Azad rayonlarımızda xarici kapitalın iştirakı genişlənir - daha bir fakt...
"Azərbaycan azad olunan ərazilərdə Belarusun şirkətlərini görmək istəyir". Bunu Azərbaycan Prezidenti İlham Əliyev belaruslu həmkarı Aleksandr Lukaşenko ilə geniştərkibli görüş zamanı deyib.
Prezident Əliyev qeyd edib ki, qarşılıqlı fəaliyyətin perspektivlərinə baxdıqda böyük potensialı, əmtəə dövriyyəsinin artmasını və sənaye kooperasiyasının, kənd təsərrüfatında əməkdaşlığın genişləndirilməsini görmək olar:
“Əlbəttə ki, biz azad edilmiş ərazilərin bərpasında Belarus şirkətlərinin, müəssisələrinin iştirakına şad olardıq. Nümayəndə heyətlərinin üzvləri bu məsələni də müzakirə ediblər”.
Bu arada, əksər ekspertlər hesab edir ki, Belarus şirkhətlərinin azad rayonlarda fəaliyyətə başlaması həm şəhərsalma, həm də digər sahələrdə faydalı ola bilər.
Eldəniz Əmirov: "Belarus şirkətlərinin də azad ərazilərdə fəaliyyət göstərməsi qeyd edilən istiqamətlərdə öz töhfəsini verəcək"
Tanınmış iqtisadçı Eldəniz Əmirov "Bakı-Xəbər"ə şərhində bildirdi ki, azad olunmuş ərazilərdə xarici şirkətlərin fəaliyyəti çox əhəmiyyətli və faydalıdır.
"İşğaldan azad olunmuş ərazilərimizə nə qədər xarici investisiya cəlb edilsə bir o qədər faydalıdır. O cümlədən, nə qədər çox xarici ölkələrin şirkətlərinin burada fəaliyyəti yenidənqurma və bərpa işində təmin olunsa, bu birmənalı olaraq Azərbaycanın xeyrinə olan bir prosesdir. Çünki burada həm həmin ölkələrin malik olduğu təcrübə bura daşınır, həm də proseslər sürətlənir. Həmçinin də həmin ölkələrlə strateji əməkdaşlıq daha da inkişaf edir. Bu baxımdan Belarus da istisna deyil. Belarus şirkətlərinin də azad ərazilərdə fəaliyyət göstərməsi qeyd edilən istiqamətlərdə öz töhfəsini verəcək"-deyə E. Əmirov bildirdi.
Elçin Bayramlı: "Belarusla əməkdaşlıq yaxşı nəticə verə bilər"
Araşdırmaçı jurnalist Elçin Bayramlı da "Bakı-Xəbər"ə bildirdi ki, Belarus şirkətlərinin bu sahəyə cəlb edilməsi effektiv nəticə verər. "Cənab Prezidentin çıxışı çox ciddi əsaslara dayanır. Həm siyasi, həm iqtisadi əhəmiyyəti var. Ona görə ki, əvvəla, Azərbaycana ən yaxın ölkələrdən biri Belarusdur, həmişə də belə olub. Bu ölkə ilə çox gözəl siyasi münasibətlərimiz, iqtisadi əməkdaşlığımız var. Mədəni əlaqələrimiz çox yüksək səviyyədə inkişaf edib, beynəlxalq təşkilatlarda bir-birimizi dəstəkləmişik. Bu, məsələnin siyasi tərəfidir. İqtisadi sahədə isə əməkdaşlığın artırılması ilə bağlı çox böyük potensial var. Çünki bizə coğrafi baxımdan elə də uzaq deyil, ortaq keçmişimiz, ümumi iqtisadi məkana daxil olmağımız kimi amillər var. İqtisadi sistemlərimiz bir-birinə çox yaxındır. Bundan başqa, Belarus bir sıra sahələrdə çox böyük imkanlara malikdir. Demək olar ki, sənayenin bütün sahələrində uğurları var, çox güclü hərbi sənaye kompleksinə malikdir. Ərzaq sektorunda, kənd təsərrüfatında, aqrar sənayedə çox böyük uğurlara nail olan bir ölkədir. İnnovativ texnologiyalardan tutmuş bir sıra sahələrdə ənənələrə malikdir. Yeyinti sənayesində çox böyük imkanları var.
Bu sahələrin inkişafı üçün Belarusla əməkdaşlıq edə bilərik. Ən nümunəvi aqrar sənaye ölkəsidir. Bizim də aqrar potensialımız çox yüksəkdir.
Üstəlik də azad olunmuş ərazilərdə bu sahədə çox böyük potensial mövcuddur. Ona görə də Belarus şirkətləri böyük təsərrüfatları, aqroparkları ilə birgə azad ərazilərdə fəaliyyət göstərə, əkinçilik, heyvandarlıq sahəsində, yeyinti emal sənayesi müəssisələrin açılmasında Belarusla əməkdaşlıq yaxşı nəticə verə bilər"-deyə müsahibimiz bildirdi.
İradə SARIYEVA
