Səudlar və Əmirliklər Putini həbs edə bilərmi?
Qulamhüseyn Əlibəyli: “Nə Səudiyyə Ərəbistanı, nə də BƏƏ BCM-nin sənədlərini təsdiq edib”
Rusiya prezidenti Vladimir Putin neft məsələsinin də gündəmdə olacağı BƏƏ və Səudiyyə Ərəbistanına işgüzar səfərə gedib. V.Putin BƏƏ və Səudiyyə Ərəbistanına səfərləri zamanı ikitərəfli münasibətləri və Yaxın Şərq nizamlanmasını müzakirə edəcək.
O da məlumdur ki, Beynəlxalq Cinayət Məhkəməsi (ICC) Rusiya Prezidenti Vladimir Putini Ukraynada törədilmiş hərbi cinayətlərə görə cavabdeh olmaqda ittiham edərək həbsinə order verib. Haaqa Məhkəməsi Putini uşaqların qanunsuz deportasiyası və insanların Ukraynadan Rusiyaya qanunsuz keçirilməsində şübhəli bilərək həbsi barəsində qərar çıxarıb. Belə olan halda Putin nəyə arxayındır ki, Səudiyyə Ərəbistanı və BƏƏ-də onu həbs etməyəcəklər?
“O üzdən, Putin belə arxayıncasına həmin ölkələrə səfər etməyə cəsarət edir”
Məsələ ilə bağlı “Bakı-Xəbər”ə açıqlama verən sabiq millət vəkili, hüquqşünas Qulamhüseyn Əlibəyli bunu belə izah etdi: “Beynəlxalq Cinayət Məhkəməsinin qərarları və verdiyi orderlər, həmin cinayət məhkəməsinin üzvü olan, yəni onun nizamnaməsini, statusunu təsdiq edən dövlətlər üçün məcburi xarakter daşıyır. Ancq məsələ ondadır ki, nə Səudiyyə Ərəbistanı, nə də BƏƏ Beynəlxalq Cinayət Məhkəməsinin sənədlərini təsdiq etməyib. Ona görə də Beynəlxalq Məhkəmənin Putinlə bağlı verdiyi qərar həmin ölkələrə şamil olunmur. O üzdən, Putin belə arxayıncasına həmin ölkələrə səfər etməyə cəsarət edir. Digər tərəfdən, indi dövlət başçısının başqa ölkə ərazisində həbs edilməsi çox böyük skandala səbəb olan hadisədir. O baxımdan hesab edirəm ki, dövlət başçılarının səfərləri qabaqcadan razılaşdırılır. O cümlədən, təhlükəsizlik məsələləri də razılaşdırılır. Putin əmin olsaydı ki, BƏƏ-də və Səudiyyə Ərəbistanında onun üçün hansısa təhlükə var, hər halda ora getməzdi. O heç vaxt bu risqi gözə almazdı. O baxımdan hesab edirəm ki, bütün bunlar qabaqcadan həm düşünülüb, həm də ölkələr arasında razılaşdırılıb”.
Vidadi ORDAHALLI
