Şəhid Mahsun Bağırzadənin yenilənən xatirə guşəsinin açılışı oldu
30 il düşmənə əsir düşən Vətən torpaqlarının azad edilməsi uğrunda gedən 44 günlük haqq savaşımızda qəhrəmancasına şəhid olan AMEA Lənkəran Regional Elmi Mərkəzinin əməkdaşı Mahsun Zahir oğlu Bağırzadənin doğum günündə yenilənən xatirə guşəsinin açılışı olub. Əvvəlcə şəhidin uyuduğu müqəddəs yer ziyarət edilib, məzar üzərinə gül dəstələri qoyulub.
Rayon rəsmilərin, şəhidin ailə üzvlərin, yaxınların və ictimaiyyət nümayəndələrin iştirak etdikləri açılışda qəhrəman Vətən sevdalısının döyüş yolundan, düşmən təxribatının qarşısını alarkən göstərdiyi igidlik və şücaətdən danışan Mərkəzin direktoru, filologiya üzrə fəlsəfə doktoru Mehman Əliyev onu da bildirib ki, Mahsun kimi oğlanların hünəri hesabına İkinci Qarabağ müharibəsində şanlı qələbə qazandıq. Sinəsini Vətənin yaşaması naminə sipər edib şəhidlik zirvəsinə ucalan Mahsunla indi təkcə doğmaları deyil, bütün Azərbaycan xalqı qürur duyur.
Natiq həmçinin vurğulayıb ki, şəhid ailəsi hər zaman dövlətimizin, o cümlədən AMEA rəhbərliyinin və mərkəzin diqqət və qayğısı ilə əhatə olunub. Şəhidin xatirə guşəsi isə AMEA rəhbərliyinin dəstəyi hesabına ikincı dəfə yenilənib.
Mehman müəllim çıxışında 4 may 2024-cü il tarixində Mahsunun və döyüş yoldaşlarının şəhid olduğu Füzuliyə, Cəbrayıla, Zəngilana, Qubadlıya etdikləri səfərləri barədə məlumat verib.
Çıxışına şəhid ailələrinə, müharibə veteranlara dövlət səviyyəsində olan diqqət və qayğıya görə Prezident İlham Əliyevə və Birinci vitse-prezident Mehriban xanım Əliyevaya minnətdarlıqla başlayan xüsusi təyinatların əfsanəsi Aprel şəhidi Pəncəli Teymurovun anası Vahimə xanım qeyd edib ki, bizim övladlar Vətən, torpaq uğrunda canından, qanından keçərək şəhid olublar. Məhz buna görə biz şəhid anaları başımızı həmişə uca tutmalıyıq.
AMEA Azad Həmkarlar İttifaqı Komitəsinin sədri, siyasi elmlər üzrə fəlsəfə doktoru, dosent Sənan Həsənov, HİK sədrinin müavini Şəhla Əmirova, Zəngəzur Cəmiyyətlər İctimai Birliyinin sədri, tarix üzrə fəlsəfə doktoru Hacı Nərimanoğlu, AMEA Şərqşünaslıq İnstitutunun aparıcı elmi işçisi, tarix üzrə fəlsəfə doktoru, dosent Sübhan Talıblı, AMEA Tarix və Etnologiya İnstitutunun əməkdaşı, tarix üzrə fəlsəfə doktoru İlham Həsənov, eləcə də Astara Rayon Heydər Əliyev Mərkəzinin direktoru Kübra Səmədova, Azərbaycan Beynəlxalq Bankı Lənkəran filialının direktoru Rövşən Abbasov, şəhidin komandiri Elnur Talıbov, Bəlləbur kənd tam orta məktəbinin direktor müavini Əlisəfa Bünyatzadə, rayonun ictimaiyyət nümayəndələri və Mərkəzin kollektivi yenilənən guşənin önünə ehtiram əlamət olaraq qərənfillər düzüblər.
Məlum olsun ki, AMEA Lənkəran Regional Elmi Mərkəzinin əməkdaşı olmuş Mahsun Zahir oğlu Bağırzadə 1998-ci ildə Lənkəranın Xanbulan qəsəbəsində dünyaya göz açıb. Elin mərd oğlu Vətən müharibəsi başlayan zaman sentyabrın 28-də könüllü olaraq cəbhəyə gedib. Şərəfli döyüş yolu Füzuli, Cəbrayıl, Zəngilan və Qubadlıdan keçib. 2020-ci il oktyabr ayının 22-də Qubadlı rayonunun “Yazı düzü” adlanan ərazisində qəhrəmanlıq göstərərək əbədiyyətə qovuşub. Ölkə Prezidentinin müvafiq sərəncamları ilə ölümündən sonra “Vətən uğrunda”, Cəbrayılın, Qubadlının azadlığına görə və “Cəsur döyüşçü” medallarına layiq görülüb.
Zəfər ORUCOĞLU
Azərbaycan Jurnalistlər Birliyinin üzvü
