Azərbaycanın Almatı sənədinə münasibəti “Əl-Cəzirə” TV-də qərəzlə təhrif olundu...
İlyas Hüseynov: “Ermənistanın xarici işlər naziri Ararat Mirzoyanın Azərbaycanın 1991-ci il Almatı Bəyannaməsinin şərtlərinə riayət etməməsi ilə bağlı fikirləri tamamilə yolverilməzdir və böhtan xarakterlidir”
Sülh müqaviləsinin imzalanmasına maneçilik törətmək, yaxud onu ləngitmək üçün Ermənistan bütün vasitələrdən istifadə edir. İş o yerə çatıb ki, Ermənistan Almatı bəyannaməsinin mahiyyətini təhrif edərək saxtalaşdırır.
Ermənistanın xarici işlər naziri Ararat Mirzoyan “Əl-Cəzirə” telekanalına müsahibəsində sərhədlərin demarkasiyası prosesinin və razılaşdırılmış digər prinsiplərin həyata keçirilməsində hər hansı maneənin olub-olmaması sualına cavab verərkən deyib ki, təhrifə yol verilib. “Problem ondadır ki, Ermənistan və Azərbaycan liderləri Almatı Bəyannaməsi əsasında ərazi bütövlüyünün qarşılıqlı tanınmasını dəfələrlə təsdiqləsələr də, buna baxmayaraq, biz görürük ki, qonşularımız hələ də açıq və birmənalı şəkildə Almatı Bəyannaməsinə istinad etməkdən çəkinirlər.
Mirzoyan “Əl-Cəzirə”yə deyib ki, guya Azərbaycan 1991-ci ildə imzalanan Almatı bəyannaməsinin şərtlərini yerinə yetirməkdə maraqlı deyil. Təbii ki, bu tamamilə böhtandır. Azərbaycan özü bu sənədə imza atıb. Bu halda necə maraqlı olmaya bilər?
“Bu həm də informasiya manipulyasiyası anlamını verir”
Politoloq İlyas Hüseynov “Bakı-Xəbər”ə “Ermənistanın siyasi rəhbərliyində olan şəxslər dəfələrlə bir-birini təkzib edən bəyanatlar səsləndiriblər, ölkəmizə qarşı qarayaxma və böhtan kampaniyasını nümayiş etdiriblər. Bu gün də bu proses davam edir. Baxmayaraq ki, sülhlə bağlı da mühüm irəliləyişlər var, mühüm nəticələr göz qabağındadır. Lakin Ermənistan Azərbaycanın nüfuzuna zərbə vuracaq addımları da davam etdirir. Bu xüsusda Ermənistanın xarici işlər naziri Ararat Mirzoyanın Azərbaycanın 1991-ci il Almatı Bəyannaməsinin şərtlərinə riayət etməməsi ilə bağlı fikirləri tamamilə yolverilməzdir və böhtan xarakterlidir”-deyə bildirdi.
İ.Hüseynovun sözlərinə görə, çünki həm Praqa görüşündə, daha sonra Rusiyanın vasitəçiliyi ilə keçirilən görüşdə tərəflər arasında Almatı Bəyannaməsinə sadiqlik ifadə olunub. “Məsələn, Almatı Bəyannaməsi gündəmə çıxdıqdan sonra sərhədlərin delimitasiyası və demarkasiyası, kəndlərin müqəddəratının müəyyənləşdirilməsi, sülhlə bağlı proses yenidən canlandı, yeni fazaya daxil oldu. Bölgədəki reallıqları hər kəs, bütün geopolitik mərkəzlər qəbul etməyə başladılar ki, bizim aramızda bu razılaşma və razılaşmaya inam formalaşıb. Ona görə də, Ərəb dünyasının yaxından izlədiyi və diqqətlə nəzərdən keçirdiyi “Əl-Cəzirə” media orqanında Ermənistanın XİN rəhbərinin bu cür fikirləri Azərbaycanı mənfi bir məcrada göstərməyə yönəlib. Sanki Azərbaycan sülh istəmir, Azərbaycan ortada olan və razılaşdırılan fikirlərdən, tezislərdən boyun qaçırır, guya Azərbaycan aqressiv dövlətdir, bölgədə Ermənistan üçün təhdid yaradır. Yəni bu fikirləri, normativləri Ermənistan uzun müddətdir ki, inkişaf etdirir, eyni zamanda bu həm də informasiya manipulyasiyası anlamını verir. Ona görə də bu cür yanaşmalar tamamilə qəbuledilməzdir və Ermənistanın xarici işlər naziri Azərbaycana qarşı əks-təbliğat kampaniyası aparmağa da son qoymalıdır”-deyə İ.Hüseynov vurğuladı.
İradə SARIYEVA
