Özlərini buraxan deputatlar yenidən parlamentə düşmək istəyəcəkmi? - 2-ci fakt...
Bədrəddin Quliyev: “Gedişat göstərir ki, parlamentin yeni tərkibində rəngərənglik olacaq”
İyunun 20-də Yeni Azərbaycan Partiyasının (YAP) İdarə Heyətinin növbəti iclası keçirilib.
YAP-dan verilən məlumata görə, iclasın gündəliyi barədə məlumat verən YAP Sədrinin müavini - Mərkəzi Aparatın rəhbəri Tahir Budaqov qeyd edib ki, Azərbaycan Respublikasının Prezidenti cənab İlham Əliyevin rəhbərliyi ilə son illər tarixi qələbələr əldə edilmiş, ictimai-siyasi həyatın, dövlət idarəçiliyinin bütün sahələrində çoxşaxəli və məqsədyönlü islahatlar uğurla və ardıcıl şəkildə həyata keçirilib:
“BMT-nin İqlim Dəyişmələri üzrə çərçivə Konvensiyasının Tərəflər Konfransının 29-cu sessiyasının və digər mötəbər beynəlxalq tədbirlərin keçiriləcəyi vaxtda - 2024-cü ilin noyabr ayında Azərbaycan Respublikası Konstitusiyasının 981 maddəsinin II hissəsinə əsasən Azərbaycan Respublikasının Milli Məclisinə növbəti seçkilər keçirilməlidir. Həm seçkilərin, həm də qeyd olunan tədbirlərin yüksək səviyyədə təşkili mühüm əhəmiyyət kəsb edir. Bundan əlavə, həmin dövrdə ölkə parlamentinin tam fəaliyyətdə olmasının məqsədəmüvafiqliyi də nəzərə alınmalıdır. Altıncı çağırış Azərbaycan Respublikasının Milli Məclisi fəaliyyət dövrü ərzində dövlətin daxili və xarici siyasətini qanunvericilik səviyyəsində dəstəkləmək, dövlət idarəetməsinin təşkili və daha da təkmilləşdirilməsi fəaliyyətində yaxından iştirak etmək, yerlərdə seçicilərlə müntəzəm iş aparmaq, həmçinin parlament diplomatiyasının verdiyi imkanlardan səmərəli istifadə olunması sayəsində milli maraqları beynəlxalq məkanda təəssübkeşliklə təmsil etməklə üzərinə düşən vəzifələri layiqincə yerinə yetirməyə çalışmışdır. Hesab edirik ki, indiki şəraitdə də Milli Məclis dövlət maraqlarını üstün tutaraq Milli Məclisin buraxılması və seçkilərin daha erkən keçirilməsi təşəbbüsü ilə çıxış etməlidir”.
Sonra YAP Sədrinin müavini Əli Əhmədov, YAP İdarə Heyətinin üzvləri Hikmət Məmmədov, Musa Quliyev, Elşad Mirbəşiroğlu, Kamal Cəfərov, Anar İsgəndərov, Tahir Mirkişili və Bahar Muradova parlament seçkilərinin önə çəkilməsinin məqsədəuyğunluğunu əsaslandıraraq məsələyə münasibət bildiriblər.
Yekunda Yeni Azərbaycan Partiyasını Azərbaycan Respublikasının Milli Məclisində təmsil edən deputatlara altıncı çağırış Milli Məclisin buraxılması və növbədənkənar seçkilərin təyin edilməsi barədə Azərbaycan Respublikasının Prezidentinə müraciət olunması üçün təşəbbüs göstərmələrinin tövsiyə edilməsi barədə yekdil qərar qəbul edilib.
Qeyd edək ki, bundan əvvəl də parlament çoxluğu olan YAP Milli Məclisin buraxılmağı tələbi ilə çıxış etdi. Ancaq nədənsə, yeni formalaşan parlamentin böyük əksəriyyəti özünü buraxmaq təşəbbüsünü dəstəkləyən deputatlardan ibarət oldu. Bu dəfə formalaşacaq parlamentin tərkibi rəngarəngliyi ilə diqqət çəkəcəkmi, yoxsa yenə əksəriyyət köhnə deputatlardan ibarət olacaq?
Müstəqil siyasətçi Bədrəddin Quliyev “Bakı-Xəbər”ə açıqlamasaında bildirdi ki, hakim partiyanın bu təşəbbüslə çıxış etməsi normaldır: “Çünki bizim parlamentdə mütləq çoxluq YAP-a məxsusdur. Bizim parlamentdəki bitərəflərin də əksəriyyəti YAP-ın üzvləri kimi çıxış edir. Bu baxımdan da YAP-ın irəli sürdüyü bu təklifdən sonra parlamentin buraxılacağına şübhə yeri qalmır. Bu partiyanın cəmiyyətə təsiri də böyükdür. 700 mindən çox üzvü var. Biz ərazi bütövlüyümüzü tam təmin etmişik. Ölkəmizin beynəlxalq imicini daha yaxşı təmin etmək üçün yeni parlamentə ehtiyac var. Seçkilərin keçirilmə vaxtı noyabr ayında idi. Ölkəmiz COP29 adlı böyük beynəlxalq tədbirə ev sahibliyi etdiyi üçün, növbədənkənar seçkilərin keçirilmısi daha zəruri görüldü. Gedişat göstərir ki, parlamentin yeni tərkibində rəngərənglik olacaq. Bu həm də bizə vacibdir. Çünki ölkəmizin imicinə müsbət təsir edə bilən amildir. Seçicilərimiz də fəal olmalı və əsl vətəndaş mövqeyi ortaya qoymalıdır. Yəqin ki, seçkilərin növbədənkanar keçirilməsilə bağlı yaxın zamanda qərar qəbul ediləcək. Arzu edərdim ki, yeni parlamentdə fərqli siyasi qütblərin nümayəndələri təmsil olunsun. Parlamentin çox palitralı olması vacib göstəricidir. Özü-özünü buraxan parlamentin əksəriyyətinin köhnə üzvlərdən təşkili yaxşı mənzərə yaratmaz. Bu, seçki ilə olan prosesdir, son sözü seçici dediyi üçün, nəyi necə görmək istəyiriksə öz iradəmizi ortaya qoymalıyıq. Arzu edirəm ki, milli mövqeyimizi təmin etmək üçün istədiyimiz parlamenti formalaşdlra bilək. Yeni formalaşacaq parlamentə uğurlar arzulayıram”.
Məhəmmədəli QƏRİBLİ
