Makronla Durovun 2018-dəki məxfi görüşünün bəzi detalları açıldı...
Fransa prezidenti Emmanuel Makron 2018-ci ildə "Telegram"ın qurucusu Pavel Durova şirkətin əsas ofisini Parisə köçürməyi təklif edib.
Trend xəbər verir ki, bu barədə xarici KİV-lər məlumat yayıb.
Məlumatda iddia olunur ki, Durovla siyasətçi arasında baş tutan işgüzar nahar barədə daha əvvəl ictimaiyyətə heç bir məlumat verilməyib.
Qeyd edilir ki, Durov görüş zamanı Fransa vətəndaşlığı almaq haqqında məsələni qaldırıb, lakin öz şirkətinin baş ofisini Fransaya köçürməkdən imtina edib.
Qeyd edək ki, Pavel Durov avqustun 25-də Parisdə saxlanılıb. O, narkotik vasitələrin qanunsuz dövriyyəsi, pedofiliya, çirkli pulların yuyulması və oğurlanmış malların idarə edilməsində ittiham olunur.
Maraqlıdır, dünyaya insan hüquqları dərsi keçən Avropa İttifaqı üzv ölkə olan Fransanın bu cür represssiv addımlarına niyə sakit qalır? Aİ hələ də açıqlama verməyib.
Bəs, ABŞ Dövlət Departamenti necə? Azərbaycanda belə hal baş versəydi, artıq bəyanat verməmiş bir Qərb rəsmi dairəsi, institutu qalmamışdı.
Bəli, "Telegram"da bır sıra məqamlar narahatedicidir. Amma insan hüquqları azadlıqlarına hörmət, biznes prinsiplərinə riayət olunması tələbi belə repressiv metodlarla tənzimlənməməlidir. Ən azından Qərb özünün bəyan etdiyi prinsiplərə sadiqlik nümayiş etdirməlidir. Bu olmayınca, ABŞ, Aİ hər hansı bir ölkədə bu və ya digər hadisəyə demokratiya və insan hüquqları kontekstində münasibət bildirməkdə haqsız sayılır.
