Fransa kütləvi həbslərlə kanak xalqını sındırmağa çalışır...
Mübariz Göyüşlü: “Makron hökumətinin yürütdüyü irticaçı siyasətə qarşı çıxanları həbs etməsinə dünya səssiz qalmamalıdır”
Fransa Yeni Kaledoniyada müstəmləkəçiliyə qarşı mübarizə aparanlara qarşı misli görünməmiş zorakılıq həyata keçirib. Belə ki, Yeni Kaledoniya adasında baş verən iğtişaşların yüzlərlə iştirakçısı həbs edilib.
“The Guardian” xəbər verir ki, ali komissar Lui Le Frank keçirdiyi mətbuat konfransında iğtişaşlar zamanı 200 nəfərin həbs edildiyini, 64 jandarm və polisin yaralandığını bildirib. O, jandarm qüvvələrinin adada təxminən 5 min, paytaxt Noumeada isə 3-4 min etirazçı ilə qarşılaşdığını söyləyib.
Məlumata görə, etirazların üçüncü gecəsində dörd nəfərin öldürülməsinə, avtomobillərin yandırılmasına və talançılıq hallarına cavab olaraq Fransa Yeni Kaledoniyada fövqəladə vəziyyət elan edib. Ərazidə TikTok platformasına giriş məhdudlaşdırılıb.
“Mütərəqqi bəşəriyyət, beynəlxalq təşkilatlar, müxtəlif dövlətlər Fransanın bu amansız siyasətinə biganə qalmamalı, səslərini çıxarmalıdır”
Baş verənlərə şərh verən Müasir İnkişaf Birliyinin sədri Mübariz Göyüşlü “Bakı-Xəbər”ə bildirdi ki, bu hadisələr Fransanın qisasçı mövqeyini göstərir: “Fransanın Yeni Kaledoniya xalqına qarşı tətbiq etdiyi zorakılığın kökündə qisasçılıq dayanır. Bu ölkənin aksiyaçılara, öz haqlarını tələb edən insanlara qarşı zorakı davranışları, qanunsuz həbsləri beynəlxalq ictimaiyyət tərəfindən pislənməli, sərt tənqid edilməlidir. Fərqi yoxdur, istər Fransa, istərsə də digər müstəmləkəçi dövlət olsun, onların müasir dövrdə neokolonist siyasəti yürütməsi qəbuledilməzdir. Fransanın özü “insan haqları”, “demokratiya” məsələsini bahənə edib bundan başqa ölkələrə qarşı təzyiq vasitəsi kimi istifadə edən bir dövlət indi aksiya iştirakçılarına qarşı zorakılıq, qeyri-insani münasibət sərgiləyir. Hər addımda “demokratik dəyərlərdən” danışan Fransa özü bu gün demokratiyanı, insan hüquq və azadlıqlarını pozur, haqlarını tələb edən insanları kütləvi şəkildə həbs edir. Makron hökumətinin yürütdüyü irticaçı siyasətə qarşı çıxanları həbs etməsinə dünya səssiz qalmamalıdır”.
M.Göyüşlü bildirdi ki, Yeni Kaledoniya xalqına zülm edən Fransanın baş verənlərdə Azərbaycanı günahkar bilməsi gülünc məsələdir, çünki o aksiyaları Azərbaycan təşkil etməyib, o həmin xalqın haqq səsinə səs verib onu dünyaya çatdırılmasına dəstək olur. M.Göyüşlünün sözlərinə görə, orada Azərbaycan bayrağının dalğalanmasının həmin xalqın Azərbaycana, ölkəmizin onun haqq işinə verdiyi dəstəyə münasibətinin təzahürüdür. “Makron hökuməti bu iğtişaşlara görə özünü günahlandırmalıdır. Hökumətin bu cür amansız, qəbuledilməz siyasəti belə gərgin durumun yaranmasına səbəb olub. Bu ölkə mübariz insanların iradəsini qırmağa çalışır. Hesab edirəm ki, mütərəqqi bəşəriyyət, beynəlxalq təşkilatlar, müxtəlif dövlətlər Fransanın bu amansız siyasətinə biganə qalmamalı, səslərini çıxarmalıdır”-deyə M.Göyüşlü bildirdi.
İradə SARIYEVA
