Azərbaycan-Ermənistan sərhədində Avroittifaqın “patrul təlaşı” - Borrel sülhün üstünə yeridi...
Qulamhüseyn Əlibəyli: “Qurumun məqsədi Ermənistanda hərbi baxımdan möhkəmlənməkdir”
Avropa İttifaqı Ermənistanın Azərbaycanla sərhədində patrul missiyasını gücləndirir. Bu barədə Avropa İttifaqının Xarici Əlaqələr və Təhlükəsizlik Siyasəti üzrə Ali Nümayəndəsi, Aİ Komissiyasının Vitse-prezidenti Cozep Borell Aİ Xarici İşlər Nazirləri Şurasının iclasından sonra deyib:
“Biz Ermənistandakı missiyamızı gücləndirmək qərarına gəldik: sərhədin təhlükəli hissələrində daha çox müşahidəçi və daha çox patrul olacaq. Biz həmçinin Avropa Sülh Fondu çərçivəsində Ermənistana mümkün dəstəyi və Ermənistan üçün viza rejiminin liberallaşdırılmasını öyrənəcəyik”.
Borrel Ermənistanın ərazi bütövlüyünün pozulmasını qəbuledilməz hesab edərək Azərbaycana da mesaj verib: “Ermənistanı daxildən və xaricdən sabitliyi pozmaq cəhdlərinə qarşı sayıq olmağa çağırırıq. Bizim Azərbaycana mesajımız aydındır: Ermənistanın ərazi bütövlüyünün hər hansı formada pozulması qəbuledilməzdir və münasibətlərimizin keyfiyyəti üçün ciddi nəticələrə səbəb olacaq”.
Avropa İttifaqı özü Azərbaycanla Ermənistan arasında normallaşma prosesinə vasitəçilik etmək istədiyi bir vaxtda, bölgəyə sülh gətirnək istədiyi və guya bunun üçün çalışdığı bir vaxtda Ermənistanın gücləndirilməsi, hərbi cəhətdən təmin olunması fonunda nə əcəb anlamır ki, bu iki ölkə arasında sülh prosesi perspektivinə mənfi təsir göstərəcək? Bir tərəfdən vasitəçilik edir, o biri tərəfdən vəziyyəti gərginləşdirən addımlar atır. Maraqlıdır, Avropa İttifaqının məqsədi nədən ibarətdir? Niyə anlamaq istəmirlər ki, sülh sazişi imzalanmadan atılan addımlar vəziyyəti daha da gərginləşdirir və Ermənistanı sülh siyasətindən daha da uzaqlaşdırır?
“Borrelin səsləndirdiyi fikirlər nəinki qərəzli, həm də iyrəncdir”
Sözügedən məsələyə aydınlıq gətirən sabiq millət vəkili, hüquqşünas Qulamhüseyn Əlibəyli “Bakı-Xəbər”ə açıqlamasında bununla bağlı bir sıra məqamlara toxundu: “Avroittifaq rəsmiləri çox yaxşı başa düşürlər ki, onların atdıqları addımlar regionda sülh prosesinə mane olur. Ermənistanı danışıqlardan uzaqlaşdırır. Ancaq buna baxmayaraq onlar çalışırlar ki, regionda Ermənistan vasitəsilə möhkəmlənsinlər. Ermənistan vasitəsilə Rusiyaya qarşı ikinci cəbhə açsınlar. Bu nöqteyi-nəzərdən onlar Ermənistanı gücləndirirlər. Onlar yaxşı bilirlər ki, hərbi baxımdan Gürcüstan vasitəsiilə regiona daxil olmaq mümkün deyil. Ona görə də bu oyunları Ermənistan üzərindən həyata keçirirlər. Bu nöqteyi-nəzərdən Ermənistanı hərbi cəhətdən gücləndirməyə çalışırlar. Bu günlərdə Fransa Gürcüstan vasitəsilə Ermənistana zirehli maşınlar göndərsə də, bütövlükdə bunda Avropa dövlətlərinin maraqları var. Ermənistan sərhədində patrul xidmətinin Azərbaycana görə gücləndirilməsinin heç bir əsası yoxdur. Guya Azərbaycan hücum edəcək. Halbuki, Avroittifaq yaxşı bilir ki, belə bir təhlükə yoxdur. Azərbaycanın heç bir ölkəni işğal etmək, ərazi bütövlüyünü pozmaq niyyəti yoxdur. Əksinə, Azərbaycanın 8 kəndi hələ də işğal altındadır. Bu baxımdan ədalətli olardı ki, Aİ rəsmiləri Ermənistana mesaj versinlər. Yəni işğal altında olan kəndləri azad etsin. Ancaq əfsuslar olsun ki, Avroittifaq qərəzli şəkildə Azərbaycanı ittiham etməklə məşğuldur. O baxımdan Borrelin səsləndirdiyi fikirlər nəinki qərəzli, həm də iyrəncdir. Qurumun məqsədi Ermənistanda hərbi baxımdan möhkəmlənməkdir. Eyni zamanda Rusiyaya yeni cəbhə açmaqdır”.
Vidadi ORDAHALLI
