Fermerlər subsidiyaya görə yeni "növ" narazılıq edirlər - "şorla lora fərq qoyulmur"...
Akif Nəsirli: “Şoranlaşmış torpaqda əkin əkən fermerin gəliri daha az olur, ancaq…”
Həm şoranlaşmış, həm də münbit torpaqda aparılan əkinə görə eyni subsidiya verilir. Lakin onların əkin xərcləri eyni olmur. Nəzərə almaq lazımdır ki, münbit olmayan torpaqlarda əkin aparan fermerlərin digərlərinə nisbətən xərci daha çox olar.
Şoranlaşmış, həm də münbit torpaqda aparılan əkinə görə eyni subsidiya verilməsi fermerler arasında narazılığa səbəb olur. Fermerlər bildirir ki, şoranlaşmış torpaqda əkinlən əkinin məhsuldarlığı yüksək olmur, ancaq münbitdə əksinədir. Buna baxmayaraq subsidiya eyni verilir.
Maraqlıdır, münbit və şoranlaşmış torpaqlara əkin üçün niyə eyni məbləğ ayrılır?
“Münbit əkin sahələrinin genişləndirilməsi məqsədilə şoranlaşmış torpaqda əkin əkən fermerə artıq subsidiya verməkdənsə, aidiyyəti qurumların dəstəyi ilə həmin torpağın saflaşdırılması üçün tədbirlər görülə bilər”
Liberal İqtisadçılar Birliyinin sədri Akif Nəsirli “Bakı-Xəbər”ə şərhində bildirdi ki, əkin üçün şoranlaşmış və münbit torpaqla bağlı eyni xərc çəkilir: “Sadəcə olaraq, şoranlaşmış torpaqlarda məhsuldarlıq bir qədər aşağı olur, ancaq münbit torpaqlarda isə yüksək olur. Şoranlaşmış torpaqda əkin əkən fermerin gəliri daha az olur. Ancaq düzgün yanaşma deyil ki, şoranlaşmış torpaqda əkin əkildiyi üçün fermerə daha artıq subsidiya verilməlidir. Fermer şoranlaşan, deqradasiyaya uğrayan torpağı Kənd Təsərrüfatı Nazirliyinin müvafiq qurumları qarşısında təsdiqləməlidir. Təsdiqlənmədən sonra şoranlaşdırılmış torpağın münbitləşdirilməsi üçün vəsait, subsidiya verilməlidir ki, torpaq münbit olsun. Ancaq bu bir qədər qarışıqlıq da yarada bilər. Bəziləri həmin qurumlara müəyyən dərəcədə “hörmət” edəcək ki, torpağı şoran kimi qeydiyyata alınsın və ona artıq subsidiya verilsin. Buna yol verilməməlidir. Münbit əkin sahələrinin genişləndirilməsi məqsədilə şoranlaşmış torpaqda əkin əkən fermerə artıq subsidiya verməkdənsə, aidiyyəti qurumların dəstəyi ilə həmin torpağın saflaşdırılması üçün tədbirlər görülə bilər. Bu iş də büdcənin hesabına həyata keçirilməlidir. Belə olarsa şoranlaşmış torpağın sahəsi azalar, həm də fermerlərin problemi aradan qalxar”.
Günel CƏLİLOVA
