Altay "Turistlərin Məkkəsi" olacaq - Matviyenko düz müqayisə etdi?..
Ceyhun Məmmədov: “Məsələyə dini aspektdən yanaşılanda bu cür paralellərin aparılması yaxşı qəbul olunmur”
Rusiya Federasiya Şurasının sədri Valentina Matvienko bildirib ki, Altay Respublikasının qubernatoru vəzifəsini icra edən Andrey Turçak bölgəni “turist Məkkəyə” çevirməyə qadirdir:
“Altay Respublikası Rusiya Federasiyası üçün xüsusi, çox vacib regiondur. Bu, turizm sənayesinin inkişaf perspektivləri olan regiondur. Altay Respublikasını əsl turizm məkkəsinə çevirmək üçün hər cür imkan var və Andrey Anatolyeviçin həm icra, həm də qanunvericilik orqanlarında əldə etdiyi təcrübəni nəzərə alaraq, əminəm ki, o, prezidentin qarşıya qoyduğu bütün bu vəzifələri həll edə biləcək”. Matvienko əlavə edib ki, belə bir adamı Federasiya Şurasının komandasından buraxmaq onun üçün çətindir.
Qeyd edək ki, Rusiya Federasiya Şurası spikerin birinci müavini Turçakın Altay Respublikası rəhbərinin səlahiyyətlərini icra edən şəxs təyin olunması ilə əlaqədar onun səlahiyyətlərinə vaxtından əvvəl xitam verib. Bir gün əvvəl Rusiya prezidenti Vladimir Putin Turçakı Altay Respublikasına rəhbərlik etməyə dəvət edib.
Matvienkonun Altayı “turist Məkkəsi” ilə müqayisəsi nə dərəcədə doğrudur?
Millət vəkili, ilahiyyat üzrə fəlsəfə doktoru Ceyhun Məmmədov “Bakı-Xəbər”ə açıqlamasında bildirdi ki, bu cür ifadələr həm bizim, həm də ayrı-ayrı ölkələrdə işlədilir:”Hansısa bir yerin əhəmiyyətli və vacib olduğunu göstərmək üçün həmin yerin Məkkə ilə paraleli və müqayisəsi aparılır. Əksər hallarda burada başlıca məqsəd birmənalı olaraq təqdimatın yaxşılığını çatdırmaqdır. Bəzən insanlar bilmirlər ki, belə müqayisəni aparmaq olmaz. Bir daha deyirəm ki, bundan daha çox reklam məqsədilə istifadə edirlər. Məsələyə dini aspektdən yanaşılanda isə bu cür paralellərin aparılması yaxşı qəbul olunmur. Çünki Məkkə və Kəbə həm də müsəlmanlar üçün müqəddəs sayılan yerdir. İnsanlar gedib orda vacib əməllərini və ibadətlərini yerinə yetirir. Məkkəni ziyarət etmək İslamın vacib əmməllərindən biri sayılır. Düşünürəm ki, bu məsələnin ciddi müzakirəsinə ehtiyac duyulmur. Bu kimi fikirlər daha çox diqqəti cəlb etmək üçün gündəmə salınır. Dinimiz bu məsələyə yaxşı baxmır”.
Tam adı Məkkə Əl-Mükərrimə olan şəhər Səudiyyə Ərəbistanı Krallığının Qərbində Mədinə və Taif şəhərləri arasında yerləşir.
Ərəb dilində Mərkəz mənasını daşıyan şəhər Ummul Qura, Beyt ul-Əmin, Bəkkə kimi də qeyd olunur. Dini rəvayətlərə görə, Məkkə ilk əvvəl susuz səhra olmuş, sonradan İbrahim peyğəmbərin həyat yoldaşı Həcər xanım oğlu İsmayıl peyğəmbər ilə buraya gəlmiş və Allaha dua edərək ona su verilməsini istəmişdi.
Allah Təala da duasını qəbul edib, bugün Zəm-zəm adlanan bulağı səhrada yoxdan var etmişdi. Məkkəyə sonradan başqa ərəb qəbilələri də axışmağa başlamışdı. Məkkə ilk orta əsrlərdə müxtəlif dövlət ərazilərinə tabe olsa da, sonradan yaranan ilk Müsəlman Xilafətinin paytaxtı oldu. Məkkəni daha çox məşhur edən orada yerləşən Kəbə evidir. Qurani Kərimdə Allah Təalanın evi adlandırılan Kəbənin İbrahim peyğəmbər tərəfindən ilk dəfə tikildiyi bildirilir. Bu gün bütün dünyada namaz qılan və dua tutan müsəlmanlar üzlərini məhz Qibləyə, yəni Məkkə şəhərində yerləşən Kəbə evinə (Bəkkə) tərəf tuturlar.
Məhəmmədəli QƏRİBLİ
