Yeni "fransız absurdu" - özləri Qafqaza müdaxilə cəhdindən əl çəkmir, Azərbaycanı günahlandırır...
Azər Həsrət: “Azərbaycana şər-böhtan atmaqdansa, dönsünlər özlərinə baxsınlar”
Fransada antiazərbaycan siyasəti çox eybəcər hal alıb. Qərəzli, obyektivlikdən uzaq olan Fransa rəsmiləri ölkəmizi qaralamaqda az qala bir-biri ilə yarışa giriblər.
Belə ki, Fransa rəsmiləri, xüsusən də Daxili işlər və Dənizaşırı ərazilər naziri Jerard Darmanin rəhbərlik etdiyi Fransa jandarmalarının Yeni Kaledoniyada törətdiyi vəhşiliklərə haqq qazandıraraq, toqquşmaların səbəbi kimi xarici qüvvələri, o cümlədən Azərbaycanı göstərib. Adanın əsl sahibi olan kanakların fikirlərini dinləmək, onların istəklərinə hörmət etmək, ən əsası kolonial siyasətdən əl çəkmək əvəzinə başqa dövlətləri ittiham etmək riyakarlıqdır. “Azad fransız mediası” küçədə güllələnən kanakları göstərməkdən, yerli əhaliyə qarşı törədilən vəhşilikləri işıqlandırmaqdan imtina edir.
Makron hökuməti Yeni Kaledoniyada baş verənlərə görə Azərbaycanı ittiham etmək əvəzinə, demokratiya əleyhinə atdığı bu addımların necə biabırçı olduğunun fərqinə varsın. Bu ölkədə kanak xalqına qarşı məhvetmə siyasəti aparırlar və vəziyyət mövcud şəkil alıb, amma təəssüf ki, hökumət heç bunun fərqinə də varmır. Adanı istismar edirlər, xalqın iradəsini boğurlar, bunu görmürlər, amma gətirib baş verənləri Azərbaycanın adı ilə bağlayırlar. Əslində Azərbaycan o hadisələri körükləmir, sadəcə, kanak xalqının mübarizəsinin səsini dünyaya çatdırır. Halbuki, bunu özünü “demokratik” ölkə adlandıran Fransa özü etməlidir. Amma Fransa bunu etmir, əksinə, orda Tik-Toku, digər sosial şəbəkələri bağlayır, xalqın səsini boğur və sair.
Yeni Kaledoniyada problemin kökünü araşdırmaq, ona düzgün qiymət vermək əvəzinə Fransa Azərbaycana növbəti dəfə böhtan atıb.
Fransa Azərbaycanı ittiham edir və Azərbaycanı guya Fransanın daxili işlərinə qarışmaqda, müdaxilədə suçlayır. Guya Azərbaycan Fransanın daxili işlərinə qarışır. Bu iddiada olan Fransanın özü indiyə qədər nə edib və nə edir? Uzun illər Qarabağ məsələsi ilə bağlı Azərbaycanın daxili işlərinə müdaxilə edib, bu gün də yersiz, haqsız müdaxilələrdə bulunur. Erməni separatizmini illər boyu dəstəkləyib, indi də bu yolu tutur.
Fransa başqa ölkələrin içinə qarışmaqda çox həvəskardı. Elə "kiçik bacısı" Ermənistanın da işinə qarışır. Cənubi Qafqazda qarışdırıcılıqla məşğul olur. Özünün etdikləri daxili işlərə qarışmaq sayılmır, amma Azərbaycanı bunda ittiham edir.
“Görün Fransa nə qədər rəzil duruma düşüb ki...”
Siyasi şərhçi Azər Həsrət “Bakı-Xəbər”ə “Çox təəssüflər olsun ki, Fransa kimi demokratiya ənənələri olan bir dövlət Emmanuel Makronun rəhbərliyi dönəmində olduqca rəzil duruma düşüb. Görün, vəziyyət nə həddə çatıb ki, müstəmləkə altında tutduğu ərazilərdə baş verənlərə görə mətləbə və əraziyə dəxli olmayan, oralardan min kilometrlərlə uzaqda yerləşən Azərbaycan kimi bir dövləti ittiham edirlər. Görün Fransa nə qədər rəzil duruma düşüb ki, problemi özlərində görmək əvəzinə bunu mətləbə dəxli olmayan Azərbaycanda görür. Azərbaycan orada baş verənlərə müdaxilə etmir, yaxud Azərbaycan orada baş verənləri körükləndirmir. Sadəcə olaraq, bizim dövlətimiz dünyanın hər yerində tərəqqipərvər insanlarla həmrəydir və bu həmrəyliyi həmişə, hər bir platformada ifadə edib, edəcəkdir”-deyə bildirdi.
A.Həsrətin sözlərinə görə, yəni bunun Fransanın istibdad altında tutduğu Yeni Kaledoniyaya birbaşa dəxli yoxdur. A.Həsrətin fikrincə, yaxşı olar ki, Fransa dövləti Azərbaycanı haqsız yerə ittiham edəcəyinə dönüb özünə baxsın. Müsahibimiz vurğuladı ki, E.Makronun bu dövləti gətirib çıxardığı rəzil durumu yaxşı-yaxşı təhlil etmələrində fayda var. “Niyə Fransa kimi ənənələri, tarixi, gücü, qüdrəti olan bir dövlət bu qədər rəzil duruma düşdü? Bunun səbəbi nədir? Mənə elə gəlir ki, bunu araşdırsalar əsl səbəbi dərhal aşkar edəcəklər. Bu da Fransanın dəxli olmayan burnunu hara gəldi soxmasından qaynaqlanır. Yəni öz gözündə tiri görməyib Azərbaycan kimi dövlətlərin gözündə çöp axtaran Fransa nəhayətdə çanağın öz başında çatlayacağını bilməli idi. O baxımdan düşünürəm ki, Azərbaycana şər-böhtan atmaqdansa dönsünlər özlərinə baxsınlar. Eyni zamanda XXI yüzildə hələ də yad-yabançı, başqalarına aid olan torpaqları istibdad altında müstəmləkə olaraq tutmaqdan imtina etsinlər. Fransız xalqı o iddia edildiyi kimi böyük xalqdırsa, onun lideri də böyük xalqın lideridirsə, Fransa Yeni Kaledoniya da daxil olmaqla hazırda işğal altında saxladığı bütün torpaqlardan imtina etməlidir. O cümlədən də Korsika adasından, fransız Qvineyasından əl çəkməlidir. Təsəvvür edirsizmi, minlərlə kilometr uzaqda hələ də bunların müstəmləkələri var. Bir düşünsünlər. Azərbaycanı ittiham etməklə məsələ həll olunmur”-deyə A.Həsrət bildirdi.
İradə SARIYEVA
