Ermənistanın konstitusiya dəyişikliyi beynəlxalq müstəvidə bir daha bəyan edildi...
Abutalıb Səmədov: “Ermənistan konstitusiyasında Qarabağ Ermənistanın ərazisi kimi göstərilir, Azərbaycan da tələb edir ki, preambulada dəyişiklik olunsun”
Bakıda “Qayıdış hüququ - Ermənistandan zorla çıxarılan azərbaycanlılar üçün ədalətin təmin edilməsi” mövzusunda beynəlxalq konfrans keçirilib. Konfransın açılışında Prezident Administrasiyasının Siyasi partiyalar və qanunvericilik hakimiyyəti ilə əlaqələr şöbəsinin müdiri Ədalət Vəliyev Azərbaycan Prezidenti İlham Əliyevin konfrans iştirakçılarına müraciətini oxuyub.
Müraciətdə qeyd edilib ki, Ermənistan cəmiyyətində Azərbaycan xalqına qarşı dərin kök salmış nifrət hissi, mifik “böyük Ermənistan” xülyası, Ermənistan Konstitusiyasında Azərbaycana qarşı ərazi iddiasının hələ də qalması, bu ölkənin sürətlə silahlanması iki ölkə arasında dayanıqlı sülhün əldə olunmasını əngəlləyir. Bu o deməkdir ki Prezident Ermənistanın konstitusiyanı dəyişməsini sülh sazişi imzalanmasının pozulmaz şərti kimi bur daha dünyaya bəyan etdi.
“Azərbaycanın sülh sazişini imzalamasının qarşısında duran maneələrdən biri Ermənistan konstitusiyasında ölkəmizə qarşı ərazi iddialarının dəyişməməsidir”
Politoloq Abutalıb Səmədov “Bakı-Xəbər”ə açıqlamasında qeyd etdi ki, xeyli müddətdir Azərbaycanın sülh sazişini imzalamasının qarşısında duran maneələrdən biri Ermənistan konstitusiyasında ölkəmizə qarşı ərazi iddialarının dəyişməməsidir. Ermənistan konstitusiyasının preambulasında Ermənistanın müstəqillik bəyannaməsinə istinad var. Müstəqillik bəyannaməsində isə Ermənistan parlamentinin və Dağlıq Qarabağ parlamentinin birgə qərarına istinad var. Həmin qərarda da iddia olunur ki, Qarabağ və Ermənistan birləşmə haqqında qərar verib. Ermənistan konstitusiyasında Qarabağ Ermənistanın ərazisi kimi göstərilir. Azərbaycan da tələb edir ki, preambulada dəyişiklik olunsun, müstəqillik bəyannaməsinə istinad çıxarılsın və yerdə qalan sənədlər də dəyişdirilsin. Ən azı konstitusiyada qeyd edilən müddəa çıxarılmalıdır. Ermənistan uzun müddətdir ki, bunu etməmək üçün müxtəlif bəhanələr gətirir. Bugünə qədər də konstitusiyanı dəyişə bilməyəcəklərini deyirlər. Baxmayaraq, Ermənistan konstitusiyasının 102-ci maddəsində referenduma çıxarılacaq maddələrin siyahısı var. Orda preambula yoxdur. Preambulada dəyişiklik etmək üçün deputatların üçdə ikisinin səs çoxluğu ilə qərar qəbul etməsi kifayətdir. Istəsələr, bunu edə bilərlər. Sülh sazişinin qarşısında duran maneələri qısa müddətdə aradan qaldıra bilərlər, təəssüf ki, müxtəlif bəhanə ilə problemi uzadırlar. Onu da deyim ki, Azərbaycan xoş məram nümayişi kimi təklif etmişdi ki, birlikdə ATƏT-ə müraciət olunsun, Minsk qrupunun ləğvi məsələsi qaldırılsın. Məlumdur ki, Minsk qrupu 1992-ci ildə yaradılıb. Bu qrupun ləğv olunması üçün Nazirlər Şurası qərar qəbul etməlidir. Bir sözlə, Ermənistan müxtəlif bəhanələrlə münasibətlərin normallaşmasına mane olur. Ümid edək ki, 2025-ci ildə Ermənistan bu məsələləri həll etmək üçün özündə qüvvə tapacaq və sülh sazişini imzalayacaq”.
Günel CƏLİLOVA
