MEDİA çap mətbuatının yaşamasına əvəzsiz dəstəyini davam etdirir...
Çap mediası subyektlərinə dəstək layihəsi çərçivəsində elan edilmiş müsabiqənin nəticələri açıqlanıb. Bu barədə Medianın İnkişafı Agentliyi (MEDİA) məlumat yayıb. Belə ki, müsabiqədə 17 ictimai-siyasi qəzet qalib olub. "Bakı-Xəbər" qəzeti də qaliblər siyahısında yer alıb.
MEDİA qəzetlərin, çap mediasının maliyyələşməsinə qərar verdi, maliyyələşdirmə prosesini davam etdirir.
Çap mediasınının maliyyələşdirməsi ilə bağlı MEDİA-nın qəbul etdiyi qərarın böyük əhəmiyyət daşıdığını deyən media kapitanları hesab edir ki, bu qəzetlərin maliyyə dayanıqlığının təmin edilməsi istiqamətində atılan növbəti mühüm addımdır.
Şakir Ağayev: “MEDİA-nın çap mediasına növbəti dəfə maliyyə dəstəyi göstərməsi qəzetlərin fəaliyyətini davam etdirməsi üçün çox önəmlidir”
“Novoye vremya” qəzetinin baş redaktoru Şakir Ağayev “Bakı-Xəbər”ə şərhində bildirdi ki, MEDİA-nın qəzetləri maliyyələşdirməsi çox önəmli haldır: “Qəzetlərin iqtisadi cəhətdən ağır durumda olduğu bir vaxtda MEDİA-nın çap mətbuatına maliyyə dəstəyi göstərməsini çox önəmli bir məsələ kimi qiymətləndirirəm. Bu çox önəmli məsələdir. Məhz Medianın İnkişafı Agentliyinin maliyyə dəstəyi nəticəsində bu gün Azərbaycanda ənənəvi çap mediası öz fəaliyyətini davam etdirir. Çəkinmədən demək lazımdır ki, reklam bazarının olmadığı medianın iqtisadi cəhətdən çətinlik çəkdiyini nəzərə alsaq MEDİA-nın dəstəyi nəticəsində ölkəmizdə ənənəvi çap mediası öz mövcudluğunu qoruyub saxlayır, fəaliyyətini davam etdirir”.
Ş.Ağayev hesab edir ki, hazırda reklam bazarı olmadığı üçün çap mediası öz iqtisadi problemini özü həll edə bilmir, bu baxımdan, MEDİA-nın maliyyələşdirmə prosesini davam etdirməsi çox önəmlidir. “MEDİA-nın çap mediasına növbəti dəfə maliyyə dəstəyi göstərməsi qəzetlərin fəaliyyətini davam etdirməsi üçün çox önəmlidir”-deyə bildirən Ş.Ağayev qeyd etdi ki, MEDİA təkcə ənənəvi mətbuatı deyil, onlayn medianı da maliyyə dəstəksiz qoymur. O, qeyd etdi ki, onlayn medianın da reklam bazarı yoxdur və buna görə də, MEDİA-nın dəstəyi bu qurumların da fəaliyyətinə müsbət təsir göstərir.
Aqil Camal: “Etiraf etmək lazımdır ki, hazırda MEDİA-nın dəstəyi çap media subyektləri üçün əsas donor qaynağıdır”
“Türküstan” qəzetinin baş redaktoru Aqil Camal MEDİA-nın qzəetlərə maliyyə dəstəyini yüksək qiymətləndirir. A.Camal “Bakı-Xəbər”ə “Medianın İnkişafı Agentliyinin çap və onlayn media üçün növbəti maliyyə dəstəyi haqda qərarı müstəqil media subyektlərinin öz fəaliyyətini davam etdirə bilməsi və fəaliyyətinin təkmilləşdirməsi baxımından olduqca əhəmiyyətlidir.
Xüsusilə, çap mediasının dəstəklənməsi ölkədə qəzetçilik ənənəsinin qorunub saxlanılması, müasir tələblər və çağırışlar, dəyişikliklərə uyğun şəkildə inkişaf etdirilməsi üçün demək olar ki, əsas mənbədir.
10 il əvvəllə müqayisə etsək, bu gün Azərbaycanda rəsmi və müstəqil ictimai-siyasi qəzetlərin sayı 25-ə yaxın olar. MEDİA onlardan 17 müstəqil qəzetin layihələrini dəstəkləməklə, onların fəaliyyətinə stimul verir. Etiraf etmək lazımdır ki, hazırda MEDİA-nın dəstəyi çap media subyektləri üçün əsas donor qaynağıdır” - deyə bildirdi.
A.Camalın sözlərinə görə, onlayn və sosial medianın sürətli inkişafı, qəzet yayımı arealının kəskin şəkildə daralması, ölkədə reklam bazarında daha çox subyektiv amillərin əsas götürülməsi, onsuz da, məhdud sayda olan müstəqli çap mediasını ciddi risklərlə üz-üzə qoyub. “Bu baxımdan, MEDİA Agentliyinin qəzetlərə, onların layihələrinə dəstəyini davam etdirməsi təqdir olunmalıdır.
Bu gün müstəqil medianın dəstəklənməsi həmçinin, informasiya savaşının davam etdiyi bir dövrdə baş verir. Bu gün Azərbaycana qarşı bir neçə istiqamətdən total informasiya savaşı həyata keçirlir. Xüsusilə, Azərbaycanın öz ərazi bütövlüyünü təmin etməsindən sonra bu kampaniyalar daha şiddətli xarakter alıb. Ölkəmizin milli və dövlət maraqlarını müdafiə edən yerli medianın belə bir şəraitdə dəstəklənməsi, mövcud resursların daha da gücləndiriıməsi dövlət maraqlarına cavab verir” - deyə A.Camal bildirdi.
İradə SARIYEVA
