycanın antiterror əməliyyatları keçirməsinə mane olmadı. Nəticədə Azərbaycan öz suverenliyini tam bərpa etdi. Rusiya Azərbaycanın istəklərini nəzərə alaraq 2024-cü ilin aprelində sülhməramlıların vaxtından əvvəl Qarabağdan çıxarılmasına qərar verdi. Bütün bunlardan sonra bizə lazımdırmı ki, Paşinyan hakimiyyəti ilə gizli sövdələşməyə gedib Rusiyanın sıxışdırılmasında iştirak edək? Əlbəttə ki, yox. Onsuz da Paşinyanı Qərb ona görə hakimiyyətə gətirib ki, Rusiyanı Ermənistandan sıxışdırıb çıxarsın. Proseslər də bu istiqamətdə inkişaf edir. Təbii ki, Ukrayna müharibəsinin uzanması Paşinyan hakimiyyətinin manevr imkanlarını genişləndirir. Ancaq bu, sonsuza qədər davam edə bilməz. Bu baxımdan hansısa mərhələdə Ermənistan hakimiyyəti qəti seçim etməlidir. Bir sözlə, Ermənistanla Rusiya nə qədər bir-birini qırır, özləri bilər. Azərbaycana lazım olan yaranmış vəziyyətdən maksimum faydalanmaqdır. Bundan da mümkün olan qədər yararlanırıq”.
Vidadi ORDAHALLI
