“Həyatına dəyər ver, narkomaniyaya yox de!” – Lerikdə gənclərlə görüş keçirildi
Dağlar diyarı Lerik rayonu Heydər Əliyev Mərkəzində “26 iyun - Narkomaniya və Narkobiznesə qarşı Beynəlxalq Mübarizə Günü” münasibətilə "Həyatına dəyər ver, narkomaniyaya yox de!" mövzusunda gənclərlə maarifləndirici görüş keçirilib.
Tədbirdə çıxışlar zamanı gənclərə narkotiklərdən istifadənin və “ağ ölüm” kimi tarixə düşən narkomanlığın insanları sağalmaz xəstəliklər məngənəsində boğan dövrümüzün ən dəhşətli bəlası olduğu, onlara qarşı mübarizə üsulları, eləcə də qəbul edilmiş dövlət proqramlarının icrası barədə ətraflı məlumat verilib. Eyni zamanda gənclərə asudə vaxtlarını səmərəli dəyərləndirmələri yolunda tövsiyələr verərək zərərli vərdişlərdən uzaq durmağın vacibliyi bir daha vurğulanıb. O da bildirilib ki, narkomaniyaya qarşı mübarizədə hüquq-mühafizə orqanları ilə yanaşı, bu ölkədə yaşayan hər bir kəs fəallıq göstərməlidir. Çünki o elə bir sərhəd tanımayan təhlükəli, sosial əhəmiyyətli xəstəlikdir ki, hər insanın və yaxud da ona yaxın olan doğmasının başına gözlənilmədən gələ bilər.
Sonda gəncləri ən çox düşündürən suallar öz dolğun cavablarını polis əməkdaşları tərəfindən tapıb.
Lənkəran-Astara Regional Gənclər və İdman İdarəsinin, Lerik Rayon Polis Şöbəsinin birgə təşkilatçılığı sayəsində baş tutan tədbirdə Lerik rayonu üzrə gənclər və idman sektorunun, Lerik Rayon Polis Şöbəsinin, Lerik Rayon Mədəniyyət Mərkəzinin əməkdaşları, yeniyetmə və gənclər iştirak edib.
Zəfər ORUCOĞLU
Azərbaycan Jurnalistlər Birliyinin üzvü
