"Biz "Bakı-Xəbər"in paylaşımlarının Facebook tərəfindən silinməsi məsələsini beynəlxalq platformalara çıxarmalıyıq" - Azər Həsrət
"Əlbəttə ki, Avropada demokratiyadan, insan haqlarından, ümumiyyətlə media azadlığından danışmağı xoşlayırlar. Biz bunu on illərdir deyirik. Amma əmələ gələndə, iş özlərinə çatanda utanmadan senzura da tətbiq edirlər. Yəni onlar üçün senzura tətbiq etmək adi bir şeydir. Baxmayın ki, Fransa da, Avropa Birliyinin özü də durmadan media və ifadə azadlığından, jurnalist hüquqlarından danışırlar, öz siyasi maraqları ön plana keçəndə medianı da ayaqları altına alırlar. Facebook-un "Bakı-Xəbər"ə qarşı davranışı da bu qəbildəndir.
Biz "Bakı-Xəbər"in paylaşımlarının Facebook tərəfindən silinməsini beynəlxalq platformalara çıxarmalıyıq. Əslinə qalanda, İlon Maskın da dediyi təsadüfi deyil" .
Bunu baki-xeber.com-a açıqlamasında Azərbaycan Mətbuat Şurasının İdarə Heyətinin üzvü, Əməkdar jurnalist Azər Həsrət “Bakı-Xəbər” qəzetinin eyni adlı saytının (baki-xeber.com) paylaşımlarının sosial mediada, əsasən də Facebook-da dərhal və səbəbsiz olaraq silinməsinə münasibət bildirərkən deyib.
A.Həsrət bildirdi ki, Facebook bir sosial şəbəkə olaraq əvvəllər əyləncə üçün nəzərdə tutulmuşdusa, indi artıq böyük pulların dövr etdiyi çox böyük bir biznesdir. "Yəni onun biznesə, böyük biznesin bir vahidinə çevrilməsi ona gətirib çıxarıb ki, Facebook artıq dövlətlərin və siyasi qurumların, müəyyən qruplarının maraqlarını nəzərə almağa başlayıb. Yəni pul qazanmaq istəyir. Pul qazanırlar. Əvəzində nə edirlər? Bizim kimi ölkələrin insanlarının media azadlığını ayaq altına alırlar. Yəni burda bunun adı başqa cür ola bilməz . Monitorinqinizin nəticələrini bir yerə toplayın, Jurnalistlərin Həmkarlar ittifaqı, Mətbuat Şurası vasitəsilə beynəlxalq platformalara çıxaraq və bunun qlobal müstəvidə davasını aparaq" - deyə A. Həsrət bildirdi.
Qeyd edək ki, xeyli bir müddətdir “Bakı-Xəbər” qəzetinin eyni adlı saytından (baki-xeber.com) paylaşılan yazılar sosial mediada dərhal və səbəbsiz olaraq silinir. Bu, xüsusilə də Facebook sosial platformasında daha açıq formada müşahidə edilir.
"Bakı-Xəbər", xüsusilə İlon Maskın Avropa Komissiyası ilə digər sosial şəbəkə platformalarının rəhbərləri arasında gizli sövdələşmə olduğu barədə X hesabındakı paylaşımını yaydıqdan sonra baki-xeber.com saytının yazılarının Facebook-da silinməsi daha da intensivləşib, yazılara blok qoyulur.
İradə SARIYEVA
