Elçin Qurbanov: "Yerli hüquqi bazanın təkmilləşdirilməsi və inkişaf etdirilməsi tədbirləri dinamik olaraq həyata keçirilir"
"Global Terrorism Index 2024" (GTI) hesabatı ilə dövlətlərin terror təhlükəsinə görə növbəti reytinq sıralanması açıqlanıb.
GTI reytinq sıralanması indeksləri terror hadisələri, ölümlər, ağır nəticələr, girovlar, terrorçuluqla mübarizə, terrorçuluğun araşdırılması effektivliyi və digər çoxsaylı göstəricilər üzrə qəbul edilmiş mürəkkəb hesablamalara əsaslanır. Azərbaycan terror təhlükəsi üzrə qeyd olunan sıralamada "0" indekslə sonuncu - 89-cu yerdə Danimarka, Finlandiya, Qətər kimi ölkələrlə birgə qərarlaşmaqla, dünyada terrorla bağlı ən təhlükəsiz ölkələrdən biri kimi ən yüksək reytinqə sahiblənib.
Daha öncə Avropa Şurasının "Çirkli Pulların Yuyulmasına və Terrorizmin Maliyyələşdirilməsinə qarşı Tədbirlərin Qiymətləndirilməsi üzrə Ekspertlər Komitəsi"nin (MONEYVAL) Azərbaycan üzrə uzun müddət gözlənilən son 5 il üzrə qiymətləndirmə nəticələrinə görə hesabatı açıqlanmış, terrorçuluğun maliyyələşdirilməsi cinayətlərinin araşdırılması kriteriyası üzrə nəticələr yüksək qiymətləndirilmişdi. Hesabatda "Azərbaycan qeyd olunan cinayətlərlə mübarizədə yüksək səviyyədə effektivliyə nail olub və bu cinayətlərin araşdırılmasının uğurla aparılması bacarıqları nümayiş etdirilib" qeyd edilmişdi.
Azərbaycan sadalanan göstəricilər üzrə dünyada ən yüksək daxili təhlükəsizlik reytinqinə yüksəlməsinin sirri nədədir?
Ekspert Eçin Qurbanov "Bakı-Xəbər"ə açıqlamasında bildirdi ki, terrordan heç bir dövlət sığortalanmayıb: "Bəzən böyük siyasi ambisiyalar üçün terror alət kimi də istifadə olunub. Buna 1-ci Dünya savaşından başlamış 21-ci əsrdə hərbi müdaxilələrə və işğallara yol açan hadisələri, son dövrlər isə terorun İslamafobiya fonunda cərəyan edən təbliğat işini misal göstərmək olar.
Rəsmi açıqlamaya diqqət etsəniz ƏL TMM probelmlərinin inkişaf arealına görə, hələ başqa ölkələri demirəm, dünyada demokratiyanın beşiyi sayılan, insan haqlarının müdafiəçisi kimi çıxış edən, iqtisadiyyatın liberal əsaslarla təşkilini həyata keçirən Fransanın 38-ci, ABŞ 30-cu yerdə qərarlaşdığına şahid olarsınız.
Qeyd olunan sıralamada İran (4.464) 26-cı, Türkiyə (4.168) 29-cu, ABŞ (4.141) 30-cu, Rusiya (3.016) 35-ci, Fransa (2.647) 38-ci, Norveç (1.747) 53-cü, Ermənistan (0.423) 76-cı, Birləşmiş Ərəb Əmirlikləri (0.233) 79-cu, Litva (0.059) 87-ci yerdə qərarlaşıb.
Avropa Şurasının "Çirkli Pulların Yuyulmasına və Terrorizmin Maliyyələşdirilməsinə qarşı Tədbirlərin Qiymətləndirilməsi üzrə Ekspertlər Komitəsi" nin (MONEYVAL) cinayət yolu ilə əldə edilmiş əmlakın leqallaşdırılması, terrorçuluğun maliyyələşdirilməsi cinayətləri üzrə Azərbaycanın uzun müddət gözlənilən son 5 il üzrə qiymətləndirmənin yüksək səviyyəsinə gəlincə, etiraf etmək lazımdır ki, Azərbaycan həqiqətən də qeyd olunan cinayətlərlə mübarizədə yüksək səviyyədə effektivliyə nail olub. Uğurlarımız təsadüfi deyil. Azərbaycan bu sahədə çox ciddi addımlar atıb. Cinayət yolu ilə əldə edilmiş əmlakın leqallaşdırılmasına və terrorçuluğun maliyyələşdirilməsinə qarşı mübarizə haqqında Qanun qəbul olunub. Qanunvericilikdə bu sahədə cinayətlərin qarşısının alınması məqsədilə monitorinq iştirakçılarının, öhdəlik daşıyan və digər şəxslərin hüquq və vəzifələri, öhdəlikləri aydın şəkildə təsbit olunub. Beynəlxalq miqyasda cinayət yolu ilə əldə edilmiş əmlakın leqallaşdırılmasına və terrorçuluğun maliyyələşdirilməsinə qarşı mübarizə sahəsində maliyyə monitorinqi orqanları arasında məlumat və sənəd mübadiləsinin və texniki əməkdaşlığın, eləcə də bu qurumların fəaliyyət səmərəliliyinin və potensialının gücləndirilməsi məqsədilə yaradılan Maliyyə monitorinqi orqanlarının Eqmont Qrupu, Hökmətlərarası müstəqil qurum FƏTF və digər beynəlxalq qurumlarla yaxından əməkdaşlıq edir. Yerli hüquqi bazanın təkmilləşdirilməsi və inkişaf etdirilməsi tədbirləri isə dinamik olaraq həyata keçirilir.
Bir sözlə, Azərbaycanda ƏL TMM (Cinayət yolu ilə əldə olunmuş əmlakın leqallaşdırılması və terrorçuluğun maliyyələşməsi ilə mübarizə) sahəsində , iqtisadi terorçuluğa və onun fakultətiv nəticələrinə səbəb ola biləcək ictimai təhlükəsiliyin pozulması hallarına qarşı çox ciddi tədbirlər görülür. Ölkəmiz çoxsaylı elmi-praktik konfranslara ev sahibliyi edib. Məsuliyyətlə deyə bilərəm ki, Azərbaycan bu barədə beynəlxalq standartların müəyyən etdiyi qaydalara və indikatorlara qarşı çox həssasdır. Bütün dövlət və digər qurumlarda, təşkilatlarda çirkli pulların yuyulması ilə mübarizə çərçivəsində daxili və kənar maliyyə nəzarəti tədbirlərini həyata keçirən funksional struktur vahidləri yaradılıb . Maliyyə Monitorinqi Xidməti bütün qurumlarla və təşkilatlarla əməkdaşlıq edir və təcrübə mübadiləsi həyata keçirilir. Əlbəttə, son dövrlər bu porblemlərin bir qanadı olan kiber cinayətlərin artması təhlükəsizliklə bağlı daha ciddi tədbirlərin görülməsi üçün zəmin yaradıb. Bu məsələdə vətəndaşlar da olduqca diqqətli və tədbirli olmalıdırlar. Hesab edirəm ki, ixtisaslaşdırılmış qurumların birgə iştirakı ilə ictimaiyyətin bu sahədə maarifləndirilməsi işi də təşkil olunmalıdır".
Məhəmmədəli QƏRİBLİ
