Bakıdan Parisə, Afina və Dehliyə sərt mesaj - “sizi gözləməyəcəyik”...
Ramil Hüseynov: “Bu, ölkə başçısı tərəfindən Ermənistanı himayə edənlərə ünvanlanan ciddi mesajdır”
Fransa, Hindistan və Yunanıstan Ermənistanı bizə qarşı silahlandırır, biz oturub gözləyə bilmərik. Bu sözləri Prezident İlham Əliyev aprelin 23-də ADA Universitetində təşkil olunan “COP29 və Azərbaycan üçün Yaşıl Baxış” mövzusunda beynəlxalq forumda çıxışında deyib.
Həmin ölkələrin bunu açıq şəkildə həyata keçirdiklərini vurğulayan dövlət başçısı qeyd edib: “Özü də onlar bunu açıq və nümayişkaranə şəkildə edirlər və hətta çalışırlar ki, bununla bizə nə isə sübuta yetirsinlər. Biz sadəcə oturub gözləyə bilmərik. Biz bu mövqeyi açıq şəkildə Ermənistan hökumətinə və Ermənistanın bu gün qayğısına qalmağa çalışan tərəflərə bildirmişik. Əgər özümüzə ciddi təhdid görsək, biz ciddi tədbirlər görməli olacağıq”.
“Verilən hücum silahları bizə ciddi təhdid yaradır, o zaman həmin silahlar yerindəcə məhv ediləcək”
Sözügedən məsələni “Bakı-Xəbər”ə şərh edən “Yeni Xətt” Müstəqil Siyasi Tədqiqatlar Mərkəzinin rəhbəri Ramil Hüseynovun fikrincə, bu, ölkə başçısı tərəfindən Ermənistanı himayə edənlərə ünvanlanan ciddi mesajdır: “Əvvəla, bu ölkələrin necə ermənipərəst mövqedən çıxış etmələri kifayət qədər bəllidir. Xüsusən də Fransa ilə Yunanıstanın ortaq mövqedən çıxış etməsi həm də türk düşmənçiliyindən irəli gəlir. Çünki tarixən bu dövlətlər ermənilərlə birlikdə Osmanlı imperiyasına, daha sonra Türkiyəyə qarşı ortaq mövqedən çıxış ediblər. Bu iki dövlət Ermənistanı Türkiyəyə qarşı həm də bir alət kimi istifadə edir. Hindistana gəldikdə isə, bu dövlətin Ermənistan sevgisi Pakistan amili ilə əlaqədardır. Məsələ ondadır ki, Pakistanla Azərbaycan arasında olan yaxın münasibətlər rəsmi Dehlini qıcıqlandırır. Halbuki, iki ölkənin yaxın münasibətlərə malik olması Hindistana hansısa təhdid yaratmır. Azərbaycanın daha önəmli nəqliyyat dəhlizləri üzərində yerləşdiyini nəzərə alsaq, Hindistan bu amili nəzərə almalı idi. Ancaq əfsuslar olsun ki, hər üç ölkə nümayişkaranə şəkildə Ermənistanı silahlandırır, hərbi baxımdan himayə edir. Təbii ki, onların bu fitnəkarlığı Ermənistanın hərbi baxımdan Azərbaycanı üstələməsinə gətirib çıxarmayacaq. Ən azından ona görə ki, Azərbaycan yerində durmur. Ordumuz daim gücləndirilir və ən müasir silahlar alınır. Ancaq biz görsək ki, Ermənistana verilən hücum silahları bizə ciddi təhdid yaradır, o zaman həmin silahlar yerindəcə məhv ediləcək. Ermənistan ərazicə elə böyük ölkə də deyil ki, strateji dəriniyə malik olsun. Yəni onlara verilən silahları gizlədə bilsin. Ona görə də Ermənistan silahlanmaqda davam edərsə, bu onlara baha başa gələcək”.
Vidadi ORDAHALLI
