Restoranlar 40 manatdan başlayan menyuları sürətlə bahalaşdırır...
Ailə qurmağa hazırlaşan cütlükləri maraqlandıran əsas məsələlərdən biri də şadlıq saraylarının mövcud menyu qiymətləridir. İqtisadi və Sosial İnkişaf Mərkəzinin yaydığı məlumatda qeyd edilir ki, Bakıda şadlıq saraylarında qiymət artımı davam edir.
Qeyd edilib ki, tələbin artması qiymətlərə də təsir göstərib. Belə ki, şadlıq saraylarında may ayında qiymətlər 5.3 faiz artıb. Xüsusən 40 manatadək olan menyularda qiymət daha çox artıb - 7.3 faiz. 40-80 manatlıq menyuların qiyməti 4.5 faiz yüksəlib. Dəyəri 100 manatdan çox olan menyuların qiymətində də 4.1 faiz artım qeydə alınıb. Maraqlıdır, şadlıq saraylarındakı qiymətlər necə tənzimlənməlidir?
Xalid Kərimli: “Şadlıq evlərindəki qiymətləri dövlət deyil, bazar özü təyin edir”
İqtisadçı Xalid Kərimli “Bakı-Xəbər”ə açıqlamasında bildirdi ki, şadlıq saraylarındakı qiymətləri heç kəs tənzimləmir: Şadlıq evlərindəki qiymətləri dövlət deyil, bazar özü təyin edir. Qiymət bahadırsa alternativ təkliflərə üz tutmaq olar. Bir vaxtlar çadırlar qurularaq toy keçirilirdi. Şadlıq saraylarındakı qiymətlərin enməsi rəqabətə bağlıdır. Belə ki, restoranların satış planı və xərcləri var. Bunu icra etmək üçün isə daha çox satış etməlidirlər. Ona görə də rəqabət məcbur edərsə, qiymətləri aşağı salmaq məburiyyətində qalacaqlar”.
Kamran Məmmədli: “Toyların formatının dəyişdirilməsinə ciddi ehtiyac var”
Iqtisadçı Kamran Məmmədli hesab edir ki, son zamanlar ərzaq məhsullarının qiymətində baş verən bahalaşma həm şadlıq evlərində, həmçinin də digər restoranlarda qiymətə təsir edir: “Şadlıq saraylarının qiymətlərinin bahalaşması onların xərcinin artması deməkdir. Rəqabətdə uduzanlar restoranın təyinatını dəyişməli, ya da bağlamalıdırlar. Ümumiyyətlə, toyların formatının dəyişdirilməsinə ciddi ehtiyac var. Azərbaycanda artıq bəhsəbəhslə toyların keçirilməsinə, masalarda çox böyük israfa ehtiyac yoxdur. Əgər restoranlar qiymət artırmaqda israrlıdırsa, vətəndaşlar da menyuda dəyişiklik eləsin, yəni daha az çeşidlə bir çox ölkədə olduğu kimi sadə toy məclisi keçirilsin. Kəskin qiymət artımı alıcılıq qabiliyyətinin az olması ilə əlaqədar vətəndaşların ciddi narazılığına gətirib çıxaracaq”.
Günel CƏLİLOVA
