"Ərin 3 minlik telefon almayıbsa, boşana bilərsən" - efirdə belə söz demək olar?..
ARB kanalının efirində yayımlanan "Günə son" verilişində psixoloqun çıxışı müzakirələrə səbəb olub. Psixoloq Əfsanə Rüstəmova boşanma səbəblərindən danışarkən 3 min manatlıq telefona görə boşanmaya haqq qazandırıb:
“Emosinoal ehtiyacı ödənməyən qadının boşanma kimi hüquqi bir haqqı var. Əgər mənim 3 minlik telefon kimi emosional bir ehtiyacım varsa, həyat yoldaşım ya onu mənə almalıdır, ya da mənim imtina etmək kimi bir şansım var" .
Psixoloqun bu sözləri verilişin aparıcısı və qonaqları tərəfindən kəskin etirazla qarşılanıb. Ə.Rüstəmovanın çıxışı sosial şəbəkələrdə də kəskin tənqid edilib.
Nəzərə almaq lazımdır ki, hazırda ölkədə hər kəsin maddi durumu imkan vermir ki, həyat yoldaşına onun emosianal ehtiyacı ödəmək üçün 3 minlik telefon alsın. Ayda 500-800 manat maaş alan şəxs bahalı telefonu necə ala bilər?
Psixoloqun məlum fikri istər-istəməz bəzi şəxslər üçün əsas götürüləcək və həyat yoldaşı onun emosional ehtiyacını ödəmək üçün bahalı hədiyyə almazsa məhkəməyə üz tutacaq. Beləliklə, boşanmaların sayı daha da artacaq.
Onu da qeyd edək ki, bu gün psixoloqların sayı durmadan artır. Səbəbi də odur ki, istənilən şəxs hansısa 3 aylıq kursda iştirak edib sertifikat əldə edir və olur psixoloq və sosial şəbəkə və ya efirlərdə “ailə”, “ailə dəyəri”, “qısqanclıq” kimi mövzularla bağlı fikir bildirirlər. Normal düşüncəyə sahib şəxslər bu kimi psixoloqları qınayacaq. Təəssüf ki, bəziləri isə həmin psixoloqların sözünün arxasınca gedəcək və beləliklə ailə dəyərləri tamamilə məhv olacaq.
Könül İsmayılova: “Bəzi xanımlar bahalı telefon ifadəsini əlində “bayraq” edib boşanmaq üçün məhkəməyə üz tutacaq”Psixoloq Könül İsmayılova “Bakı-Xəbər”ə açıqlamasında qeyd etdi ki, bəzi psixoloqlar gündəmdə qalmaq üçün bilərəkdən insanlarda qıcıq yaradacaq ifadələr işlədir: “Sosial şəbəkədə, mediada həmin psixoloqun səsləndirdiyi fikir bir neçə gün müzakirə olunacaq və beləliklə o məşhurlaşacaq. Həmin ifadə ilə psixoloq özünü reklam etdi və bacardı da”.
Həmsöhbətimiz qeyd etdi ki, bu gün ölkədə peşəkar psixoloq problemi yaşanır. Ölkədə psixoloq çoxdur, ancaq peşəkar, öz sahəsinin mütəxəssisi olduqca azdır: “Ümumiyyətlə, psixoloqluq özbaşına bir sahədir, heç bir nəzarət yoxdur, alver, biznes, gəlir mənbəyi olub. Bəzi psixoloqların özlərinin müalicəyə ehtiyacı var. Onların fəaliyyəti cinayətdir. “Həyat yoldaşım 3 minlik telefon almırsa, boşanmaq kimi şansım var” fikri boşanmaların sayını artıracaq. Bəzi xanımlar bahalı telefon ifadəsini əlində “bayraq” edib boşanmaq üçün məhkəməyə üz tutacaq. Bu səbəbdən də hesab edirəm ki, psixoloqları da müəllimlər kimi sertifikasiya etsinlər. O zaman peşəkar psixoloq kimdi, bəlli olacaq”.
Fatimə Hacıbəyli: “Telefon almır deyə ayrılmaq nədir, bu bir qadının tərbiyəsizliyi və özbaşınalığıdır”“Vəfa” Sosial İctimai Birliyinin sədri Fatimə Hacıbəyli “Bakı-Xəbər”ə açıqlamasında qeyd etdi ki, gündəmi zəbt edən xanım psixoloq açıq-aşkar boşanmağı təbliğ edir: “Özü də nəyin üstündə - 3 minlik telefona görə. Xanım ərə gedəndə həyat yoldaşının maddi durumunun necə olduğunu bilmirdi? Bilmirdi ki, həyat yoldaşının maddi durumu ona bahalı hədiyyə almağa imkan verir ya yox? Telefon almır deyə ayrılmaq nədir? Bu, bir qadının tərbiyəsizliyi və özbaşınalığıdır. Ailə maddiyyat üzərində qurulan münasibət deyil. Ailə münasibətində xüsusi dəyərlər var. Bu, istək, eyni zamanda hörmət üzərində qurulan münasibətlərdir”.
Günel CƏLİLOVA
