Kavano 2000-ci ildə Ağdamdan o daş parçasını Heydər Əliyevə nə məqsədlə gətirmişdi...
Elşən Manafov: “Məqsəd Azərbaycanı kompromislərə, güzəştlərə hazırlamaq idi”
Məlum olduğu kimi, 24 il əvvəl ABŞ Dövlət Departamentinin xüsusi nümayəndəsi, keçmiş Minsk Qrupunun həmsədri Kerri Kavano tərəfindən mərhum prezident Heydər Əliyevə təqdim olunan bir parça daş Ağdam Cümə məscidinə qaytarılıb.
Ağdam Cümə məscidinə aid olan daş parçası işğal dövründə - 9 may 2000-ci il tarixində Azərbaycan xalqının ümummilli lideri Heydər Əliyevə təqdim olunub.
Məlumat üçün qeyd edək ki, K.Kavano 24 il əvvəl Ağdam Cümə məscidinə aid olan həmin daş parçasını ulu öndər Heydər Əliyevə təqdim edərkən “Bu, Ağdamdakı məsciddən kiçik bir hissədir. Bu, bizim bərpa etmək arzusunda olduğumuz torpağın bir hissəsidir. Ümid edirik ki, o böyük məscidin özü geri qaytarılacaq”, - ifadələrini işlətmişdi.
Maraqlıdır, Kavano 2000-ci ildə Ağdamdan o daş parçasını Heydır Əliyevə nə məqsədlə gətirmişdi?
“İkinci Qarabağ müharibəsi zamanı Kavano böyuk dövlətlərin Qarabağın Bakının nəzarətinə...”
Sözügedən məsələyə aydınlıq gətirən politoloq Elşən Manafov “Bakı-Xəbər”ə açıqlamasında bununla bağlı bir sıra məqamlara toxundu: “Zamanında ABŞ Dövlət Departamentinin xüsusi nümayəndəsi, ATƏT-in Minsk Qrupunun amerikalı həmsədri olan Kerri Kavano Birləşmiş Ştatların erməni diasporası ilə sıx əməkdaşlıq edən diplomatlardan biri olub. Kovano o daş parçasını Əliyevə verəndən 11 ay sonra ABŞ-da iki ölkənin dövlət başçılarının görüşü keçirildi. Məqsəd Azərbaycanı kompromislərə, güzəştlərə hazırlamaq idi. O, 2001-ci ilin aprelində ABŞ-ın Ki Uest şəhərində Azərbaycan və Ermənistan prezidentləri - Heydər Əliyev və Robert Köçəryan arasında baş tutmuş görüşün əsas təşkilatçilarindan biri olub. Həmin göruşdə ABŞ Azərbaycana, Laçın da daxil olmaqla, bütün Qarabağ torpaqlarının Ermənistana birləşdirilməsi və ya Dağlıq Qarabağa müstəqilliyə yaxın statusun verilməsini təklif edib. Heydər Əliyev tərəfindən bu təkliflərə verilən rədd cavabı 4 gün davam edən bu danışıqların nəticəsiz bitməsinə səbəb olub. Bu uğursuzluq Kavanoya baha başa gəlid. Departament onu diplomatik xidmətdən uzaqlaşdırdı. Dövlət Departamentində ona 1995-ci il Davos razılaşmasının şərtlərinin Qarabağ probleminə tətbiqi həvalə edilmişdi. Lakin H.Əliyev faktoru bu məkrli niyyətlərin qarşısını almış oldu. Sonralar, daha dəqiq desək, 2006-cı ildən Kavano təhsil sahəsində fəaliyyətə keçib. İkinci Qarabağ müharibəsi zamanı Kavano böyuk dövlətlərin Qarabağın Azərbaycanın nəzarətinə keçməsinə imkan verməyəcəklərini bildirib. Bütün bunlar onun Azərbaycanın dostu deyil, erməni diasporasının maliyyə dəstəyindən mənfəət güdən birisi olduğunu göstərir. Zamanında Ağdam məscidinin bir parçasını H.Əliyevə təqdim edib. Bizlərin o məscidlərə sahib olacağımızla bağlı açıqlamalarına gəlincə, bu həm də müəyyən məna kəsb edir. Bu zaman Taleyranın “Dil diplomata öz fikirlərini gizlətmək və ya onu birmənalı olmayaraq çatdırmaq üçün verilib” kəlamı yada düşür”.
Vidadi ORDAHALLI
