Bayden indi də bədbəxt Qəzzalılara "müvəqqəti liman" tikir...
ABŞ Prezidenti Co Bayden bəyan edib ki, Qəzza sakinlərinə ərzaq çatdırmaq üçün Aralıq dənizinin sahilində "müvəqqəti liman" tikiləcək. Ağ Ev rəhbəri bununla guya Yaxın Şərqdəki acınacaqlı humanitar böhranı önləmək istəyir. Amma bəllidir ki, bu "müvəqqəti liman" ideyası həm də ABŞ-ın insan qırğınlarına göz yummaq siyasətini malalamaq üçün atılan bir addımdır. “Bakı-Xəbər” Media Qrupunun rəhbəri, politoloq Aydın Quliyev öz Facebook səhifəsində bu mövzu barədə fikirlərini paylaşıb. A.Quliyev yazır: "Qərbin bər- bəzəkli vədlərinə uymaq olmaz. Özünə yol seçmək istəyən ölkələr üçün bunu bilmək çox vacibdir. On illərlə Azərbaycana təlqin etdilər ki, "demokratiya" olmasa, Qarabağ problemini həll edə bilməyəcəksiniz. Onlar "demokratik prosedurlar" altında dövlətimizi sonadək zəiflətmək və Ermənistanın işğalını bizə qəbul etdirmək məqsədini güdürdülər. Sonda nə oldu? Azərbaycan sübut elədi torpaqların işğaldan azadlığı və süverenliyin bərpası demokratiya məsələsi deyil, bu bir KİŞİLİK MƏSƏLƏSİDİR.
Qərbin bər- bəzəkli demokratiya şüarlarına uyan Gürcüstan nə əcəb ərazi bütövlüyünü bərpa edə bilmədi? Hələ bu gün də bel sütunu sınmış şikəst kimi ortada qalıb.
Hələ də qoltuğuna verib ortaya atdıqları Ukraynanın qeyri - müəyyən gələcəyi üzərində oyun oynayırlar. Biri deyir yardım eliyək, o biri deyir yox ,bizim dövlət prosedurları buna imkan vermir.Biri deyir Putin qalib gəlsə, bütün Avropanın anasını ağlar qoyacaq, o biri götürüb iki alman zabitinin Malayziyada "telefon məzələnməsini" həqiqətən Krım Körpusunun vurulmasına hesablanmış hazırlıq kimi təsdiqləyir və beləliklə Putinin "dəyirmanına su tökür". Əgər siz Putinin məğlub olmasını istəyirsinizsə, Krım korpusu niyə də vurulmasın, məgər Krım Rusiyanındır?!Bu ikibaşlı və hoqqabaz oyunlarla Ukrayna xalqını zəlil gününə qoydular.
Hələ bu Baydenə bir baxın....Qəzzanın milyonlarla ac insanına təyyarələrlə qida tökəndən sonra ( halbuki bu üsulla Afrika meşələrindəki heyvanları aclıqdan qoruyurlar) göstəriş verib ki, Qəzzalılara ərzaq çatdırmaq üçün Aralıq dənizinin sahilində "müvəqqəti liman" tikilsin . Baxın haaa. Həm də müvəqqəti. Müharibə başlayan kimi özü də, Blinken də tələsik İsrailə gəldilər, əllərini Natenyahunun çiyninə qoyub "buralarda istədiyini edə bilərsən" mesajını verdilər, milyonlarla insanın həyatını məhv edəndən sonra isə İsrailin "ipini yığmağa" gücləri, istəkləri guya yetmədi, başlayıb indi də "liman tikir"...
Bütün bunlardan dərs götürülməli, nəticə çıxarılmalıdır.....
Hər bir ölkənin öz modeli olmalıdır, istər demokratik, istər qeyri- demokratik...."
Mətləb
