Bakıdan Sumqayıta, Qaradağdan Əhmədliyə dəniz-sərnişin marşrutu?
Son dönəmlərdə Bakı yollarında tıxacların artması insanların ən çox müzakirə etdiyi mövzudur. “Əvvəllər tıxacın bir zamanı var idi, indi yoxdur. İstənilən saatda, istənilən istiqamətdə tıxaca düşə bilərsən” fikri daha çox səslənir.
Tıxac probleminin həlli ilə bağlı müxtəlif fikirlər səslənir. Hətta dəniz nəqliyyatının yaradılması da müzakirə edilir. Hesab edilir ki, dəniz nəqliyyatı yaradılarsa, tıxacın qarşısı, qismən də olsa azalar. Məlumat üçün bildirək ki, Xəzər dənizində “Mirvari” adlı gəmi ilə dəniz gəzintisi yenidən bərpa ediləcək. Bu xəbərdən sonra insanlar düşünür ki, Azərbaycanda dəniz marşrutu fəaliyyətə başlaya bilər və gəmi vasitəsilə insanlar bir məntəqədən digərinə gedə bilərlər.
Ekspertlər hesab edir ki, dəmiz nəqliyyatı vasitəsilə tıxacın qarşısı alına bilər. Danılmaz faktdır ki, bu gün Sumqayıt yolunda ucu-bucağı görünməyən tıxac müşahidə olunur. Olmazmı ki, Bakıdan Sumqayıta gedənlər dəniz nəqliyyatından istifadə etsin? Belə olarsa nəqliyyat sıxlığının qarşısı da alınmış olar. Həmçinin, Qaradağ-Əhmədli istiqamətində də dəniz nəqliyyatından istifadə oluna bilər.
Fərid Həşimov: “Dəniz yolu ilə şəhərdaxili ictimai nəqliyyatın təşkili yollarda gərginliyi xeyli azaldar, sərnişinləri tıxac problemindən azad edər”
Mövzu ilə bağlı fikir bildirən nəqliyyat eksperti Fərid Həşimov “Bakı-Xəbər”ə şərhində bildirdi ki, Azərbaycanda dəniz nəqliyyatının inkişafı üçün perspektivlər var, lakin müəyyən maneələr də mövcuddur. Maneə Bakının küləklər şəhəri olmasıdır: “Əslində dəniz nəqliyyatından əksər xarici ölkələr istifadə edir. Qonşu Türkiyədə bu təcrübə öz səmərəsini verib. Bulvarın başlanğıcından Əhmədliyə dəniz nəqliyyatı açıla bilər. Dəniz yolu ilə şəhərdaxili ictimai nəqliyyatın təşkili yollarda gərginliyi xeyli azaldar, sərnişinləri tıxac problemindən azad edər. Dəniz yolu tıxacları olmayan ən təhlükəsiz və sürətli ictimai nəqliyyat təşkil etməyə imkan verər. Təsəvvür edin, adamlar Əhmədli tərəfdən şəhərin mərkəzinə və yaxud Bayıla 5-10 dəqiqəyə çatırlar, heç bir tıxacda qalmaq təhlükəsi də yoxdur. Həm də şəhərin havası çirklənmir”.
Ərşad Hüseynov: “Azərbaycan reallığında dəniz nəqliyyatının özünü doğrultması ehtimalı azdır”
Nəqliyyat məsələləri üzrə ekspert Ərşad Hüseynov hesab edir ki, Azərbaycan reallığında dəniz nəqliyyatının özünü doğrultması ehtimalı azdır: “Nəzərə almaq lazımdır ki, dəniz taksiləri daha çox ada dövlətlərdə istifadə edilir ki, bu da anlaşılandır. Azərbaycanda, Bakıda isə mənzərə tamamilə fərqlidir. Bizdə belə bir zərurət yoxdur. Coğrafi relyef baxımından dəniz taksilərindən istifadəni şərtləndirən ciddi bir amil mövcud deyil. Məhz buna görə də dəniz taksilərinin Azərbaycan şəraitində ona olan ümidləri doğruldacağı inandırıcı görünmür. Buna görə də ölkəmizdə dəniz taksilərindən istifadəni real hesab etmirəm. Bakı ətrafında bir neçə kiçik ada olsa da, bütövlükdə Azərbaycan özü ada ölkəsi deyil. Qeyd etdiyimiz kimi, bizdə dəniz taksisindən ada dövlətlərində olduğu kimi istifadə tələbatı yoxdur. Dəniz taksisindən ən yaxşı halda Bakının bir ucundan digər ucuna getmək üçün istifadə edilə bilər ki, bu da iqtisadi baxımdan səmərəli olmayacaq. Dəniz taksiləri ilə bağlı müzakirələrin zaman-zaman gündəmə gəlməyinə baxmayaraq, qeyd etdiyimiz kimi, onların ölkəmizdə tətbiqi aktual deyil”.
Günel CƏLİLOVA
