Hikmət Hacıyev, Zaxarova və Karasin Qriqoryanı dediyinə "peşman etdilər"...
Mirkazım Seyidov: “Həqiqət bir olduğu üçün bu mövzulara cavabda Azərbaycan və Rusiya rəsmilərinin fikirləri üst-üstə düşür”
Rusiya Xarici İşlər Nazirliyinin rəsmi nümayəndəsi Mariya Zaxarova brifinqdə deyib ki, Ermənistan Təhlükəsizlik Şurasının katibi Armen Qriqoryan Qarabağın itirilməsinə görə Rusiyanı günahlandıraraq öz xalqını aşağılayıb:
“Ermənistan Təhlükəsizlik Şurasının katibi Armen Qriqoryan Qarabağın itirilməsinə görə Rusiyanı günahlandıraraq öz xalqını aşağılayıb. Hakimiyyət təmsilçisi kimi bu cür şəxslər öz xalqını aşağılayır. Ermənistan vətəndaşları öz ərazilərini müdafiə etdilər, canlarını verdilər və bunu tarixi əhəmiyyətli hesab etdilər. Ermənistanın bir dövlət kimi uzun illər ideologiyası məhz bu tezislər üzərində qurulub. Onlar bilirdilər ki, niyə döyüşə gedirlər, nə üçün öz rifahlarını qurban verirlər, arvadlarını, uşaqlarını dulluğa, yetimliyə məhkum edirlər. Onların xatirəsinə necə xəyanət etmək olar?
İnsanların öz xalqının tarixi yaddaşına bu qədər alçaldıcı münasibət göstərməsi mənim üçün təəccüblüdür”.
Rusiya Federasiya Şurasının Beynəlxalq Əlaqələr Komitəsinin rəhbəri Qriqori Karasin də bu barədə danışıb. Onun sözlərinə görə, Ermənistan Təhlükəsizlik Şurasının katibi Armen Qriqoryanın Rusiyanın Qarabağı Azərbaycana “təslim etməsi” ilə bağlı dedikləri qətiyyən həqiqətə uyğun deyil”.
Karasin vurğulayıb ki, Qriqoryan bu məsələ ilə bağlı erməni siyasətçilərinin açıqlamalarıyla tanış olmalıdır:
“Bu, qətiyyən doğru deyil. Erməni siyasi xadimlərinin, o cümlədən yüksək rütbəli rəhbərliyin qeydlərinə və çıxışlarına müraciət etmək lazımdır. Bu sualların cavabları orada var. Armen Qriqoryan həmin qeydləri oxusun”.
Azərbaycan Prezidentinin köməkçisi - Prezident Administrasiyasının Xarici siyasət məsələləri şöbəsinin müdiri Hikmət Hacıyev “Ermənistan Təhlükəsizlik Şurasının katibi Qarabağın Rusiya tərəfindən Azərbaycana verildiyini iddia etmişdir. Bu revanşizmin təzahürüdür, yoxsa bunu necə şərh edərdiniz” sualına cavab verərkən bildirib ki, Azərbaycan Ordusu döyüş meydanında öz sözünü deyərək, şəhid verərək Ermənistan ordusunu 44 günlük Vətən müharibəsində məğlub edib, mütləq hərbi qələbə qazanıb, Ermənistanın 30 il davam edən hərbi işğalına son qoyub və Ermənistanı kapitulyasiya aktını imzalamağa məcbur edib.
Göründüyü kimi, Armen Qriqoryanın sayıqlamasına verilən cavabda Rusiya ilə Azərbaycan rəsmilərinin cavabları üst-üstə düşür.
Müstəqil siyasətçi Mirkazım Seyidov “Bakı-Xəbər”ə açıqlamasında bildirdi ki,
Ermənistanda hakimiyyət müharibədəki məğlubiyyətdən sonra bunun səbəblərini özlərindən kənar amillərdə axtarmağa başlayıb:
“Birincisi, Qriqoryandan soruşmaq lazımdır ki, ölkə məğlubiyyətə uğrayıbsa, o zaman eyni hakimiyyət yenidən necə seçilib?
Əgər məntiqlə yanaşsaq, ya Ermənistan üçün o məğlubiyyət o qədər də ciddi deyildi, ya da liderlər həqiqətən də çox güclüdürlər ki, bir daha hökumət mandatı ala biliblər. Bu versiyaların hər ikisi inandırıcı deyil. Ermənistan cəmiyyətində belə bir fikir formalaşıb ki, Rusiya onları “satdığı” səbəbindən belə vəziyyət yaranıb. Sonra iddia edirlər ki, üçtərəfli sənədin imzalanmasından sonra baş verən proseslər kontekstində Ermənistanın gözlədiyi şəkildə reaksiya verməyib. Erməni cəmiyyətində müttəfiqlik öhdəliklərinin mümkün qədər səmərəli yerinə yetirilmədiyini düşünənlər ola bilər. Digərləri isə bunu Rusiyanın xəyanəti adlandıra bilər. Bütün bunlar erməniləri məyusluğa sürükləyib. Ən maraqlısı isə budur ki, artıq bu təbliğatı ən yüksək post tutan erməni məmurları aparır.
Hətta Azərbaycan Ermənistandan gələn atəşlərə cavab verdiyi vaxt Rusiyanın Ermənistana niyə kömək etməməsini ermənilər anlaşılmazlıq kimi qəbul edirdilər. Son vaxtlar Rusiya və Ermənistan arasında soyuqluq müşahidə olunur. Bunu həm yürüdülən siyasətdə, həm də ayrı-ayrı rəsmilərin dilindən olan açıqlamalarda müşahidə etmək mümkündür. Uzun illər Rusiyanın himayəsi və dəstəyi ilə Cənubi Qafqazda işğalçılıq və təcavüz siyasəti yürüdən, iqtisadi təcrid şəraitində ayaqda qalmağı bacaran Ermənistan tədricən Rusiyadan uzaqlaşmağa meyl edir. Buna görə də müxtəlif bəhanələrlə bu münasibətləri gərginləşdirirlər. Həqiqət bir olduğu üçün bu mövzulara cavabda Azərbaycan və Rusiya rəsmilərinin fikirləri üst-üstə düşür. Erməni rəsmiləri nə desə də, biz dəqiq bilirik ki, qələbəni qazanan Azərbaycan xalqının əzmi və rəşadəti olub”.
Məhəmmədəli QƏRİBLİ
