Gürcüstanda yeni prezident seçkisi ərəfəsində təlatüm yenidən qızışır...
Son parlament seçkilərindən sonra siyasi təlatümlərlə üzləşmiş Gürcüstan yeni daxili qalmaqala hazırlaşır. Söhbət prezident postu uğrunda başlanmaqda olan yeni mübarizədən və bunun yaratdığı gərginlikdən gedir.
Qeyd edək ki, dekabrın 14-də Gürcüstan altıncı prezidentini seçəcək. Gürcüstan Mərkəzi Seçki Komissiyası seçkiləri parlament binasında keçirəcək.
Gürcüstan parlamentinin sədri Şalva Papuaşvili deyib ki, bu dəfə prezident ilk dəfə dolayı yolla, 300 üzvdən ibarət seçki kollegiyası tərəfindən seçiləcək: “Parlament dekabrın 13-də payız sessiyasını bağlayacaq, dekabrın 14-də isə seçki kollegiyası Gürcüstan prezidentini seçəcək. Kollegiyaya bütün deputatlar daxildir. Prezident seçkiləri ilə əlaqədar bütün işlər tamamlanıb”. Gürcüstan Konstitusiyasına və qanunvericiliyin tələblərinə əsasən, seçki kollegiyasında parlamentin, Abxaziya və Acarıstan Muxtar respublikalarının Ali sovetlərinin, siyasi partiyalar tərəfindən irəli sürülmüş şəhər şuralarının üzvlərinin hamısı proporsional şəkildə təmsil olunmalıdır. Konstitusiyaya görə, namizəd birinci turda seçilmək üçün kollegiya üzvlərinin ən azı üçdə ikisinin səsini toplamalıdır. Prezidentliyə namizəd bu səsi toplaya bilməsə, ikinci tur keçiriləcək. Prezidentin andiçmə mərasimi dekabrın 29-da, seçki günündən sonra üçüncü bazar günü keçiriləcək. Dövlət başçısı bu vəzifəni 5 il müddətinə icra edəcək.
“Gürcü Arzusu-Demokratik Gürcüstan” Partiyası Gürcüstanın altıncı prezidenti vəzifəsinə Mixail Kavelaşvilinin namizədliyini irəli sürüb və onun namizədliyi artıq təsdiq olunub. Gürcüstanın indiki prezidenti Salome Zurabişvili isə dekabrın 16-dan sonra da postunu tərk etməyəcəyini bəyan edir. Bunlar fonunda diqqət çəkən daha bir məqam odur ki, Gürcüstan prezidentinin sarayının qarşısına bələdiyyə orqanları tərəfindən qatar qoyulub. Zurabişvili bu fonda qeyd edir: “Orbeliani meydanında, sarayın qarşısında mənimçün qatar qoyublar. Görək kim gedəcək!”. Gürcü mətbuatının məlumatına görə, qatar həqiqi deyil, ola bilsin ki, Tiflis meriyası tərəfindən Yeni il ərəfəsində quraşdırılan bayram tədbiri ilə əlaqədardır. Gürcüstan Dövlət Təhlükəsizliyi Xidməti isə bəyan edir ki, müəyyən qüvvələr prezident seçkiləri ərəfəsində vəziyyəti qarışdırmağa can atır: “Dağıdıcı və kriminal fəaliyyətin təşkilatçıları 2024-cü il dekabrın 14-də Gürcüstanda keçiriləcək prezident seçkilərinin qarşısını almağı planlaşdırırlar. Bu məqsədlə cinayət təşkilatçıları vəziyyəti mümkün qədər gərginləşdirməyi düşünürlər. Onlar bu çirkin niyyətləri nəticəsində aksiya zamanı 2-3 qurban verməyi belə planlaşdırırlar”. Dövlət Təhlükəsizliyi Xidməti əhalini cinayət planının iştirakçısı və ya qurbanına çevrilməmək üçün maksimum diqqətli olmağa, əllərində olan müxtəlif texniki vasitələrlə hər hansı şübhəli vəziyyəti və ya təxribat cəhdini qeydə almağa və dərhal müvafiq hüquq-mühafizə orqanlarına müraciət etməyə çağırır:
“Hazırda faktla bağlı Xüsusi İstintaq Xidməti tərəfindən araşdırma aparılır. İş üzrə obyektiv həqiqəti ən qısa müddətdə müəyyən etmək üçün sözügedən xidmətlə fəal əməkdaşlığa hazır olduğumuzu bildiririk”.
Seçkilərlə bağlı müxalifətlə yeni toqquşamalar da gözlənilir. Qeyd edək ki, noyabrın 28-də Gürcüstanda yeni etiraz dalğası başlayıb. Etiraz aksiyaları hər gün parlamentin yaxınlığında keçirilir və gecə saatlarına qədər davam edir. Əksər hallarda, xüsusən də aksiyanın ilk günlərində xüsusi təyinatlıların xüsusi texnikadan istifadə edərək nümayişçiləri dağıtması ilə başa çatıb. 300-dən çox adam saxlanılıb, bir neçəsinə qarşı cinayət işi açılıb. Həm etirazçılar, həm də polis tərəfindən xəsarət alanlar olub. Prezident seçkilərindən sonra aksiyaların daha da şiddətlənməsi proqnozlaşdırılır. Elə bu fonda müxalif “Atavari Arx” telekanalı isə qeyd edir ki, buna görə Gürcüstan hökuməti ölkədə fövqəladə vəziyyət və komendant saatı tətbiq etmək imkanını nəzərdən keçirir. Kanalın məlumatına görə, hakim “Gürcü Arzusu” Partiyası dekabrın 29-da Mixail Kavelaşvilini Gürcüstanın yeni prezidenti təyin etməyi planlaşdırır. Bundan sonra partiya fövqəladə vəziyyətin tərkib hissəsi kimi komendant saatı tətbiq etmək niyyətindədir. Gürcü politoloq Luka Exvaya isə qeyd edir ki, məsələyə Qərb yenə müdaxilə edərək, Gürcüstanda qeyri-sabit durum yaratmağa çalışır. O qeyd edir ki, mövcud geosiyasi şəraitdə ölkə öz mövcudluq kontekstini daha dəqiq başa düşməli və dünyadakı dəyişikliklərin ümumi mənzərəsini görməlidir. Exvaya iddia edir ki, Ukrayna və Suriya kimi, Gürcüstan da imperiya maraqlarının həyata keçirildiyi poliqona çevrilə bilər. Onun sözlərinə görə, bu gün Gürcüstanın üzləşdiyi təhlükə əvvəlkindən daha realdır. Politoloq vurğulayır ki, Qərb Gürcüstandan nə demokratiya, nə də liberallıq tələb edir. Əsas tələb Rusiyaya qarşı düşmən mövqe tutmaq və tam itaət göstərməkdir. Bu isə ölkəni ya hərbi poliqona, ya da marionet rejimə çevirə bilər: “Qərbin mesajı aydındır: ya bizimlə sonadək və fədakarlıqla birlikdəsiniz, ya da biz sizin hökumətinizi devirəcəyik. Seçim sizindir”.
Nahid SALAYEV
