Ərəb ölkələri Ermənistanın adi “Fələstin bəyanatına” niyə belə sevincək olublar...
Elşən Manafov: “Ermənistana dəstək verməklə onlar müəyyən mənada Ankaraya təsir imkanlarını artırmaq istəyirlər”
İraq və Oman Xarici İşlər Nazirliyinin bəyanatında deyilir ki, İraq və Oman Ermənistanın Fələstin dövlətini tanımaq bəyanatını alqışlayır.
“Nazirlik bu mühüm addımı təqdir etsə də, fələstinlilərin paytaxtı Əl-Qüds Əl-Şərif olmaqla öz müstəqil dövlətlərini qurmaq hüququnun bərpa edilməsinin vacibliyini vurğulayır. O, beynəlxalq ictimaiyyətə Fələstin xalqının öz müqəddəratını təyinetmə hüququnu və qanuni milli istəklərinin həyata keçirilməsini təmin edəcək şəkildə hüquqi məsuliyyətin qəbul edilməsinin və beynəlxalq qanuniliyin müvafiq qətnamələrinin həyata keçirilməsinin vacibliyi ilə bağlı çağırışını yeniləyir”, - deyə İraq Xarici İşlər Nazirliyi bəyanatında bildirib.
Öz növbəsində, Oman XİN-in bəyanatında qeyd olunur ki, dövlət bu müsbət qərarı yüksək qiymətləndirir və Fələstin xalqının öz müstəqil dövlətini qurmaq hüququnu qorumaq üçün beynəlxalq ictimaiyyətin qalan hissəsini ondan nümunə götürməyə çağırır.
Azərbaycan neçə ildi Fələstini tanıyıb. Bu İraq, Oman heç Azərbaycana belə reaksiya vermirdilər. İndi Ermənistanın tanımasına ürəkləri gedir. Misir də bənzər mövqedən çıxış edərək Ermənistana mədhiyyə deyir. İordaniya da həmçinin oxşar mövqe sərgiləyib. Ərəb Dövlətləri Liqası da Ermənistanı Fələstini tanıdığına görə alqışlayıb.
Maraqlıdır, nədir ərəb dövlətlərindəki bu erməni sevgisi?
“Paşinyana o ərəb ölkələri dəstək verir ki, Yaxın Şərqin geosiyasi perspektiv durumu ilə bağlı məsələlərdə onlar...”
Sözügedən məsələ ilə bağlı fikirlərini “Bakı-Xəbər”lə bölüşən politoloq Elşən Manafov bütün bunlara bir neçə prizmadan yanaşdı: “Ermənistanın Fələstini müstəqil dövlət kimi tanıması onun ərəb dünyasında öz nüfuzunu yüksəltmək, ərəb dövlətləri ilə qarşılıqlı maraq doğuran məsələlər ətrafında faydalı əməkdaşlığı genişləndirmək istəyindən irəli gəlir. Erməni tərəfi ərəb dövlətləri ilə münasibətlərinə özünün enerji təhlükəsizliyi ilə bağlı problemləri prizmasından yanaşır. Ərəb şeyxlərini, bir qayda olaraq, İrəvanın istehsalı olan qızıl, bər-bəzək cəlb edir. Ermənistan istər İslam Əməkdaşlıq Təşkilatının, istərsə də Ərəb Dövlətləri Liqasının Qarabağ münaqişəsi ilə əlaqədar Ermənistan işğalını pisləyən qətmamələrini yaxşı xatırlayır. Buna görə də ərəb dövlətlərinin elitaları ilə yeni münasibətlər qurmağa səy göstərir. Əvvəllər Azərbaycanı birmənalı şəkildə müdafiə edən, hətta Ermənistanla diplomatik münasibətlərini kəsmiş bəlli ərəb dövlətlərinin, məsələn Səudiyyə Ərəbistanının İkinci Qarabağ müharibəsi zamanı Ermənistanı məxfi şəkildə dəstəkləməsi bunu sübut edir. ƏDL, Oman və digər ərəb ölkələrinin hakim dairələri də bəlli problemə ikili münasibət sərgiləməyə başlamışlar. HƏMAS və İsrail arasında məlum müharibənin başlanmasından sonra Avropa İttifaqına daxil olan bəzi ölkələrin - İspaniya, Şotlandiya və başqalarının Fələstini tanıması konteksində Ermənistanın Qərblə münasibətlərdə onun ardınca gedərək siyasi xal qazanmaq istəyi də mümkündur. Nəhayət, Ərdoğanın Yeni Osmanlı layihəsi bəlli ərəb dövlətlərinin siyasi elitaları tərəfindən qısqanclıqla qarşılanır. Türkiyənin ərəb dünyasında artan nüfuzu onları narahat edir. Odur ki, Ermənistana dəstək verməklə onlar müəyyən mənada Ankaraya təsir imkanlarını artırmaq istəyirlər. Qondarma “erməni soyqırımı” hadisələrindən Türkiyəyə qarşı mübarizədə bəllidir ki, Avropa və ABŞ da yararlanmaq istəyib. Nəhayət, Paşinyana o ərəb ölkələri dəstək verir ki,Yaxın Şərqin geosiyasi perspektiv durumu ilə bağlı məsələlərdə onlar da Ermənistandakı rejim kimi ABŞ-la əməkdaşlıqdan faydalanmaq istəyir”.
Vidadi ORDAHALLI
