Lənkəranın Şilavar və Nüvədi kəndinin yolları sakinləri bezdirib - çala-çuxurların yaratdığı problemlər...
Lənkəran rayonunda illərdən bəri əhalini narahat edən yol problemi dəyişməz qalaraq bir daha ağırlaşıb. Hazırda burada elə küçə, kənd yolları vardır ki, bəlkə sovet dağılanı təmir üzünü görməyib. Məsələnin həllinə gələndə isə əlaqədar təşkilatlar hər dəfə vəd verməklə öz işini bitmiş hesab ediblər.
Beləliklə cənub mirvarisi sayılan Lənkəranın yararsız hala düşən yolların təmiri ilə bağlı illərlə əhaliyə yalan satmaqla, həm də gecə-gündüz xalqın rahatlığı, xoş rifahı naminə çalışan, gördüyü möhtəşəm işlərlə Azərbaycanı dünyaya inkişaf etmiş bir ölmə kimi tanıdan, xalqın sevimlisi olan Prezident İlham Əliyevə yalan deyə biliblər. Odur ki, dövlət tərəfindən bu sahəyə külli miqdarda vəsait ayrılsa da, dağılıb yararsız hala düşən yollar hələ durur...
Şilavar kəndi Lənkəranın iri yaşayış məntəqəsi sayılır. Rayon mərkəzinə yaxındır. Əhalisi zəhmətkeş, halallıqla dolanmağın yollarını yaxşı bilirlər. Qaldı illərdir kəndin çala-çuxur yolları adamları çətinlik qarşısında qoyur. Gediş-gəliş təhlükəli olmaqla, nəqliyyatın sərbəst hərəkətinə maneələr yaranır. Dağılıb ömrünü başa vuran yollarda yayda toz-torpaqdan, payız, qış aylarında isə palçıq əlindən göz açmaq olmur. Təmir, həmçinin yola yeni asfalt örtüyü döşəmək barədə söz verilsə də, vəziyyət hələlik olduğu kimi qalır. Hətta şilavarlılar çox vaxt yola çıxmağa ürək eləmirlər.
Rayonunun Yuxarı Nüvədi kəndinin sakinləri də yolların yararsız vəziyyətdən təngə gəliblər. Uzun müddətdir kənd daxili yolların asfalt örtüyü dağılıb. Nəticədə camaat son vaxtlar bir yerə getməkdə böyük çətinliklə üzləşir. Yağışlı havada yolların palçığı keçilməz olur. Nüvədililərin dediyinə görə, acınacaqlı vəziyyətdən çıxmaqdan ötrü ara-sıra öz hesablarına dağılmış yerlərə çınqıl materialları tökürlər, amma problem bununla həllini tapmır.
Bir sözlə, Lənkəranda elə yol var hazırkı vəziyyəti heç cür günün tələblərinə uyğun gəlmir. Yerli əhali nə zamansa bu yolların təmirini böyük ümidlə gözləyir...
Zəfər ORUCOĞLU,
Azərbaycan Jurnalistlər Birliyinin üzvü
