Kərbəla ziyarətini antiazərbaycan fəaliyyət meydanına döndərirlər - fakt...
Tural İrfan: “Həmin şəxslərdir ki, Kərbəlaya gedəndə belə antiazərbaycan fəaliyyəti ilə məşğul olurlar”
Azərbaycana xəyanət edən bir qrup “dindarlar” var ki, hazırda onların İranda yaşadıqları, ordan dövlətimizin əleyhinə təbliğat apardıqları məlumdur.
Çox təəssüflər olsun ki, belələri öz vətəndaşlıq hisslərini, milli təəssübkeşliyi, dövlətçilik maraqlarına xidməti tamamilə unudublar.
Onların oradakı çirkin əməllərindən cəmiyyətimizin xəbəri var.
MOİZE Teleqram kanalı yazır ki, Azərbaycana xəyanət edənlərin şəkilləri Ərbəin ziyarətində nümayiş etdirilir. Onlar "qəhrəman" kimi təqdim olunur. “Bu ziyarəti təşkil edənləri məsuliyyətə cəlb etmək lazımdır. Ümumiyyətlə, Azərbaycan Kərbəla ziyarətinə STOP qoymalıdır!”-deyə kanal yazıb. Çox maraqlıdır, niyə İrandakı ziyarətgahlarda Azərbaycan dövlətinə xəyanət edənlərin fotoları qoyulur, onlar reklam edilir?
“Bu Kərbəla ziyarətini ölkədə kim təşkil edirsə onlara nəzarət gücləndirilməlidir”
Tanınmış ilahiyyatçı Tural İrfan “Bakı-Xəbər”ə şərhində bildirdi ki, daxildə və ölkə xaricində Vətənə qarşı hər an xəyanətə hazır olanlar, ölkəni, dövləti, dövlət rəhbərini təhqir edənlər, xarici qüvvələrin xidmətində olanlar, xarici agentlər var. “Belələri iki qismə bölünür. Onların bir qismi Avropada, Qərbdə, ABŞ-da oturub, orada vətəndaşlıq alıblar, yaxud da başqa üsullarla Youtube kanalları açıb ölkənin imicinə xələl gətirməklə məşğuldurlar. İkinci qisim isə İran tərəfindən yönləndirilənlərdir. Bilirsiz ki, belə şəxslərdən bir neçəsi də İrandadır, sığınacaq alıb orada yaşayırlar. Onların bir neçəsinə hətta saxta dini rütbələr də verilib, bu o şəxslərdir ki, Azərbaycanda “Kərimə dövləti” qurmaq üçün təlimlər keçirlər, adamlar yetişdirirlər. Həmçinin onların Azərbaycanda da tərəfdarları var. Bunların bir hissəsi bir vaxtlar “Müsəlman Hərəkatı” adlı bir təşkilat qurmuşdu. İndi də “Kərimə dövləti” dediklərinin burda tərəfdarları, mənsubları var. Onlara Rusiya vasitəsilə guya yardım adı ilə maliyyə dəstəyi də göstərilir. Müxtəlif yollarla bunlar artıq şəbəkələşib, təşkilatlanıb formalaşıblar. Həmin şəxslərdir ki, Kərbəlaya gedəndə belə antiazərbaycan fəaliyyəti ilə məşğul olurlar. Məkkədə də onlar elə şeylərə cəhd edirlər, lakin orada nəzarət ciddi olur. Ora gedən dəstə rəhbərləri, məzhəbçi təfəkkürdə olan adamlar olmur adətən.
Çünki Məkkəyə bütün məzhəblərin nümayəndələri gedir. Amma Kərbəlaya əsasən bir yönün adamları daha çox gedirlər, ona görə də onlara o qədər nəzarət olmur. Bu Kərbəla ziyarətini ölkədə kim təşkil edirsə onlara nəzarət gücləndirilməlidir. Bildiyim qədər, bu cür təbliğatın, bu cür ziyarət qaydasının təməlini QMİ qoyub, bu səbəbdən də belə məsələlər onlarla danışılmalıdır, məsuliyyəti onlar daşıyır. QMİ bu məsələlərə nəzarət etməlidir. Bu məsələlər təəssüf doğurur. Bəli, bu çoxdan var və Kərbəlada Vətən xainlərinin, Azərbaycana düşmən olan şəxslərin şəkilləri nümayiş etdirilir, onların şüarları səsləndirilir, orda olan digər müsəlman xalqlara Azərbaycan haqda mənfi məlumat verilir. Bir növ ora bir siyasi toplaşma yeri kimi istifadə olunur.
