Fransanın Azərbaycan iqtisadiyyatına investisiyası 1 ildə 77 dəfə artıb - inanılmaz...
Fikrət Yusifov: “Ola bilsin ki, fransız şirkətləri fəaliyyətdə olan müəssisələrə əlavə sərmayə qoyurlar”
Bu ilin ilk 9 ayı ərzində Azərbaycan iqtisadiyyatına yatırılan birbaşa xarici investisiyalar 4 milyard 522,6 milyon dollar olub. Belə ki, birbaşa xarici investisiyalar ötən ilin eyni dövrü ilə müqayisədə 150,3 milyon dollar artıb. Bu ilin ilk 9 ayında birbaşa xarici investisiyaların 28,8%-i (1 milyard 304 milyon dollar) Böyük Britaniyanın payına düşüb.
Burada diqqəti çəkən və maraq doğuran məqam odur ki, ötən ilin eyni dövrü ilə müqayisədə bu ilin ilk 9 ayında Fransanın Azərbaycan iqtisadiyyatına yatırdığı investisiyanın həcmi 77 dəfə artaraq 1,2 milyon dollardan 91,6 milyon dollara yüksəlib. Azərbaycan iqtisadiyyatına ən çox investisiya yatıran 10 ölkədən biri Fransadır. İki ölkə arasında olan gərgin münasibətlərə rəğmən, Fransanın Azərbaycan iqtisadiyyatına yatırdığı investisiyanın həcmi dəfələrlə artır. Ümumən, bu nədən irəli gəlir?
“Siyasətlə iqtisadiyyatın nə qədər vəhdəti olsa da, bəzən iqtisadi maraqlar siyasi maraqları üstələyə bilir”
Sözügedən məsələyə aydınlıq gətirən sabiq maliyyə naziri, professor Fikrət Yusifov “Bakı-Xəbər”ə açıqlamasında bununla bağlı bir sıra məqamlara toxundu: “Bütövlükdə, Azərbaycan iqtisadiyyatına yatırılan xarici investisiyaların həcminin artması müsbət bir tendensiyadır. Yəni bu, ümumi iqtisadiyyatımızın inkişafı üçün olduqca vacib bir şərtdir. O baxımdan bunu müsbət qiymətləndirirəm. O ki qaldı Fransa şirkətlərinin ölkəmizdə sərmayələrinin artmasına, bu, müəyyən məsələlərdən xəbər verir. Yəni Fransa-Azərbaycan münasibətlərində nələrin baş verməsindən asılı olmayaraq fransız şirkətləri ölkəmizdə fəaliyyət göstərir. Çünki Azərbaycan sivil bir dövlətdir. Fransanın başında dayananlar Azərbaycana qarşı qərəzli mövqedən çıxış edirlərsə, bu, o demək deyil ki, biz bu ölkə ilə bütün əlaqələri kəsməliyik. Təbii ki, iqtisadi əlaqələr davam edir və fransız şirkətləri Azərbaycanda fəaliyyət göstərməkdə çox maraqlıdır. Məsələ ondadır ki, inkişaf etmiş ölkələr üçün Azərbaycan sərmayələri yatırmaq baxımından daha münbit bir məkandır. Xüsusən inkişaf etmiş ölkələrin Azərbaycana yatırım etmək meyilləri güclüdür. Digər bir tərəfdən, Fransa şirkətləri çoxdandır Azərbaycanda fəaliyyət göstərirlər. Ola bilsin ki, fransız şirkətləri fəaliyyətdə olan müəssisələrə əlavə sərmayə qoyurlar. Hər halda biz fransız tərəfin yatırımları artırmasını görürük. Bu, həm də onu göstərir ki, siyasətlə iqtisadiyyatın nə qədər vəhdəti olsa da, bəzən iqtisadi maraqlar, siyasi maraqları üstələyə bilir. Bu, bütün dünyada belədir. Bəzən siyasi müstəvidə münasibətləri gərgin olan dövlətlər həvəslə iqtisadi sferada əməkdaşlıq edirlər. Məsələn, Çinlə ABŞ arasında nə qədər gərgin münasibətlər olsa da, amma onların ticarət əlaqələri davam edir. Azərbaycan da Fransa hökumətinin qərəzli mövqeyinə rəğmən, fransız iş adamlarının burdakı fəaliyyətini məhdudlaşdırmaq fikrində deyil. Biz belə məqamları siyasiləşdirmirik”.
Vidadi ORDAHALLI
