Azərbaycan bütün qitələrdə olmalıdır - yeni diplomatik hədəf göstərildi...
Elşad Musayev: “Bütün bunlar o deməkdir ki, Azərbaycan daha fəal xarici siyasət kursu yeridəcək”
Prezident İlham Əliyev VII çağırış Milli Məclisin ilk iclasındakı çıxışında deyib ki, bundan sonra xarici siyasətdə geriyə heç bir addım olmayacaq: “Dostlarımızın bütün qitələrdə sayı artır. Biz indi - İkinci Qarabağ müharibəsindən və suverenliyimizi bərpa edəndən sonra daha fəal xarici siyasət aparacağıq. Vaxtilə mövcud olmadığımız bölgələrlə indi çox ciddi təmaslar qurulur, həm sərmayə qoyuluşu layihələri nəzərdən keçirilir, eyni zamanda, müxtəlif sahələrdə əməkdaşlıq üçün yeni imkanlar yaranır. Təbii olaraq, ənənəvi tərəfdaşlarımızla, dostlarımızla münasibətlərimiz yerindədir və daha da inkişaf edir və edəcək”.
Görünən odur ki, Prezident yeni diplomatik hədəf göstərdi. Bunun mahiyyəti ondan ibarətdir ki, Azərbaycan bütün qitələrdə mövcud olmalıdır.
“Ölkəmizun maraqlarına uyğun olaraq bütün qitələrdə qəti, ardıcıl mövqe sərgilənəcək”
Sözügedən məsələni “Bakı-Xəbər”ə şərh edən Böyük Azərbaycan Partiyasının sədri, millət vəkili Elşad Musayev qeyd etdi ki, Prezident Əliyev Milli Məclisdə çıxışında bir sıra məsələlərə toxundu: “Əsasən ölkənin qarşısında duran vəzifələri qeyd etdi. O cümlədən, ilk növbədə hansı işlərin görülməsinin vacib olduğunun siqnallarını verdi. Cənab Prezident birinci növbədə hərbi gücün artırılmasını bir vəzifə kimi gördüyünü qeyd etdi. Ümumən vəzifələri saydı. Təqribən 7 vəzifəni özüm üçün qeyd etdim. Ölkənin qarşısında duran əsas vəzifə kimi, hərbi gücün artırılmasını xüsusi qeyd etdi. Bu ondan xəbər verir ki, hələ də bölgədə bir gərginlik var. O cümlədən, dünyada gərginlik var. Bu baxımdan hərbi güc vacib şərtdir. Üstəlik, Ermənistanın revanşist, təxribatçı siyasəti davam edir. Ona görə də vacib şərt kimi hərbi gücün artırılmasını qeyd etdi və görülən işlər barədə məlumat verdi. Xüsusi təyinatlılar və yeni yaradılan komando birlikləri barədə məlumat verdi. Texnoloji inkişafla bağlı məqamlara toxundu. İkinci vəzifə kimi, sərhədlərin qorunmasını bildirdi. Eyni zamanda ölkə başçısı indiyə qədər quru sərhədlərinin açılmamasının səbəblərinə aydınlıq gətirdi. Məlum oldu ki, sərhədlərin açılmaması nəticəsində böyük fəlakətlərin qarşısı alınıb. Ermənistan da hərtərəfli silahlandırıldığı üçün başqa təxribatlar da ola bilər. Üçüncü vəzifə ideoloji təhlükəsizliklə bağlı idi. Vaxtilə Azərbaycanda yaradılan müxtəlif QHT-lər və media orqanları ideoloji təxribatla məşğul olublar. Bundan sonra belə halların baş verməməsi üçün müəyyən işlərin görülməsinin vacibliyi bildirildi. Dördüncü vəzifə Qarabağ və Şərqi Zəngəzurun inkişafının davam etdirilməsi idi. Məlum oldu ki, 4 il ərzində bərpa prosesinə 19 milyard vəsait xərclənib. Beşinci vəzifə kimi ölkə iqtisadiyyatının inkişafı göstərildi. Çünki hər şeyin inkişafı iqtisadi inkişafla bağlıdır. Altıncı məsələ Ermənistanla münasibətlərin normallaşmasıdır. Bu məsələdə əsas faktor Ermənistanın Azərbaycanın təklif etdiyi baza prinsipləri əsasında məsələni müzakirə etmək məcburiyyətində olmasıdır. Baxmayaraq ki, Ermənistan müşahidə missiyası adı altında xarici qüvvələri orada toparlayıb. Ancaq bütün hallarda Azərbaycan prosesə nəzarət edir. Hər hansı bir gərginlik olacaqsa, Azərbaycan buna qarşı addım atacaq. Yeddinci vəzifə kimi, müstəqil xarici siyasətin yeridilməsini göstərdi. Müstəqil xarici siyasətin olması üçün də ilk növbədə ölkə xarici qüvvələrin təsirində olmamalıdır. Bütün bunlar o deməkdir ki, Azərbaycan daha fəal xarici siyasət kursu yeridəcək. Ölkəmizun maraqlarına uyğun olaraq bütün qitələrdə qəti, ardıcıl mövqe sərgilənəcək. Qalib ölkə olaraq daha prinsipial mövqe ortaya qoyulacaq və çoxşaxəli siyasi xətt yeridiləcək”.
Vidadi ORDAHALLI