Biz bunu illərdir deyirik ki, bu cür dini məsələləri artıq fars şəbəkəsi tamamilə siyasiləşdirib. Yəni yas məclislərindən tutmuş imamların doğum, ölüm günlərinə qədər hamısını siyasiləşdiriblər. Bunu ona görə edirlər ki, orda şüarlar səsləndirsinlər, o toplanışı bir siyasi təsir, təzyiq vasitəsinə çevirsinlər, həmçinin də Kərbəla ziyarətini. Bu işi orada insanları bu ziyarətə aparanlar, dəstə rəhbərləri təşkil edir. Dəstə rəhbərlərini də buradan göndərən adamlar var, onların da hamısı QMİ-yə bağlı adamlardır. Yəni burda heç kim özbaşına gedib o şüarı səsləndirə bilməz. Həmin dəstə rəhbəri bu cür işlərə görə məsuliyyət daşıyır ki, sən Azərbaycandan gedəsən, Azərbaycanı biabır edəsən, sonra da əl-qolunu sallayıb gəlib burda oturasan. Bu mümkün deyil. Bu işi təşkil edənlər və onun arxasında duranlar var. Onlar tapılmalıdır. Daha doğrusu, onlar məlumdur, amma nəyə görəsə məsuliyyətə cəlb etmirlər, onları zərərsizləşdirmirlər. Bunun səbəbi məlum deyil. Orda müxtəlif görüşlər keçirilə bilər. Hətta aldığım məlumata görə, bunlar da var. Çünki İraqla İranın müəyyən qüvvələrinin müqavilələri, yaxın əlaqələri var. Əsasən də din adı altında gördükləri işlərdə həmişə ruhanilər və sairlər vəhdətdədir. Bu ziyarətə gedənlərin heç də hamısı ora ziyarətə getmir, 80 faizi Məşhədə və Kərbəlaya başqa məqsədlərlə aparılır. Yəni orda kimlərləsə görüşülür, hansısa razılığa gəlinir. Bax, bu kimi şeylər din adı altında baş verir”-deyə T.İrfan bildirdi.
T.İrfanın sözlərinə görə, biz bunu İran casuslarının burada həbs edilməsində gördük ki, onlar bu ziyarətlərə gedərkən necə ələ keçiriliblər. T.İrfan qeyd etdi ki, belə insanları həvəsləndirib pulsuz şəkildə aparırlar, sonra isə onları ələ keçirib əməkdaşlığa cəlb edirlər, müxtəlif adamların təsiri altına salırlar. “Bu ziyarətlərə getməyin qadağan edilməsi düz gəlməz, bunu qadağan etmək olmaz, bu, insan haqlarına ziddir, dini azadlıqlara uyğun deyil. Sadəcə, dövlət bu cür ziyarətlərin təşkil edilməsinə ciddi nəzarət etməlidir. Onları özbaşına buraxmamalıdır. Amma indi özbaşına buraxılıblar. Mən həmişə demişəm, yenə də deyirəm, QMİ indiyə qədər ermənilərin Azərbaycan xalqına Xocalıda ziyan vurduğu qədər ziyan vurub. Ola bilsin bu hələ ifşa ediləməsin, nəyə görəsə deyilməsin, ancaq o idarənin Azərbaycana vurduğu ziyan erməninin Azərbaycana vurduğu ziyanla müqayisə oluna bilər. Bunu tam məsuliyyətlə demək lazımdır. Onlar bu işi təşkil edir. Məlum idi, 44 günlük müharibədən sonra o idarənin rəhbəri bu qələbəni nə cür təqdim etdi? Bir ölkənin şeyxi deyəndə ki, bu torpaqlar İranın ali dini liderinin fətvası ilə alındı, təbii ki, onu təqlid edən molla, din xadimi də Kərbəlaya gedəndə orada xalq düşməninin şəklini qaldıracaq. Yəni o, böyüyündən örnək götürür. Ona görə də bu işlər nizamlanmalıdır. Dövlət QMİ-nin nazı ilə çox oynayır. Artıq ölkədə ikitirəlik yaranıb. Dini Qurumlarla İş üzrə Dövlət Komitəsi “a”, QMİ “b” deyir. Bu nifaq davam edir. Artıq elə bilin ki, bir “sünni-şiəlik” də bunlar yaradıblar. Əksinə, sünni və şiəliyi birləşdirmək əvəzinə bu iki dini idarə daha da dini mühitdə nifaq yaradır. QMİ rəhbəri konkret olaraq dövlət idarəsi ilə rəqabət aparır. Özü də bu dövlət idarəsi yaranan gündən. Ona görə də bu məsələ aradan götürülməlidir. Ya bu adamla danışılmalıdır ki, bu cür şeyləri yığışdırın, ya da bu qurum birdəfəlik bağlanmalı, onun səlahiyyətləri dövlət qurumuna verilməlidir. Hər şey yarımçıqdır. Deyək ki, qazılar QMİ-nin əlinin altındadır, təyinatındadır, ziyarət onların monopolyasındadır, nəzir də həmçinin. Amma axundların təyinatı, onların maaşının verilməsi işini Dini Komitə görür. Dini Komitə onlara maaş verir, onlar da gedib məscidlərin minbərindən İranı tərifləyir. Dövlətin bir işində o din xadimlərinin rolu, fəaliyyəti yoxdur. Bax, bu məsələlərdir ki, gedib Kərbəla ziyarətində də bu cür işlər görürlər. Onun məsuliyyətini də QMİ daşıyır. Çünki ölkədə indiyə qədər elə bir fars yönümlü dini təbliğat aparıb ki, bu şeylər də adi qarşılanmalıdır. Amma onun da qarşısını almaq üçün bir otuz il də lazımdır ki, insanları düzgün dini maarifləndirək və “bu belə deyil, başqa cürdür”-deyək”-deyə T.İrfan bildirdi.
İradə SARIYEVA
