İrəvanın Kremlə qarşı gizli oyunları - maraqlı xəyanət sürprizi üzə çıxdı...
Ermənistanın “Qraparak” nəşri iddia edir ki, baş nazir Nikol Paşinyan təmsil etdiyi “Vətəndaş müqaviləsi” partiyasının üzvlərini ölkənin xarici siyasətində dəyişiklik etməyə hazırlaşmağa çağırıb.
Gizli görüş zamanı o, deputatlara və nazirlərə İrəvanın Avropa İttifaqına namizəd üzv olmağa çalışacağını bəyan edib. “Qraparak”a görə, Qərb İrəvandan Rusiya Federasiyasından uzaqlaşmağı və onu Cənubi Qafqazdan çıxarmağı tələb edir.
Nəşr bu fonda yazır: “Paşinyan açıq şəkildə bildirdi ki, Ermənistanın Qərbin tələblərini yerinə yetirməkdən başqa yolu yoxdur, çünki Rusiya bizdən üz döndərib”. “Qraparak”, həmçinin, parlamentin spikeri Alen Simonyanın sözlərinə istinad edir. Simonyan vurğulayır ki, Ermənistan Avropa İttifaqı üzvlüyünə namizəd olmağa və respublikanın təhlükəsizliyini təmin edən istiqamətdə irəliləməyə hazırdır. Bütün bunlara diqqət edən Rusiyanın “Nezavisimaya qazeta” mətbu orqanı isə olduqca maraqlı məqamlara nəzər salır: “Baş verənlər haqqında məlumatlar çatdıran “Qraparak” qəzeti Alen Simonyanın qaynanası Armina Ohanyana məxsusdur. Lakin bu media müxalif və sarı hesab olunur. Nə olursa olsun, “Qraparak” israr edir ki, Paşinyan respublikanın təhlükəsizliyini onun Avropa perspektivi ilə əlaqələndirir. Üstəlik, İrəvanın üzvlük üçün ərizəni 2024-cü ilin payızından gec olmayaraq təqdim edəcəyi bildirilir. Düzdür, baş nazirin komandası belə bir addımın düzgünlüyünə şübhə ilə yanaşır. Daha çox dəstək qazanmaq üçün Paşinyan ilk növbədə Konstitusiya referendumu keçirmək istəyir və bu referendum zamanı Ermənistan vətəndaşlarından yeni xarici siyasət kursunu dəstəkləmələri xahiş olunacaq. Qeyd edək ki, referendumda hökumətin istədiyi nəticəni əldə etməsi çətin olacaq. Bunun üçün bütün Ermənistan seçicilərinin 25%-nin yeni Konstitusiyaya səs verməsi lazımdır. Beləliklə, çox yüksək fəallığa ehtiyac var ki, bu da, hökumətin aşağı populyarlığını nəzərə alsaq, baş nazirə ancaq ziyan vuracaq. Bu arada, “Vətəndaş müqaviləsi”ndə Avropaya inteqrasiyanın əleyhdarları Paşinyana xəbərdarlıq ediblər ki, Moskva onun planlarından xəbər tutaraq, çevriliş etmək üçün müxalifətə dəstək verməyə cəhd edə bilər. Ümumilikdə, onlar təkid edirdilər ki, ölkədə ən azı bir sakit il olmalıdır ki, bu müddət ərzində baş verəcək hadisələri qiymətləndirmək mümkün olsun. Onların fikrincə, hələ də tələsmək üçün heç bir yer yoxdur, çünki KTMT üzvlüyünü donduran və Roma Statutunu qəbul edən İrəvan hələ də Qərb istiqamətində hərəkət edir. Bundan başqa, deputat Qurgen Arsenyan Ermənistan iqtisadiyyatının Rusiyadan yüksək asılılığı barədə uzun çıxış edib. Onun fikrincə, təkcə “Lars” keçidinin bağlanması respublikanı iflic vəziyyətinə sala bilər. Buna baxmayaraq, guya Paşinyan israr etməkdə davam edib ki, məsələ payızdan əvvəl həll olunmalıdır. Eyni zamanda o, Qərbin, Rusiyadan fərqli olaraq, Ermənistana təhlükəsizlik zəmanəti verməyə hazır olduğunu təkrarlayıb.
“Nezavisimaya qazeta”ya müsahibə verən ekspertlər bildiriblər ki, “Qraparak”ın reputasiyası qəzetdə dərc olunanların kiminsə uydurması olmadığını tam əminliklə söyləməyə imkan vermir. Eyni zamanda onlar hesab edirlər ki, Paşinyan da buna bənzər nəsə fikirləşə bilərdi. Politoloq Tiqran Köçəryan deyib: “Paşinyan komandasının üzvlərinin ictimai bəyanatlarına əsaslansaq, o, hərtərəfli gediş gedir”. O, Avropa İttifaqı ilə yaxınlaşa və Rusiyadan mümkün qədər uzaqlaşa bilər ki, Ermənistan əhalisinin dəstəyini almaq asan olsun. Hazırda sadə ermənilərin əksəriyyəti Paşinyanı dəstəkləmir və respublikanın Avrasiya İqtisadi İttifaqına üzvlüyünün faydalarını başa düşür. Ola bilsin ki, ilk növbədə, hökumət ölkənin qoşulmama statusunu Konstitusiyada təsbit etməyə çalışacaq, sonra isə parlament seçkiləri keçirəcək, nəticədə “Vətəndaş müqaviləsi”nin başçılığı ilə tamamilə qərbyönlü koalisiya yaranacaq. Bununla paralel olaraq, məsələn, vizasız rejimin köməyi ilə erməniləri Avropa İttifaqının tərəfinə keçməyə razı salacaqlar. Strateji Araşdırmalar və Təşəbbüslər üzrə Analitik Mərkəzin rəhbəri Hayk Xalatyan hesab edir ki, KTMT üzvlüyünün dondurulması ilə paralel olaraq Ermənistan hakimiyyətinin Avropaya inteqrasiya ideyasını irəli sürəcəyi gözlənilir. Üstəlik, Paşinyanın komandası əvvəlcə Rusiyanın himayəsində olan bütün alyanslara kifayət qədər şübhə ilə yanaşırdı: “İndi onlar üçün ölkənin üzünü Qərbə çevirmək baxımından çox əlverişli məqamdır. Rusiya ilə münasibətlərin pozulması fonunda yaranan risqlər Ermənistan cəmiyyətinin əhəmiyyətli hissəsini narahat edir. Aİ-yə daxil olmaq və “vizasız” olmaq perspektivi vətəndaşların diqqətini təhlükəsizlik və iqtisadiyyat sahəsindəki problemlərdən yayındıra bilər”, - Xalatyan bildirib. Eyni zamanda ekspert Ermənistanın tezliklə Avropa İttifaqına qəbul olunacağına da şübhə ilə yanaşır. “Bu, çox güman ki, Avropaya inteqrasiya kursunu təyin edən və ciddi problemlərlə üzləşmiş, lakin heç vaxt Aİ-yə daxil olmayan digər keçmiş sovet respublikalarının taleyini təkrarlayacaq”, - Xalatyan proqnozlaşdırır”.
Samirə SƏFƏROVA
