Azərbaycan Prezidenti Sülh Fondunun və Ermənistanın birgə cinayətini açdı…
“Ermənistan silah üçün nəzərdə tutulan Sülh Fondundan istifadə edir, Fransadan pulsuz silah alır. Ona görə bu, ciddi məsələdir”. Bunu Prezident İlham Əliyev VII çağırış Milli Məclisin ilk iclasındakı çıxışında bildirib.
Prezident qeyd edib ki, Ermənistanı silahlandıranlar bilməlidirlər ki, bütün gələcək hadisələrə görə birbaşa onlar cavabdehlik daşıyacaqlar: “Təbii olaraq bizə qarşı rəsmi ərazi iddialarına son qoyulmalıdır. Onların Konstitusiyasına dəyişiklik edilməlidir, Minsk qrupu da ləğv olunmalıdır”.
Görəsən, Ermənistanı silahlandıranlar necə cəzalandırılmalıdır?
Mübariz Göyüşlü: “Ermənistanı silahlandıran ölkələrə beynəlxalq təzyiq mexanizmi tətbiq edilməlidir”
Siyasi şərhçi Mübariz Göyüşlü “Bakı-Xəbər”ə şərhində bildirdi ki, Sülh Fondunun adında sülh sözü olsa da, fəaliyyətində sülhdən, barışıqdan əsər-əlamət yoxdur: “Bir fond silahlanmaya diqqət ayırırsa, ona sülh demək olmaz. Avropa İttifaqı bu addan istifadə edib, özlərini sülhpərvər kimi göstərməyə çalışır. Ancaq baş verənlər əksini göstərir. Yaxşı olar ki, həmin fondun adı dəyişdirilsin”.
Həmsöhbətimiz təəssüf hissilə bildirdi ki, biz Ermənistanı silahlandıran Fransa və digər ölkələri cəzalandıra bilmərik. Çünki belə bir mexanizmə sahib deyilik: “Yalnız beynəlxalq ictimai qınaq ola bilər. Ermənistanı silahlandıran ölkələrə beynəlxalq təzyiq mexanizmi tətbiq edilməlidir. Istənilən halda ölkəmiz öz mövqeyini ortaya qoymalı, fikirlərini səsləndirməlidir. Haqlı mövqeyimizi arqumentlərlə dünya ictimaiyyətinin diqqətinə çatdırmalıyıq. Bu yolu biz seçməliyik. Silahlanmış Ermənistan hansısa addım atarsa amansız şəkildə cəzalandırılmalıdır”.
Mətin Məmmədli: “Ermənistanı silahlandıran dövlətlər məsuliyyət daşıyır”
Siyasi şərhçi Mətin Məmmədli “Bakı-Xəbər”ə şərhində bildirdi ki, bu gün Ermənistanı silahlandıranlar birmənalı olaraq regionda vəziyyətin gərginləşməsinə, yeni münaqişə risqlərinin artmasına xidmət edirlər. Ermənistanı silahlandıranlar ilk növbədə revanşizm meyllərini gücləndirirlər: “Təəssüf ki, bəzi Qərb dövlətləri Ermənistanın silahlandırılmasında fəal iştirak edir. Bu barədə ölkə başçısı İlham Əliyev VII çağırış Milli Məclisin ilk iclasındakı çıxışında Azərbaycan dövlətinin mövqeyini bəyan etdi. Bildirildi ki, Ermənistanı silahlandıran dövlətlər məsuliyyət daşıyır. Onu da deyim ki, hüquqi baxımdan Ermənistanı silahlandıran dövlətləri cəzalandırmaq mümkün deyil. Bu, Azərbaycanın imkanları xaricindədir. Biz yalnız öz mövqeyimizi beynəlxalq ictimaiyyətə çatdıra bilərik. O da bəllidir ki, Azərbaycan hökuməti məlum məsələ ilə bağlı öz fikrini sərt formada deyib. Ancaq təəssüf ki, Ermənistanı silahlandıranlar hələ də öz siyasətini bölgədə davam etdirmək istəyir. Onlar hesab edir ki, Ermənistanı hərbi baxımdan gücləndirməklə Cənubi Qafqazda öz maraqlarını təmin etmiş olacaqlar. Bu qeyri-rasional bir yanaşmadır. Əslində Ermənistanın silahlandırılması regionda vəziyyətin gərginləşməsinə səbəb olacaq. Həmçinin, regionun aparıcı dövləti olan Azərbaycanı özlərindən uzaqlaşdırırlar. Azərbaycanın o ölkələrdən uzaqlaşması o güc mərkəzlərinin, dövlətlərinin regionda təsirinin azalmasına səbəb olacaq”.
Günel CƏLİLOVA
